Attempted murder, malicious mischief, at alarms and scandal... Top 9 Most Wanted ng Malabon, timbog!

ni Zel Fernandez | April 30, 2022

Matagumpay na naaresto ng Malabon City Police ang Top 9 Most Wanted sa lungsod kasunod ng ikinasang operasyon sa Gov. Pascual, Brgy. Catmon, Malabon.

Sa bisa ng isang arrest warrant, nadakip ang most wanted na sindikato sa katauhan ni Renato Lapedario, Jr., 29-anyos na residente ng nasabing barangay.

Kaugnay nito, ang arrest warrant laban kay Lapedario ay may kasong attempted murder, malicious mischief, at alarms and scandal na ihinain ni Presiding Judge Catherine Tagle-Salvador ng Malabon City RTC Branch.

Mapayapa naman ang pagkakaaresto sa suspek na kasalukuyan nang nakapiit sa NPD Custodial Facility.

DILG: 41K police personnel, itinalaga sa mga Comelec checkpoints

ni Lolet Abania | April 29, 2022

Mahigit sa 41,000 police personnel ang nakatakdang italaga sa mga checkpoints sa buong bansa para i-secure ang pagsasagawa ng May 9 elections, ayon sa Department of the Interior and Local Government (DILG) ngayong Biyernes.

Sa Laging Handa public briefing, sinabi ni DILG spokesperson Undersecretary Jonathan Malaya na ito ay karagdagan sa 16,820 pulis na na-designate para sa kanilang tungkulin sa eleksyon.

“Mayroon tayong nakatalagang 16,820 na mga PNP personnel for election duties. May karagdagang 41,965 personnel na nakatalaga sa 5,431 checkpoints sa buong bansa,” ani Malaya.

Ayon pa kay Malaya, na ang dalawang mga mobile forces ay nakatuon sa bawat probinsiya para sa seguridad sa araw ng eleksyon.

2 kandidato para sa acting PNP chief, isinumite kay P-Du30 – DILG

ni Lolet Abania | April 29, 2022

Ipinahayag ni Department of Interior and Local Government (DILG) Secretary Eduardo Año ngayong Biyernes na naisumite na niya kay Pangulong Rodrigo Duterte ang mga pangalan ng dalawang kandidato para sa posisyon ng acting Philippine National Police (PNP) chief.

Sa isang radio interview, sinabi ni Año na kinonsidera niya rito ang seniority at kakayahan ng mga ito sa pagpili ng mga kandidato para sa posisyon. Subalit, hindi niya tinukoy ang mga pangalan ng dalawang police officials.

“Nakapag-submit na ako ng aking recommendation last Tuesday sa ating Pangulo,” ani Año.

“Two senior police officials ang pangalan na ibinigay namin at maaaring mamili ang pangulo kung sino ang itatalaga niya dito pero ito ay in an acting capacity lang o OIC lang,” dagdag ng opisyal.

Batay sa Article 7 Section 15 ng Constitution, ayon kay Año, ang presidente ay maaari lamang mag-atas ng temporary appointments sa loob ng 60 araw bago ang national elections.

Binanggit din ni Año, na kay Pangulong Duterte na kung ikokonsidera nito ang kanyang rekomendasyon.

Nauna rito, tiniyak ng PNP sa publiko na maaari nilang i-secure ang 2022 elections, kahit na magpalit pa ng kanilang pamumuno isang araw bago ang Election Day.

Kaugnay nito, nakatakdang magretiro si PNP chief Police General Dionardo Carlos sa Mayo 8, 2022, isang araw bago ang national at local elections, kung saan umabot siya sa kanyang mandatory retirement age na 56.

Si Carlos ay na-appoint bilang PNP chief, ang ika-7 sa ilalim ng Duterte administration, noong Nobyembre 12, 2021.