DILG hinihintay ang report ng PNP tungkol sa pagbisita ni Pacquiao sa Batangas

ni Jasmin Joy Evangelista | October 19, 2021

Hinihintay ni Department of Interior and Local Government (DILG) Secretary Eduardo Año ang report ng Batangas Provincial Police Office kaugnay na mass gathering sa Balayan, Batangas matapos bumisita ni Senador Manny Pacquiao.

Naging usap-usapan ang pagbisitang ito ni Pacquiao matapos dumugin umano ng mga tao sa kabila ng banta ng COVID-19.

Sinabi sa Laging Handa press briefing ni DILG Undersecretary Jonathan Malaya na nais malaman ni Secretary Año ang detalye para matukoy kung mayroong naganap na paglabag sa quarantine protocols.

“Hinihintay pa rin po natin yung report mula sa Batangas Provincial Police Office at doon sa police station na mayroong kinalaman no, na may jurisdiction sa nasabing insidente,” ani Malaya.

“Ang natanggap lang po namin kasing ay raw report lamang at ang hinihingi po ni Secretary Año sa ating kapulisan is a more detailed report so that we can act accordingly,” dagdag niya.

Samantala, iginiit naman ni Sen. Manny na hindi siya namimili ng boto matapos nitong mamudmod ng pera.

Ito raw ay bahagi ng kanyang pagtulong na ginagawa na niya noon pang 2002.

Sa pagluwag ng restrictions sa NCR… Tiangge owners, pinaalalahanan ng PNP at MMDA

ni Jasmin Joy Evangelista | October 18, 2021

Mahigpit na pinaalalahanan ng Philippine National Police (PNP) at Metropolitan Manila Development Authority (MMDA) ang mga may-ari ng night markets at tiangge na ipatupad ang minimum health protocols sa kani-kanilang puwesto.

Ito ay kasunod ng paglalagay sa Metro Manila sa Alert Level 3.

Ayon sa PNP, dapat ay may mga nakakalat na karatula na nagpapaalala sa mga mamimili sa wastong pagsusuot ng face mask at face shield at pagsunod sa physical distancing.

Mag-iikot din ang mga kapulisan para matiyak na nasusunod ang nasabing minimum health protocols.

Sinabi naman ni MMDA chairman Benhur Abalos na maglalabas din ang Inter-Agency Task Force ng mga panuntunan para sa operasyon ng mga night markets at tianggehan.

Ito ay matapos ma-monitor ng PNP at MMDA na marami ang nagpupunta sa mga pasyalan at kainan simula nang ibaba sa alert level 3 ang NCR.

Banta ng PNP chief... Cuenca, mananagot ka

ni Lolet Abania | October 11, 2021

Nagbabala si Philippine National Police (PNP) chief Gen. Guillermo Eleazar sa aktor na si Jake Cuenca na mananagot ito sa kanyang ginawa matapos na habulin ng mga anti-narcotics operatives sa Mandaluyong City nitong Sabado ng gabi.

“Sa iyong ginawa, titiyakin ko na mananagot ka sa pambabastos mo hindi lang sa mga pulis kundi sa batas at sa kawalan mo ng disiplina sa sarili,” ani Eleazar.

Nangako rin si Eleazar na magsasagawa ng tinatawag na “disciplinary and corrective measures” makaraan na isang delivery rider ang tamaan ng isang stray bullet nang paputukan ng mga operatiba ang SUV ni Cuenca.

Mariin namang sinabi ng PNP chief na ang aktor ay reckless o walang ingat, at kulang sa displina at respeto sa mga awtoridad.

Aniya, bilang isang public figure, dapat na si Cuenca, “set a good example by owning up to his mistake and facing its consequences.”

Si Cuenca ay inaresto matapos na takasan umano sakay ng kanyang SUV ang mga pulis nang banggain nito ang isang police vehicle makaraan ang isang buy-bust operation naman ng pulisya sa Barangay Barangka Sabado ng gabi.

Nai-report din na inararo ng sasakyan ni Cuenca ang isang barrier sa lugar, kung saan ang car chase ay nagresulta sa pagkakatama ng stray bullet sa isang Grab driver.

“Now, I understand the negative sentiments of our kababayan on this issue but let us not forget why this incident happened in the first place: May isang motorista na imbes na humingi ng paumanhin at panagutan ang kanyang pagkakamali ay gumawa ng eksenang pang-teleserye at pampelikula,” sabi ni Eleazar.

Humingi naman ng paumanhin si Eleazar sa Grab driver na nasaktan sa insidente.

“I would like to assure you and your family that we will take care of all the medical expenses of your hospitalization and we shall also extend financial assistance that will also cover the period of your recovery,” wika ng PNP chief.

Iniutos na rin ni Eleazar sa Eastern Police District na isailalim ang mga sangkot na police personnel sa restrictive custody habang patuloy ang imbestigasyon.

“We assure the public that disciplinary measures will be imposed on the personnel involved and corrective measures will be implemented in order to prevent the repeat of this incident,” saad ni Eleazar.