Atong Ang, tutulong na hinggil sa mga missing sabungero – PNP

ni Lolet Abania | February 18, 2022

Nakikipag-ugnayan na ngayon ang pulisya kay gaming tycoon Atong Ang para sa imbestigasyon ng mga nawawalang “sabungero” o tinatawag na cockfighting enthusiasts, ayon kay Philippine National Police (PNP) spokesperson Police Colonel Jean Fajardo.

Sa kanyang interview ngayong Biyernes, sinabi ni Fajardo na sa ginawang imbestigasyon ng Criminal Investigation and Detection Group (CIDG), nabatid na ang mga arena kung saan nawala ang mga indibidwal na nakasali sa cockfighting games o sabong ay pinatatakbo ng WPC na aniya, naiuugnay kay Ang.

“‘Yung CIDG director po, no less than Major General Albert Ferro, ay nakipag-meeting na po kay Ginoong Atong Ang para nga po magbigay linaw dito sa ginagawang investigation,” ani Fajardo.

Ayon kay Fajardo, nangako naman si Ang na tutulong ito sa CIDG sa kanilang imbestigasyon. Aniya, ilan sa mga tauhan ni Ang, kabilang na ang kanyang security personnel, ay nagbigay na ng kanilang accounts sa mga imbestigador.

Sa kapalaran naman ng mga nawawalang sabungero, ayon kay Fajardo hindi pa nila madetermina kung buhay pa o patay na ang mga ito.

“Sa ngayon po, wala po tayong concrete evidence na talagang makakapagsabi kung sila po ba ay buhay o patay. Umaasa pa rin tayo na buhay pa po sila,” sabi ni Fajardo.

Nitong Huwebes, sinabi ni CIDG public information office chief Police Lieutenant Colonel Ramon Sawan na ang bilang ng mga nai-report na nawawalang sabungero ay nasa 29 na sa ngayon.

Mapayapa, sa unang araw ng kampanya — PNP

ni Lolet Abania | February 9, 2022

Mapayapa sa kabuuan ang unang araw ng campaign period para sa lahat ng kandidato na tatakbo sa national positions sa May 9 elections, ayon sa Philippine National Police (PNP).

Sa isang radio interview, sinabi ni PNP spokesperson Police Colonel Jean Fajardo na mayroon lamang na tatlong nai-report na insidente ng karahasan sa Mindanao subalit aniya, wala itong kaugnayan sa eleksyon.

“So far, base po sa mga na-receive nating report, ay generally peaceful naman po ‘yung first day po ng campaign period ng ating mga national candidate,” diin ni Fajardo.

Subalit, ayon kay Fajardo, naobserbahan nila na ang social distancing protocol na itinakda dahil sa panganib pa rin ng COVID-19 ay nilabag sa ilang campaign rallies.

Inamin naman ng opisyal na ang pagpapatupad ng minimum public health standards sa mga campaign rallies ay malaking hamon sa pulisya.

Una nang sinabi ni Fajardo na ipapatupad ng PNP ang maximum tolerance sa pag-iimplementa ng mga election guidelines at COVID-19 health standards sa lahat ng campaign rallies upang maiwasan ang anumang tensyon sa panahon ng nasabing aktibidad.

Aniya, tututukan ng PNP ang pagpapatupad ng election guidelines na itinakda ng Commission on Elections, habang ang mga barangays officials nakatuon naman para tiyakin na nasusunod ang minimum public health standards.

Opisyal na nagsimula nitong Martes, Pebrero 8, ang 90-day official campaign period para sa mga kandidato na tatakbo sa national positions.

Background check sa presidentiables, tuloy-tuloy — PNP

ni Lolet Abania | January 26, 2022

Ipinahayag ng Philippine National Police (PNP) na sila ay nagsasagawa ng “continuous” background check sa lahat ng presidential aspirants kasunod ng naging statement ni Pangulong Rodrigo Duterte sa umano’y corrupt candidate na tatakbo sa 2022 elections.

“Continuous naman po ‘yun,” sabi ni PNP chief Police General Dionardo Carlos sa isang press conference ngayong Miyerkules.

“At the end of the day, we will not jump the gun. We are not directed to name names. We will just do our work. Submit our report to our command line, leadership,” paliwanag ni Carlos.

Sa isang pre-recorded na Talk to the People ng Pangulo na ipinalabas nitong Martes, binanggit ni Pangulong Duterte na ilalantad din niya sa publiko kung sino sa mga presidentiables ang aniya, “most corrupt.” “In due time, I will personally name the candidates, maybe what is wrong with them.

Kailangan malaman ng tao, because you are electing a president,” sabi ng Punong Ehekutibo.

“[I will tell you] kung sino iyong pinaka-corrupt na kandidato. Hindi ako namumulitika. I am talking to you as your president. There are things you must know,” diin pa ni Pangulong Duterte.

Sa naunang pahayag, inakusahan ni Pangulong Duterte ang isang hindi pinangalanang kandidato na aniya ay isang cocaine user. Ayon kay Carlos, wala pa rin silang ebidensiya na susuporta sa pahayag ng Pangulo.