Pulis kada iskul, ‘di kakayanin

ni Christina Cla-or (UCC-OJT) @News | June 24, 2026

Photo: Makikita sa larawan ang mahigpit na pagbabantay ng mga miyembro ng Manila Police District Special Weapons and Tactics (MPD-SWAT) sa mga paaralan sa Lungsod ng Maynila kasunod ng madugong insidente ng pamamaril sa loob ng isang paaralan sa Tacloban City. (Jeff Tumbado)

Hindi kakayaning makapagtalaga ng mga pulis sa lahat ng paaralan sa bansa kasunod ng insidente sa Tacloban City, ayon sa Philippine National Police (PNP).

Kahit na nauna nang iniutos ang mas pinaigting na pagpapatrol at pagpapadala ng mga pulis, hindi pa rin umano ito sapat dahil sa lawak ng sakop na umaabot sa humigit-kumulang 50,000 eskwelahan sa buong bansa.

Dahil dito, ipinaliwanag ng mga otoridad na strategic deployment ang kanilang ipinatutupad kung saan nakatuon ang mga pulisya sa mga lugar na mas mataas ang panganib at higit na nangangailangan ng seguridad.

Kasabay nito, mas pinalalakas din ng PNP ang koordinasyon sa mga lokal na pamahalaan, barangay, at iba pang ahensya upang mas mapalakas ang seguridad sa mga paaralan.

Krimen, parami nang parami... 12-anyos, puwede nang kasuhan, oks sa PNP

ni Mylene Alfonso @News | June 24, 2026

Photo: Tacloban City Fire Station

Suportado ng Philippine National Police (PNP) ang panukalang ibaba ang edad ng criminal liability sa bansa, kasabay ng pagdami ng mga kabataang Pilipinong nasasangkot sa krimen.

Sinabi ni PNP spokesperson Col. Allen Rae Co na pabor sila na ibaba sa 12 ang edad ng criminal liability.

“The PNP is supporting the lowering of the age of criminal liability. We are thinking, 12 years old,” wika ni Co sa press briefing sa Palasyo.

“Hindi naman lingid sa kaalaman n’yo na nagkakaproblema na po tayo. As a matter of fact, we studied the data. ‘Yung statistics po natin medyo tumataas ‘yung naiinvolved na CICL (Child in Conflict of the Law) kaya sa amin ay titingnan mo naman, if they acted with discernment, hindi mo naman arbitrarily na kasama nila. Titingnan din kung alam nila ang kanilang ginagawa,” aniya.

Nabatid na sa Pilipinas, 15 taong gulang ang minimum age of criminal liability, na nangangahulugan na ang mga indibidwal na 15 taong gulang at isang araw pataas na napatunayang kumilos nang may discernment o sapat na pag-unawa sa kanilang ginawa ay maaaring sumailalim sa naaangkop na mga paglilitis sa korte.

Isa sa dalawang suspek sa insidente ng pamamaril sa Tacloban ay higit sa 15 taong gulang.

Dahil dito, siya ay sasailalim sa regular trial alinsunod sa umiiral na batas.

“Malinaw naman po sa batas natin na 'yung above 15 years old, siya po ay mag-undergo at most probably makikita ng DSWD (Department of Social Welfare and Development) na he acted with discernment at siya po ay a-undergo ng regular trial, formal trial, but of course while observing yung child protection protocols,” paliwanag ni Co.

Samantala, ang 14-anyos na suspek ay obligadong isailalim sa isang child protection facility ng Department of Social Welfare and Development (DSWD) para sa child protection at rehabilitasyon.

Kaugnay nito, inihayag ng Palasyo na wala pa itong opisyal na posisyon sa panukalang pagbaba ng edad ng criminal liability, ngunit bukas si Pangulong Bongbong Marcos sa mga ganitong mungkahi.

Internal cleansing, anti-crime drive sa PNP

ni Mylene Alfonso @News | June 11, 2026

Photo: PNP

Patuloy ang pagpapatupad ng reporma at kampanya laban sa kriminalidad ng Philippine National Police (PNP) sa ilalim ng pamumuno ni Police General Jose Melencio C. Nartatez Jr. 

Kabilang umano sa mga naging pangunahing hakbang ng PNP ang pag-aresto sa nahatulang dating pulis na si Rafael Dumlao III kaugnay ng kaso ng pagdukot at pagpatay sa South Korean businessman na si Jee Ick Joo. 

Pinaigting din ng organisasyon ang paglilinis sa sariling hanay matapos mapatawan ng parusa ang mahigit 1,500 pulis. 

Sa kampanya laban sa droga, naitala rin ang pagkakahatol sa isang Canadian national na sangkot sa pagkakasamsam ng tinatayang 1.4 toneladang shabu na nagkakahalaga ng P9.68 bilyon sa Batangas. 

Samantala, tumulong din ang libu-libong pulis sa search and rescue operations, pamamahagi ng ayuda, at pagbabantay sa mga evacuation center nang tumama ang magnitude 7.8 na lindol sa ilang bahagi ng Mindanao. 

Ayon sa PNP, bahagi ang mga hakbang na ito ng pagpapatibay ng pananagutan, propesyonalismo, at serbisyo sa publiko sa ilalim ng programang “Bagong PNP para sa Bagong Pilipinas.”