P68M shabu nasamsam, 1 timbog

ni Lolet Abania | April 27, 2021

Nagkakahalaga ng P68 milyon na tinatayang nasa 10 kgs. ng hinihinalang shabu ang nakumpiska sa isang drug personality matapos ang isinagawang operasyon ng Philippine National Police-Drug Enforcement Group (PNP-DEG) sa Cavite kahapon.

Kinilala ng mga awtoridad ang naarestong suspek na si Michael Lucas, 35-anyos.

Sa ulat ng PNP, ang suspek ay matagal na sa illegal drug trade na umabot ng mahigit dalawang taon at miyembro umano ito ng isang sindikato ng droga na siyang distributor ng shabu sa Region 3, NCR, Mindanao, at iba pang karatig-probinsiya.

Ayon kay PNP Chief Police General Debold Sinas, nakukuha ni Lucas ang suplay ng ilegal na droga mula sa isang Chinese na nakakulong sa Muntinlupa sa tulong ng iba pang kasamahan nito.

Sinabi pa ni Sinas, umaabot sa 10 hanggang 15 kgs. ng shabu ang naibabagsak umano ng suspek sa iba’t ibang lugar sa bansa.

“This is the result of the PNP’s intensified campaign against illegal drugs. We will continue to arrest drug personalities nationwide for a drug-free community,” ani Sinas.

Inihahanda na rin ang isasampang kaso laban sa suspek.

Bahay-bahay na libreng pagkain, aprub

ni Mary Gutierrez Almirañez | April 26, 2021

Pinaboran ng Philippine National Police (PNP) ang rekomendasyon na gawing bahay-bahay na lamang ang pamimigay ng mga donasyong pagkain katulad nu’ng nakasanayan, sa halip na lumabas papuntang community pantry, batay kay PNP Spokesman Brigadier General Ronaldo Olay.

Aniya, "Maganda rin ‘yung suggestion na ‘yan na ibahay-bahay na lang para hindi na maglabasan ang mga tao sa daan."

Sang-ayon din siya sa rekomendasyong mga kamag-anak na lamang ang pakukuhanin ng donasyon para hindi na ma-expose sa COVID-19 ang mga vulnerable na indibidwal, partikular na ang mga senior citizen, lalo pa’t nasa ilalim pa rin ng modified enhanced community quarantine (MECQ) ang NCR Plus.

Sabi pa niya, "Tama 'yan, nasa MECQ pa rin tayo at batay sa panuntunan ng IATF, ang mga 18 years old o mas bata, 65 years old o mas matanda, hindi muna lalabas sa tahanan."

Sa ngayon ay naglabas na ng guidelines ang Quezon City para sa mga nais mag-organisa ng community pantry na sinuportahan naman ni Department of the Interior and Local Government (DILG) Secretary Eduardo Año.

Ayon kay Año, “It's the organizer's responsibility to impose the minimum health standards. That's the primary reason why they have to coordinate with the LGU’s (local government units) so that the latter can provide assistance.”

Kaugnay ito sa pinaiimbestigahan ng DILG sa PNP, hinggil sa pagkamatay ng isang senior citizen na pumila sa community pantry ng aktres na si Angel Locsin.

“Since somebody died, the PNP has to conduct an investigation. We cannot ascertain yet who could be liable until the completion of the investigation,” sabi pa ni Año.

Lumabag sa curfew, patay, 2 tanod kinasuhan

ni Ronalyn Seminiano Reonico | April 12, 2021

Patay ang isang curfew violator matapos bugbugin ng 2 tanod sa Calamba, Laguna.

Ayon sa Philippine National Police (PNP), mahaharap ang dalawang tanod sa kasong homicide.

Pahayag ni PNP Spokesperson Police Brigadier General Ildebrandi Usana, si Calamba Police Chief Lieutenant Colonel Jonathan Villamor ang magsasampa ng homicide complaints laban sa dalawang tanod.

Saad pa ni Usana, “Magsasampa po ng kaso 'yung ating Calamba chief of police laban doon sa dalawang barangay tanod because accordingly, meron pong mga witnesses.”

Kinilala ng awtoridad ang biktimang si Ernanie Jimenez, 26-anyos at saad ni Usana, ayon sa mga saksi, hinabol ito ng mga tanod at binugbog bandang alas-10:30 hanggang 11 PM noong April 7.

Lumabas diumano ng bahay ang biktima para bumili ng pagkain. Nang hinanap ito ng kanyang kapatid na si Gledien, naabutan niyang sugatan ang biktima sa barangay hall.

Nagkaroon diumano si Ernanie ng fractures sa bungo at kaagad na isinugod sa ospital ngunit binawian din ng buhay noong April 9.

Samantala, pinabulaanan naman ng mga suspek ang alegasyong pambubugbog sa biktima at iginiit na tumakbo ito palayo sa kanila.

Ayon kay Usana, mayroon din silang nakalap na ibang impormasyon na nagsasabing nadapa ang biktima habang tumatakbo palayo sa mga tanod.

Saad pa ni Usana, "Witnesses said they chased the alleged violator but then kicked him on the ground after curfew hours. But another version of the story says that he ran away and then stumbled.

"All of these will have to be brought to the attention of the court. It's up to the prosecutor, of course, to have an understanding if there is probable cause to file the information against them."