9 na nagpanggap na opisyal ng PNP at Phil. Army, arestado sa checkpoint

ni Lolet Abania | June 6, 2021

Timbog ang siyam na lalaki na nagpakilala umanong mga opisyal ng Philippine National Police (PNP) at Philippine Army sa isang checkpoint sa bayan ng San Jorge, Samar.

Ayon kay San Jorge Municipal Police Station chief Police Captain Cañete, pinara sa checkpoint ng kanyang mga tauhan ang sasakyan ng grupo at napansin nilang may kakaibang galaw ang mga suspek. Agad na hinanapan ng mga awtoridad ng travel authority ang grupo habang isang papel umano mula sa Palasyo ang ipinakita ng mga ito, kung saan nakasaad dito na pinapayagan silang bumiyahe patungo sa Maynila mula Mindanao at gayundin pabalik.

Nang hingan ng mga pulis ng identification card ang grupo, nagpakita naman umano ang mga ito ng kanilang IDs na nakalagay pa rito na sila ay mga opisyal ng PNP at Philippine Army.

Ayon kay Capt. Cañete, agad niyang ipina-verify sa Maynila ang mga IDs at travel authority ng mga suspek, kung saan lumabas na peke ang mga ito habang walang pangalan ng mga opisyal na tugma sa mga IDs.

Nakumpiska sa mga suspek ang mga pekeng IDs at pekeng travel authority na nanggaling umano sa Malacañang, ilang hindi lisensiyadong baril at mga communication equipment, mga bala ng baril, bullet proof vest at Philippine Army at PCG uniform. Patuloy ang imbestigasyon ng mga pulis sa nangyaring insidente.

30 K body cams pa, hirit ng PNP

ni Ronalyn Seminiano Reonico | June 6, 2021

Malinaw ang kuha ng mga body-worn cameras (BWCs) na gagamitin ng mga pulis sa pagsasagawa ng mga operasyon kahit sa gabi dahil sa auto-night mode nito na kayang mag-detect ng mga bagay hanggang 10 meters na layo, ayon kay Philippine National Police Chief General Guillermo Lorenzo Eleazar.

Saad pa ni Eleazar, “May mga operation na isinasagawa sa gabi and this was anticipated during the review of what type of body cameras would be procured by the PNP. Kaya nga ‘yung bilin ng mga nakaraang liderato ng PNP ay kung bibili ay ‘yung the best na at magagamit araw man o gabi o kahit masama pa ang pahanon.

“‘Yung mga police operations naman kasi ay walang pinipiling oras ‘yan at lugar. Basta natunugan ng ating mga operatiba ay sugod kaagad. But this time, para ru’n sa mga mabibigyan, they must ensure na nakakabit ang body cameras at naka-on.” Water-proof din umano ang mga BWCs at naire-record din ang audio at video sa loob ng 8 oras.

Ang lahat ng datos na maire-record pagkatapos ng operasyon ay direktang dadalhin sa PNP Command Center para sa management at monitoring.

Ayon din kay Eleazar, papatayin lamang ang BWCs kapag tapos na ang operasyon o kapag nai-turn-over na ang suspek sa detention facility.

Samantala, 2,696 ang kabuuang bilang ng mga BWCs na binili ng PNP na naipamahagi na sa 170 police stations. Saad pa ni Eleazar, “So ang binili natin dito ay hindi lang ‘yung 2,696 units ng body cameras but the entire system ng recording and real-time transmittal of the audio-video recording.”

Aniya, 30,000 BWCs pa ang kailangan para mabigyan ang lahat ng mga police stations sa bansa.

Dagdag pa ni Eleazar, “Napakalaki pang budget ang kailangan dito pero tayo ay umaasa na makakakuha tayo ng suporta sa Kongreso sa mga darating na taon upang mawala na talaga ang pagdududa sa lahat ng operasyon na gagawin ng ating kapulisan.”

3 pulis, patay; 10 sugatan sa ambush

ni Ronalyn Seminiano Reonico | May 29, 2021

Tatlong pulis ang patay at 10 pa ang sugatan sa naganap na pag-ambush ng mga hinihinalang miyembro ng New People’s Army (NPA) sa Magsaysay, Occidental Mindoro noong Biyernes nang umaga.

Ang mga naturang pulis ay miyembro umano ng Philippine National Police’s First Occidental Mindoro Provincial Mobile Force Company na nagtungo sa San Nicolas para sa outreach program na “Serbisyo Caravan” na inorganisa ng Provincial Task Force-Ending Local Communist Armed Conflict.

Base sa ulat ng awtoridad, alas-10:30 nang umaga naganap ang engkuwentro nang paulanan ng bala ng baril ang mga pulis na sakay ng open vehicle na nakaparada malapit sa highway.

Ayon kay Provincial Police Chief Col. Hordan Pacatiw, ang mga nasawing pulis ay sina Police Executive Master Sgt. Jonathan Alvarez at Police Cpl. Stan Gonggora. Ngayong Sabado naman binawian ng buhay si Police Staff Sergeant Nolito Develos Jr..

Dagdag pa ni Pacatiw, ang tinambangang sasakyan ng mga pulis ay bahagi ng security convoy ni Gov. Eduardo Gadiano. Naganap ang pananambang ng armadong grupo nang pauwi na umano sina Gadiano matapos ang “Serbisyo Caravan”.

Samantala, nagsasagawa na ng operasyon ang awtoridad upang matugis ang mga salarin sa insidente.