1,106 checkpoints habang lockdown

ni Lolet Abania | March 28, 2021

Mahigit sa 1,000 quarantine control points (QCPs) ang ilalatag sa Metro Manila at karatig lalawigan habang ang mga lugar na ito ay nakasailalim sa isang linggong enhanced community quarantine (ECQ), ayon sa Philippine National Police (PNP) ngayong Linggo.

Ayon kay Joint Task Force COVID Shield commander Police Lieutenant General Cesar Hawthorne Binag, may kabuuang 1,106 checkpoints habang 9,356 law enforcers ang nakatakdang italaga mula alas-6 ng gabi ngayong Linggo sa mga lugar na nasa ilalim ng mas mahigpit na lockdown. "At 6 p.m. they will be pre-positioned, but the implementation will start 12:01 a.m. [Monday]," ani Binag.

Sa inilabas ng PNP, ang mga inilatag na checkpoints at itinalagang PNP personnel sa bawat rehiyon ay ang mga sumusunod:

1. NCRPO (National Capital Region Police Office) - 929 QCPs, 2,297 police personnel

2. Police Regional Office - 3 (Central Luzon) - 162 checkpoints, 982 police personnel

3. Police Regional Office - 4A (Calabarzon) - 15 checkpoints, 498 police personnel Isinailalim ng gobyerno ang Metro Manila, Bulacan, Rizal, Cavite at Laguna sa mas mahigpit na quarantine mula March 29 hanggang April 4 matapos na makapagtala ng mahigit 9,000 bagong kaso ng COVID-19 sa isang araw.

Sinabi rin ni Binag na ang mga dating checkpoints sa panahon ng general community quarantine (GCQ) ay kabilang sa 1,106 kabuuang checkpoints na bubuhayin nila ngayong ECQ.

Ayon pa kay Binag, magtatalaga rin ng mga PNP personnel sa mga lugar na matatao gaya ng palengke, groceries at ibang establisimyento na nagbibigay ng basic services dahil marami ang mamimili ng mga essential goods.

P13.6 M halaga ng shabu nakumpiska, 1 arestado

ni Lolet Abania | March 24, 2021

Timbog ang isang notorious drug suspect matapos na makuhanan ng P13.6 milyong halaga ng hinihinalang ilegal na droga sa buy-bust operation ng pinagsanib na puwersa ng Special Operations Unit, Philippine National Police Drug Enforcement Group at Agency, Provincial Intelligence Branch Laguna Police Provincial Office at San Pedro City PS kagabi.

Kinilala ni PNP OIC Lt. Gen. Guillermo Eleazar ang inarestong suspek na si Eddarfeel Baloni Sakilan alyas Kalbo, 42-anyos, taga-Maguindanao, residente ng St. Joseph Village, San Pedro, Laguna.

Naaresto si Sakilan ng mga operatiba ng SOU 3, PDEG sa pamumuno ni PLT Jonathan Sosongco, PDEA 4A, PIB Laguna PPO at San Pedro City Police Station.

Nakumpiska kay Sakilan ang nasa 2 kilo ng hinihinalang shabu na may market value na P13.6 milyon, isang kotse, isang cellphone at P2,000 cash, kung saan ang suspek ay kilalang notorious drug courier na nag-o-operate sa Region 3, NCR, Region 4A at Mindanao area.

Ayon kay Eleazar, ang mga nasabing droga ay galing sa isang Chinese na nakipagtransaksiyon sa suspek at iba pang drug group gamit ang international number mula sa Hong Kong.

Sinabi pa ni Eleazar na ang kanilang grupo ay binubuo ng Filipino-Muslim at Chinese nationals. Modus ng mga ito na gumamit ng iba’t ibang sasakyan para sa kanilang illegal drug transaction.

Sa tulong ng confidential informant, napasok ng isang kawani ng PNP DEG ang nasabing drug syndicate habang nabunyag naman ang kanilang isinasagawang transaksiyon ng ilegal na droga. Nahaharap sa kasong paglabag sa Section 5 at 11, Article II of Republic Act 9165 ang suspek.

Convenience store, ipinasara kahit aprub sa curfew

ni Mary Gutierrez Almirañez | March 17, 2021

Ipinasara ng awtoridad ang mga nadatnang nag-o-operate na tindahan at 24-hour na establisimyento sa ikalawang gabi ng unified curfew sa Metro Manila pasado alas-10 hanggang alas-5 nang madaling-araw nitong Martes, Marso 16.

Ayon kay Southern Police District Director Brig. Gen. Eliseo Cruz, sa Muntinlupa City ay pinuntirya nila ang mga convenience store na wala sa listahan ng mga pinapayagang magbukas habang oras ng curfew, taliwas sa inanunsiyo ng Las Piñas LGU na kabilang ang 24-hour convenience stores sa mga pinapayagang magbukas.

Iginiit naman ni Cruz na inabisuhan niya ang mga hepe na sakop ng Southern Police District upang klaruhin iyon sa kani-kanilang lokal na pamahalaan.

Aniya, puwede namang amyendahan ang mga ordinansa para isama ang 24-hour convenience store sa mga exempted na establisimyento ngunit hangga’t walang paglilinaw ay patuloy nilang ipasasara ang mga ito.

Kaugnay nito, bumaba naman ang bilang ng mga residente na nahuli sa kalsada habang ipinapatupad ang curfew hours sa Navotas, Caloocan at Quezon City.

Batay sa ulat, mula 80 indibidwal na hinuli nitong Lunes sa Caloocan ay mahigit 58 violators na lamang ang mga nahuli nang sumunod na gabi, habang sa Navotas naman ay bumaba na lamang sa 7 ang mga natikitan.

Sa Quezon City, mahigit 60 naman ang hinuli kabilang ang anim na menor de edad.

Sa ngayon ay umabot na sa 631,320 ang naitalang kaso ng COVID-19 sa bansa, kung saan 4,437 ang nadagdag sa mga nagpositibo.

Sa pagpapatuloy ng unified curfew ay umaasa ang pamahalaan na mababawasan ang mabilis na paglobo ng virus at ang bilang ng mga violators.