2 pulis, huli sa extortion, hepe ng Binangonan, sibak

ni Lolet Abania | January 22, 2021

Sinibak na sa puwesto ang hepe ng Binangonan Municipal Police Station dahil sa umano’y extortion activities ng kanyang mga tauhan.

Ayon kay Philippine National Police (PNP) Chief Police General Debold Sinas sa isang interview ngayong Biyernes, "'Yung chief of police po doon, nag-report 'yung regional director doon, si General Felipe Natividad, ay pina-relieve rin niya, pending investigation for negligence dahil nangyari po 'yun sa loob ng istasyon po nila."

Ayon sa Calabarzon police, pinalitan si Police Lieutenant Colonel Ferdinand Ancheta ni Police Major Amadeo Estrella III.

Ginawa ang pagsibak kay Ancheta matapos na dalawang civilian agents ng police station ang naaresto ng mga operatiba mula sa PNP Integrity Monitoring and Enforcement Group dahil sa umano'y extortion activities.

Ayon sa pulisya, ang dalawang naarestong indibidwal ay nangikil umano ng pera sa isang Stephen Kellu kapalit ng pag-release ng na-impound nitong motorsiklo.

Base sa inisyal na imbestigasyon, may iba pang kawani ng Binangonan Municipal Police Station ang sinasabing sangkot sa mga extortion activities.

70 personnel ng PNP, may COVID-19

ni Lolet Abania | January 18, 2021

Umabot na sa kabuuang bilang na 9,595 ang may COVID-19 sa hanay ng Philippine National Police (PNP) matapos na tamaan ang 70 kawani ng nasabing virus.

Gayunman, ang kabuuang bilang ng mga gumaling ay umabot sa 9,087 kung saan 25 na nadagdag na personnel na may respiratory illness ang nakarekober, habang 28 sa mga kapulisan ang namatay.

Mayroon namang 480 na active cases ang sumasailalim na sa treatment o quarantine.

Pinapayuhan na agad na makipag-ugnayan sa PNP Health Service ang kawani na makakaranas ng anumang sintomas ng virus.

P1.36-M halaga ng ecstasy, nasabat; 1 patay

ni Lolet Abania | January 8, 2021

Patay ang isang suspek habang nakatakas ang isa pa matapos ang isinagawang anti-illegal drugs operation ng Philippine National Police (PNP) sa Ermita, Manila ngayong Biyernes nang umaga.

Ayon kay PNP Chief Police General Debold Sinas, ang nasawing suspek ay kinilala sa tawag na "Kuya," na armado ng isang caliber .45 pistol at nakipagbarilan sa mga kawani ng PNP Drug Enforcement Group para takasan ang pag-aresto kanya ng mga ito.

Kinilala naman ang isa pang suspek na si Ish Aguilar, kasamahan umano ni Kuya, na nagawang makatakas kaya pinaghahanap na rin ng awtoridad,

Sinabi ni Sinas na ang mga suspek ay distributor umano ng ilegal na droga sa Metro Manila at sa kalapit na probinsiya.

Aniya pa, nakukuha ng mga ito ang supply ng drugs mula sa mga dayuhan at ilang Pinoy na kaibigan.

Nakumpiska ng mga awtoridad ang 800 tableta ng hinihinalang ecstasy na nagkakahalaga ng P1,360,000; dalawang plastic sachets ng hinihinalang shabu na P340,000 ang halaga; isang caliber .45 pistol; at buy bust money na P5,000.

Ayon kay PNP-DEG Chief Police Brigadier General Ronald Lee, sina Kuya at Aguilar ay nakatakas sa unang operasyon ng awtoridad noong Huwebes ng hapon nang ni-raid nila ang isang kitchen-type shabu laboratory sa Cainta, Rizal.

Gayunman, ang live-in partner ni Aguilar na si Khrystyn Almario Pimentel ay naaresto sa nasabing operasyon. Nasabat kay Pimentel ang 2,000 tableta ng hinihinalang ecstasy na P3,400,000 ang halaga; 10 maliliit na pakete ng hinihinalang marijuana na P60,000 ang halaga; at hinihinalang shabu na nagkakahalaga ng P6,800,000.

Nasabat din ng pulisya ang ilang laboratory equipment na ginagamit para sa pagpoproseso ng shabu.