Bodycam sa mga pulis, start na sa Abril

ni Lolet Abania | March 11, 2021

Sisimulan ng Philippine National Police (PNP) na maglagay ng mga body cameras sa kanilang mga isasagawang operasyon sa Abril para humupa na ang pangamba ng publiko tungkol sa mga naiuulat na namamatay kapag nagkakaroon ng raid ang pulisya, ayon sa pahayag ni Presidential Spokesperson Harry Roque.

“The body cams are there already. Training is ongoing and we expect these body cams to be used by April to erase doubts that the public may have on what really happens during police operations and when somebody dies in those operations,” ani Roque sa Palace briefing ngayong Huwebes.

“Kasi ‘yang body cam po ay physical evidence at hindi po magsisinungaling ang physical evidence,” dagdag ni Roque.

Ito ang paniniyak ni Roque kasabay ng isinasagawang imbestigasyon ng Justice Department tungkol sa pagkamatay ng siyam na aktibista sa Calabarzon Region habang may operasyon ang pulisya sa lugar noong Linggo.

Sa ulat, nagsasagawa ng operasyon ang mga awtoridad sa nasabing lugar, kung saan isisilbi ng mga ito ang search warrants para sa mga explosives at iba pang deadly weapons saka nangyari ang insidente.

NUPL, sumaklolo sa mga pamilya ng 9 na aktibistang pinatay

ni Mary Gutierrez Almirañez | March 11, 2021

Kinalampag na ng mga abogado mula sa National Union of People’s Lawyers (NUPL) ang gate ng Antipolo Memorial Homes ngayong umaga, Marso 11, dahil hindi pa rin nito pinapayagang ilabas ang mga bangkay ng apat na aktibistang namatay sa isinagawang raid sa Calabarzon nitong Linggo.

Ayon pa kay NUPL Attorney Kathy Panguban, pinapatagal lamang ng mga awtoridad ang pagsasagawa nila sa independent forensic investigation para mapagtakpan ang mga ebidensiya hinggil sa panlalaban ng mga namatay.

Kaugnay nito, mariin namang pinabulaanan ng mga magulang ng mag-asawang Ariel at Ana Mariz Evangelista ang pagiging komunista ng dalawa at ang paratang na nanlaban umano ang mga ito.

Sagot ni PNP Spokesperson Police Brigadier General Ildebrandi Usana, "Kung meron naman din po silang mga ebidensiya, we are more than willing to accommodate them, they can file actions against our police officers."

Dagdag pa niya, “Sila po ay nagkaroon ng operasyon on the basis of a judicial order. Ito po yung search warrant na in-issue ng mga judge from Batangas, Cavite, Laguna, Rizal at NCR. Hindi ito isang bagay na kukunin mo lang over the counter. Mahigpit po ang mga court pagdating po sa pag-issue ng search warrant.”

Iginiit din niya ang nangyari sa Negros Oriental noong July 2019, kung saan apat na pulis ang pinatay ng New People’s Army (NPA). Aniya, wala silang narinig na pagkondena mula sa grupo o kahit kanino. Samantala, ang ginawa namang operasyon ng Philippine National Police (PNP) sa Calabarzon nitong Linggo ay base lamang sa ibinigay na judicial order mula sa search warrant, gayunpaman ay marami pa rin ang nagkokondena.

Nilinaw naman ng Malacañang na magsasagawa ng imbestigasyon ang Department of Justice hinggil sa pagkamatay ng 9 na aktibista.

Iwas-COVID-19… Magho-holding hands at maghahalikan in public, lagot!

ni Lolet Abania | March 10, 2021

Umapela ang Philippine National Police (PNP) sa publiko na iwasan ang pagpapakita ng tinatawag na ‘physical, social and romantic relationships’ o public display of affection (PDA) dahil taliwas ito sa health protocols na ipinatutupad habang nasa gitna ng COVID-19 pandemic ang bansa.

"The virus may be right before them. Infection happens to families, it can happen to anyone, anywhere," pahayag ni PNP Spokesman Police Brigadier General Ildebrandi Usana ngayong Miyerkules.

Ayon kay Usana, dahil sa pagtaas ulit ng mga bagong kaso ng COVID-19, dapat na ang publiko ay nananatiling maingat mula sa pagkalat ng virus.

"And if you love your spouse, your children, you have to be conscious of the minimum health and safety protocols," ani Usana.

Naniniwala naman si Usana na susunod ang publiko sa ipinatutupad na protocol, lalo na kapag nasa mga commercial at recreational establishments kahit pa walang pulis na nakabantay.

"Sila na po ang magkusang maghiwalay properly in public," sabi ng opisyal.

Sinabi pa ni Usana na binigyan ng direktiba ang mga pulis na tawagin ang atensiyon ng mga taong nagsasagawa ng ‘kissing, holding hands or hugging in public’.

Gayunman, ayon kay Usana, “This appeal is for couples, close friends, who are very dear to each other, family clans and group of people.”