Checkpoints sa NCR, inalis na — PNP

ni Lolet Abania | September 15, 2021

Inihayag ngayon ni Philippine National Police (PNP) Chief Police General Guillermo Eleazar na walang itatakdang mga checkpoints sa National Capital Region (NCR) kapag isinailalim na ang rehiyon sa Alert Level 4 bukas, Huwebes.

Sa isang interview, sinabi ni Eleazar na ang pagde-deploy nila ng mga pulis ay nakatuon na lamang sa mga lugar na nasa ilalim ng granular lockdowns. “Wala na tayong checkpoint sa operation dahil narinig naman natin ng uniform naman itong Level 4 [Alert Level 4 in NCR],” ani Eleazar .

Paliwanag pa ni Eleazar na ang pagpapatupad ng granular lockdowns ay hindi na bago sa kapulisan dahil sa may 50 lugar sa Metro Manila ang kasalukuyang nakasailalim sa naturang restrictive measure.

Una nang inianunsiyo nitong Martes ni Department of Interior and Local Government (DILG) Secretary Eduardo Año na ang NCR ay isasailalim sa Alert Level 4 simula sa Huwebes sa gitna ng COVID-19 pandemic.

Sa ilalim ng Alert Level 4, ang ikalawang pinakamataas na alert level sa bagong scheme ng pamahalaan, ay iyong may mga kaso ng COVID-19 na mataas ang bilang o nadaragdagan pa habang ang kabuuang mga kama at ICU beds ay nasa high utilization rate.

Ang mga hindi pinapayagan o bawal lumabas ng kanilang bahay na nasa ilalim ng Alert Level 4 ay mga edad 17 pababa, mga 66-anyos pataas, mga mayroong immunodeficiencies, comorbidities, o iba pang may panganib sa kalusugan, mga buntis.

Ang mga indibidwal naman na papayagan o maaaring lumabas ng bahay ay iyong mga kukuha o bibili ng mga essential goods at services, o magtatrabaho sa mga industriya o opisina na pinayagang mag-operate ng gobyerno.

Gayundin, sa ilalim ng Alert Level 4, ang intrazonal at interzonal travel para sa mga indibidwal ay maaaring payagan subalit nakadepende ito sa ipinatutupad na regulasyon ng LGU na destinasyon o nais na puntahan.

18 pulis ng Marinduque, nagpositibo sa COVID-19; 53 naka-isolate

ni Jasmin Joy Evangelista | September 12, 2021

Nagpositibo sa COVID-19 ang 18 kawani ng Marinduque Police, ayon sa kanilang direktor na si Police Col. Wilson Santos VI.

53 katao naman ang na-expose sa mga ito kaya agad na pinag-isolate.

“Six 'yung positive sa RT-PCR, 12 nag-positive sa antigen test, tapos 53 'yung naka-isolate, naka-quarantine dahil sa close contact dun sa mga nag-positive namin. Patuloy naman 'yung monitoring sa kalusugan ng mga tao namin," ani Santos.

Gayunpaman, patuloy pa rin daw sila sa pagtupad ng kanilang tungkulin lalo at hindi lang pandemya ang hinaharap ngayon dahil nagbabantay din sila sa banta ng bagyo.

“Kahit may positive sa amin dahil sa pagganap ng kanilang mga trabaho patuloy pa rin naming gagawin 'yung serve and protect the people of Marinduque. Magtatrabaho pa rin kami... Hindi namin iko-compromise ang security and safety ng mga tao despite of the COVID-19, ganun pa rin 'yung kahandaan namin. Pagdating ng mga sakuna at bagyo kami ay nakaantabay," ani Santos.

Halos lahat daw ng kanilang kawani ay nakatanggap na ng unang dose ng bakuna, ayon kay Santos.

Malaki rin ang tiwala niya na mapagtatagumpayan nila ang laban sa virus sa kabila ng patuloy na pagtaas ng kaso nito.

‘Mañanita celebrant’… Ex-PNP Chief Debold Sinas, bagong Undersecretary ng Office of the President

ni Jasmin Joy Evangelista | September 11, 2021

Itinalaga bilang Undersecretary ng Office of the President ang kontrobersiyal na Ex-PNP chief na si Debold Sinas.

Ito ay kinumpirma ni Executive Secretary Salvador Medialdea ngayong Sabado.

Si Sinas ay naglingkod bilang 25th chief ng PNP sa loob ng 6 na buwan mula Nobyembre 2020 hanggang retirement nito noong May 7, 2021.

Matatandaang naging kontrobersiyal si Sinas matapos magdaos ng kanyang birthday, na nilahukan nang pagkarami-raming tao sa kalagitnaan ng lockdown laban sa coronavirus disease (COVID-19).