P1 B halaga ng shabu, nakumpiska, ‘drug kingpin’, 1 pa arestado

ni Lolet Abania | March 9, 2022

Arestado ang umano’y drug kingpin at kasamahan nito, matapos makakumpiska ang mga awtoridad ng P1 bilyong halaga ng hinihinalang shabu sa isang operasyon sa Valenzuela City nitong Martes.

Sa isang statement ngayong Miyerkules ng Philippine National Police (PNP), ipinahayag nitong nagsagawa ang kanilang mga tauhan at mga ahente ng Philippine Drug Enforcement Agency (PDEA) ng isang joint buy-bust operation sa Barangay Karuhatan.

Kinilala ang mga naarestong suspek na sina Tianzhu Lyu, 32-anyos, ng Fujian, China, at Meliza Villanueva, 37-anyos, ng Concepcion, Tarlac.

Nasamsam ng mga awtoridad ang humigit-kumulang sa 160 kilos ng hinihinalang shabu na nagkakahalaga ng P1.088 bilyon.

Nakuha rin mula sa mga suspek ang apat na smartphones, isang basic analog phone, isang weighing scale, iba’t ibang identification cards, at isang bundle ng mga dokumento.

Ayon sa pulisya, ang dalawang nadakip na suspek ay kilalang drug dealers sa mga lugar sa Metro Manila, Central Luzon, at Calabarzon.

Nahaharap ang mga suspek sa kasong paglabag sa Republic Act 9165 o ang Comprehensive Dangerous Drugs Act of 2002 na isasampa laban sa kanila.

“The PNP vows to sustain with vigor anti-illegal drug police operations with a greater focus on high-value targets engaged in trafficking and distribution of illegal drugs, of course, in coordination with PDEA, to help boost the government’s campaign for criminal justice,” sabi ni PNP chief Police General Dionardo Carlos.

PNP Chief: ‘Walang katotohanang pumunta ako sa Balesin Island para makipagkita sa mga Ongpin’

ni Jasmin Joy Evangelista | February 24, 2022

Sinagot ni Philippine National Police (PNP) chief Gen. Dionardo Carlos nitong Miyerkules ang isyu hinggil sa pagpunta niya sa luxurious Balesin Island upang makipagkita umano sa mga Ongpin.

“There is NO TRUTH to the reported claim of the Jonson camp that I went to the island to meet the Ongpins to discuss the case of Julian Ongpin,” ani Carlos sa isang pahayag.

“The Julian Ongpin case was dismissed and is on appeal (MR). The DOJ (Department of Justice) and the NBI (National Bureau of Investigation) have been handling the parallel investigation, long before I was appointed as Chief of the Philippine National Police.”

“Any insinuation or attempt to link me to the Ongpin family is unfounded and baseless,” dagdag niya.

Noong Martes, sinabi ni Carlos na nagtungo siya sa Balesin Island para sa kanyang “private time” kung saan susunduin sana siya ng H125 Airbus helicopter ng PNP sa naturang exclusive, members-only, world-class recreational destination na pagmamay-ari ng pamilya ni Julian Ongpin, ang person of interest sa pagkamatay ng artist na si Bree Jonson.

Ang naturang police chopper ay nag-crash sa Quezon province habang patungo ito sa Balesin Island noong Lunes ng umaga kung saan nasawi ang isang police patrolman habang sugatan naman ang dalawang police officer.

Si Julian Ongpin, anak ng tycoon at Marcos-era trade minister na si Roberto Ongpin, ay nobyo umano ni Jonson at huling nakakita na buhay ito.

Inabsuwelto ng PNP si Julian Ongpin noong December 2021 matapos lumabas sa imbestigasyon na “yielded no sign of foul play.”

Election gun ban violators umabot na sa 1,309 — PNP

ni Jasmin Joy Evangelista | February 23, 2022

Umabot na sa 1,309 ang bilang ng election gun ban violators mula nang magsimula ito noong Jan. 9, ayon sa Philippine National Police (PNP).

Kabilang dito ang 1,266 na mga sibilyan, 10 police officers, 8 military personnel, 14 security officers, at 11 other “uncategorized” violators, ayon sa PNP.

Nasa kabuuang 993 firearms ang nakumpiska kasama ang 5,904 ammunition at 479 deadly weapons batay sa report nitong Martes.

Sinabi rin ng PNP na ang mga pag-aresto ay naganap sa Metro Manila (399), Calabarzon (134), Central Visayas (124), Zamboanga Peninsula (95), at Western Visayas (82).

Sa hiwalay na pahayag, sinabi ni national police chief Gen. Dionardo Carlos na nitong Pebrero 22 ay nakapagsagawa na ng 1,185 operations upang ipatupad ang gun ban bago ang general elections sa May 9.

“These accomplishments reflect the level of commitment and dedication of our PNP personnel in our tireless pursuit of a reformed electoral process free from violence and corruption,” ani Carlos.

“Since the onset of nationwide gun ban, PNP persistently reminded the public especially our firearms holder to strictly adhere with the existing COMELEC policy in order to maintain safe, honest, and peaceful elections on May 9, 2022,” dagdag niya.

Ipinatupad ng Commission on Elections (Comelec) ang nationwide gun ban para sa national at local elections hanggang June 8 ng taong ito.