Longpost yakap ang biktima ‘di pinansin... Drayber na nanghataw ng baseball bat sa senior, kinasuhan

ni Zel Fernandez | April 27, 2022

Sinampahan na ng kaso ng Las Piñas PNP, ang suspek na nanghataw ng baseball bat sa isang senior citizen matapos ang alitan sa kalsada, noong Linggo.

Batay sa report, Abril 24 nang mangyari ang insidente sa pagitan ng biktimang si Julian Adlao, Jr. at suspek na si Gerson Gonzales, nang businahan ng senior citizen ang minamanehong sasakyan ng huli sa kahabaan ng Marcos Alvarez Avenue na nauwi sa road rage.

Ayon kay Col. Jaime Santos, chief of police ng Las Piñas Police Station, “Hindi excuse ‘yung nakita natin sa Facebook o sa social media na inakap si Mr. Julian Adlao ni Mr. Gerson Gonzales. Sa katunayan nga nagkaproblema dahil ‘yung ibinigay niyang address sa Vehicular Traffic Investigation Unit ay hindi niya totoong address. Kaya nilalaliman po namin ang aming imbestigasyon at nalaman namin ‘yung tunay na address niya dahil na rin sa tulong ng mga mamamayan.”

Dagdag ni Santos, “at sinabi ko sa mga imbestigador po natin, kailangan ngayon matapos ‘yung statement taking... ‘wag na kayong pumunta sa substation n’yo, dito n’yo na kunan si Mr. Adlao ng statement. Dahil ang utos ng ating district director Police Brigadier General Jimili Macaraeg ay i-file natin ‘yung kaso the soonest possible time.”

Aniya, sa isinampang kaso sa Las Piñas City Prosecutor’s Office, mananagot si Gonzales sa salang physical injury na pinaniniwalaang malakas ang laban dahil mayroong tumayong testigo upang patotohanan ang reklamo ng biktima.

Bukod aniya sa pahayag na nakuha sa testigo, sapat nang ebidensiya ang video ng insidente na suportado naman ng medico legal report na pirmado ng attending physician ng Las Piñas General Hospital.

Giit ng kolonel, kung hindi sisipot sa hearing ang suspek ay maglalabas na ng warrant of arrest, kasunod ang subpoena. Pagtitiyak pa ng opisyal, sakali umanong tumakas si Gonzales ay magkakaroon na ng karapatan ang mga kapulisan na dakpin ang suspek saanman ito mahuli ng mga awtoridad.

3 hackers na nagbebenta raw ng 2022 elections win sa mga kandidato, arestado – PNP-ACG

ni Lolet Abania | April 26, 2022

Tatlong hackers ang inaresto ng mga awtoridad dahil sa umano’y pagbebenta ng tiyak na panalo o ‘sure win’ ng mga kandidato para sa 2022 elections, ayon sa Philippine National Police-Anti-Cybercrime Group (PNP-ACG) ngayong Martes.

Nadakip ng PNP-ACG kasama ang Cybercrime Investigation and Coordinating Center (CICC) ang mga suspek sa ikinasang magkahiwalay na entrapment operations sa Imus, Cavite at Sta. Rosa, Laguna noong Abril 23.

“CICC together with the PNP-ACG conducted an entrapment operation in Imus, Cavite, and Sta. Rosa, Laguna against notorious hackers named ‘XSOX Group’,” batay sa PNP-ACG sa isang statement.

Kinilala ang mga naarestong suspek na sina Joel Adajar Ilagan o “Borger”; Adrian De Jesus Martinez o “Admin X”, at Jeffrey Cruz Limpiado o “Brake/Vanguard/Universe/LRR”.

Ayon sa mga awtoridad, ang mga suspek ay kini-claim umano na may access sila sa system ng Smartmatic Inc., ang system provider para sa automated 2022 elections, at maaaring makaimpluwensiya sa resulta ng May 9 polls.

Base sa initial findings, ang mga suspek umano ay lumabag sa Cybercrime Prevention Act of 2012 na may sumusunod na acts:

• hacking of Smartmatic system;

• disrupting the Comelec website;

• hacking the Napocor website;

• hacking of credit cards and other online transactions;

• ransomware committed against some local commercial websites

Sa tulong ng Department of Justice (DOJ) at ng National Prosecution Service (NPS), ayon sa PNP-ACG, nagsampa na ng criminal cases laban sa mga suspek sa paglabag sa Cybercrime Prevention Act of 2012, partikular sa system interference, illegal access, at attempt sa commission of cybercrime.

“With these arrests, we can assure the public that the threat to rig our electoral process through hacking is substantially diminished as these are the only remaining known hackers who are persistently visible on the dark web claiming that they can manipulate election results,” dagdag pang pahayag.

Sa ginanap na press conference ngayong Martes, sinabi ni CICC Executive Director Cezar Mancao II na ang mga operatiba ay nagkaroon na ng tatlong meetings sa mga suspek.

“In fact, nagkaroon ng three meetings. Una, doon sa Solaire, pangalawa doon sa EDSA Shangri-La Hotel, pangatlo doon sa Pansol, Laguna. Hindi nila alam ang kanilang mga kausap ay mga CICC operatives,” saad ni Mancao.

Ani Mancao, nagpanggap ang mga operatiba bilang mga personnel ng ilang politicians, kung saan nangangailangan ng tulong ng mga hacker para ‘dayain’ ang resulta ng May 9 elections. Ang mga suspek ay nakatanggap ng inisyal na P10 million mula sa P16 million na kabayaran na kanilang hinihingi.

Sinabi ni Mancao na ang mga naturang hackers ay totoong may access sa Smartmatic system subalit sa loob lamang ng partial levels.

Ayon kay Mancao, “The three suspects are connected with former Smartmatic employee Ricardo Argana who initially surrendered to the NBI and went into hiding.”

“Argana supposedly passed the access to the Smartmatic system to Limpiado,” ani Mancao.

Sinabi pa ni Mancao na ang mga suspek ay nagkaroon ng mga contacts sa ilang election candidates sa mga probinsiya subalit tumanggi siyang banggitin ang mga pangalan.

20 private armed groups, nabuwag ng PNP

ni Lolet Abania | April 26, 2022

Humigit-kumulang sa 20 private armed groups (PAG) ang nalansag ng Philippine National Police (PNP) bago pa ang May 2022 elections.

Sa isang interview ngayong Martes, sinabi ni PNP spokesperson Police Colonel Jean Fajardo na karamihan sa 20 PAGs ay mula sa Bangsamoro at bahagi ng local terrorist groups.

“More or less nasa 20 na po ‘yung ating na-dismantle, na-disband, at na-delist po doon sa listahan natin ng mga private armed group,” sabi ni Fajardo.

Ayon kay Fajardo, ilang mga politicians ang umano’y nagha-hire ng naturang PAG members kaugnay sa isinasagawa ng mga ito sa eleksiyon.

Kung may sapat na silang ebidensiya, sinabi ni Fajardo na magsasampa ang PNP ng mga reklamo laban sa mga nasabing politicians na nag-e-employ ng mga PAGs.

Binanggit pa ni Fajardo na ang National Task Force for the Disbandment of Private Armed Groups ay nakatakdang mag-isyu ng official resolution para i-delist ang tatlong natitirang aktibong pre-identified PAGs.

Matatandaan noong Abril 18, nagbabala si Pangulong Rodrigo Duterte sa mga kandidato sa 2022 elections na ang pagkakaroon ng mahigit sa dalawang body guards, aniya, ay nangangahulugan na bumubuo ng pagpapanatili ng private army, kung saan salungat ito sa election laws ng bansa.

“We have decided and have communicated this with the Cabinet... The rule should really be followed… that more than two bodyguards would be considered a private army,” saad ni Pangulong Duterte.

“And if you think there is danger to your person, a certain place or person, ipatawag ng RD ‘yan, ipatawag ng chief of police at kausapin. Maiwasan ‘yung away lalo na ang paggamit ng armas,” dagdag ng pangulo.