8,288 barangay, apektado pa rin ng droga — PNP

ni BRT | June 26, 2023

Nasa sa Philippine National Police (PNP), nagpapatupad na ng mga strategic measure para malinis ang mga ito.

Sinabi ni PNP Chief General Benjamin Acorda, na matagumpay na nalinis na mula sa droga ang nasa 76.67% ng 35,356 na apektadong mga barangay mula sa kabuuang mahigit 42,000 barangay sa buong bansa.

Sa mahigit 35,000 barangay na cleared na, 27,248 dito ay ganap nang nalinis mula sa ilegal na droga.

Napag-alaman na pinakamalaking bilang ng drug-cleared ay sa Calabarzon na nasa 97.06%, sinundan ito ng Cagayan Valley region na nsa 95.55% at Cordillera region na nasa 95.22%.

Nasa 94.52% naman ang drug clearance rate sa Eastern Visayas habang sa Central Mindanao ay nasa 89.37%.

Shootout sa pag-aresto sa Sulu Ex-Vice Mayor, 5 todas

ni Mai Ancheta | June 26, 2023

Lima katao ang nasawi kabilang na ang isang tauhan ng Philippine National Police-Special Action Force (PNP-SAF) habang 14 ang nasugatan matapos magkasagupa ang mga tauhan ng dating bise alkalde sa Maimbung, Sulu at mga operatiba ng PNP at

Armed Forces of the Philippines (AFP) nitong Sabado.

Ayon kay Maimbung Municipal Police Station OIC Chief Captain Naljir Asiri, apat sa mga tauhan ni dating Maimbung Vice Mayor Pando Mudjasan ang nasawi at isang miyembro ng PNP-SAF, habang 12 pulis at sundalo ang nasugatan at kasamang nadamay ang dalawang sibilyan matapos maipit sa bakbakan.

Sisilbihan sana ng warrant of arrest ang dating bise alkalde na wanted umano sa mga kasong pagpatay sa Barangay Bualo Lipid, subalit agad na nagpaputok ang kanyang mga tauhan.

Sinabi ni Capt. Asiri na bina-validate pa nila ang ulat na may mga nasugatang tauhan si Mudjasan subalit tumakas ang mga ito kasama ang wanted na dating bise alkalde.

Kabilang sa mga nakaengkwentro ng mga suspek ay pinagsamang puwersa ng PNP-Criminal Investigation and Detection Group Region 9, PNP-SAF at 41st Infantry Battalion.

Dahil sa insidente ay napilitang lumikas ang mga residente sa takot na madamay at maipit sa bakbakan.

Sinabi ni Asiri na humuhupa na ang tensyon at unti-unting nagbalikan na ang mga residente.

Sangkot sa P6.7B shabu.. 50 pulis, tinuluyan sa Ombudsman

ni Mai Ancheta | June 14, 2023

Kinasuhan sa Office of the Ombudsman ang 50 personnel ng Philippine National Police (PNP) kabilang na ang dalawang heneral at isang colonel na isinangkot sa 990 kilo ng shabu na nagkakahalaga ng P6.7 bilyon noong October 2022.

Sa press briefing ni Department of Interior and Local Government (DILG) Secretary Benhur Abalos, sinabi nitong ang National Police Commission (Napolcom) at PNP ang nagsampa ng kaso laban sa 50 police personnel.

Ayon kay Abalos, 48 mula sa 50 kinasuhan ay nakita sa CCTV video habang ang dalawang opisyal ay sinampahan din ng kaso dahil umano sa pakikipagsabwatan o conspiracy.

Kabilang sa mga kasong isinampa laban sa 50 PNP personnel ay paglabag sa Republic Act No. 3091o Anti-Graft and Corrupt Practices Act; falsification of documents; false testimony; malversation of private property; at obstruction of justice.

Pinangalanan ni Napolcom Vice Chairperson Alberto Bernardo ang ilan sa mga kinasuhan na sina PLt. Gen. Benjamin Santos, Jr., PBGen. Narciso Domingo at PCol. Julian Olonan.

Bukod sa kasong kriminal, nahaharap din ang 50 PNP personnel sa kasong administratibo at nakumpleto na ang pre-charge investigation laban sa mga ito.

Inaasahang ilalabas ng Napolcom ang kanilang resolusyon sa loob ng 15 araw.

Kabilang sa kasong administratibo na kinakaharap ng 50 police personnel ay grave misconduct, gross neglect of duty, serious irregularity in the performance of duty at dishonesty.

Sinabi ng Napolcom na kapag napatunayang guilty ang mga ito, masisibak sila sa serbisyo at walang makukuhang benepisyo ang mga ito at hindi na maaaring makapagtrabaho sa alinmang tanggapan ng gobyerno