San Pablo-Lucena route ng PNR, balik-operasyon sa Mayo

ni Lolet Abania | February 15, 2022

Pinag-iisipan na ng Philippine National Railways (PNR) na muling buksan ang kanilang San Pablo, Laguna hanggang Lucena, Quezon route sa Mayo matapos ang halos walong taong tigil-operasyon nito.

Nagsagawa naman si Department of Transportation (DOTr) Secretary Arthur Tugade ng inspeksyon sa ruta ng San Pablo-Lucena ng PNR.

Ayon kay Tugade, ang pagbubukas uli ng nasabing ruta ay hindi lamang maili-link ang PNR sa Bicol network, ito rin aniya, “unlock economic potentials and enhance mobility in Southern Luzon.”

Binanggit din ni Tugade na bukod sa ginagamit ito bilang passenger commuter service, ang PNR Lucena-San Pablo route ay maaari ring i-convert sa isang commercial o cargo freight service.

Sinabi naman ni PNR assistant general manager at spokesperson Ces Lauta, nang tanungin ito kung kailan bubuksan muli ang ruta, “Not later than May 2022.”

Halos isang dekada na hindi operational ang PNR San Pablo-Lucena route na may 44-kilometer inter-provincial commuter railway, kung saan bahagi ito ng commuter train service na patungong Bicol na may mga stations at flag stops para sa araw-araw na commuters o may maikling biyahe lang.

Matatandaang tumigil ang operasyon ng ruta noong Oktbre 2013 matapos na mag-collapse ng isang abutment.

Gayunman, ayon sa DOTr, kapag nagpatuloy na ang operasyon nito, magkakaroon ang commuter line ng dalawang terminal stations at apat na flag stops sa pagitan, at ang travel time o tagal ng biyahe ay 1 oras at 32 minuto lamang mula Lucena hanggang San Pablo.

285 PNR personnel, may COVID-19

ni Lolet Abania | January 10, 2022

Aabot na sa 300 personnel ng Philippine National Railways (PNR) ang nagpositibo sa test sa COVID-19 matapos ang ginawang antigen test sa kanila habang nasa isolation na ang mga ito.

“’Yung ating huling bilang na 261, ngayon po ay 285 na at continuing po ang ating testing lalo na sa passenger-facing employees,” ani PNR spokesperson Atty. Celeste Lauta sa isang interview ngayong Lunes.

Ayon kay Lauta, sa 285 personnel na may COVID-19, 58 ay “passenger-facing” o iyong may exposure sa mga pasahero.

“Karamihan naman po ay non-passenger facing,” ani Lauta, subalit aniya, sapat pa ang mga staff nila para makapag-operate.

Sinabi ni Lauta na ang PNR ay mayroong humigit-kumulang sa 1,700 personnel, kabilang na ang mga service providers.

Tiniyak naman ni Lauta sa mga pasahero ng PNR na bawat train ay kanilang dini-disinfect matapos ang kada biyahe nito.

“Bago siya bumalik sa susunod niyang biyahe,disinfected na po iyon,” saad pa ng opisyal.

Bukod dito, isinasagawa rin ang mahigpit na health protocols sa loob ng tren at paligid ng mga istasyon.

“Kaya tayo nagka-conduct ng random testing sa ating mga pasahero ay para makita natin ‘yung data or ‘yung sample namin kung meron nang mga positibo sa aming mga mananakay,” wika ni Lauta.

Ayon pa kay Lauta, nitong Biyernes sinimulan na rin ang random testing at magpapatuloy pa ito.

“Yun ang magde-determine kung ano ang magiging rekomendasyon natin sa Department of Transportation kung ibabalik ang pagsuot ng face shield,” ani pa ni Lauta.

Ilang pasahero ng PNR, nag-positibo sa random antigen test

ni Jasmin Joy Evangelista | January 8, 2022

Nag-positibo sa random COVID-19 antigen test ang ilang pasahero ng Philippine National Railways (PNR).

Ayon sa report, 3 sa 9 na pasahero ang nag-positibo sa antigen test.

Ang mga pasaherong nag-positive ay dinadala sa holding area habang nakikipag-coordinate sa kani-kanilang LGU.

Ilang pasahero rin ang pumayag na sumailalim sa random at free testing bunsod ng patuloy na pagtaas ng kaso ng COVID-19 sa bansa.

“Okay naman po makapagpaganyan para malaman kung may virus or wala,” pahayag ng isang pasahero.

“Wala ka naman sintomas bakit ka naman magpapa-test 'di ba? Ang laking abala po,” sabi naman ng isa pang pasahero.

Imposible umanong maisailalim sa antigen test ang lahat ng nagiging pasahero ng PNR, ngunit ang resulta ng random testing ay isa lamang indikasyon na posibleng makahalubilo ng isang commuter ang mga indibidwal na may Covid na walang nararanasang sintomas.

Dahil dito, mahalaga pa rin na sundin ang minimum public health protocols habang nasa pampublikong transportasyon.