Child Car Seat law at private motor vehicle inspection, stop muna – P-Duterte

ni Lolet Abania | February 11, 2021

Ipinag-utos ni Pangulong Rodrigo Duterte ang pagpapatigil ng implementasyon ng Child Car Seat law at ang mandatory private motor vehicle inspection, ayon kay Presidential Spokesperson Harry Roque, Jr..

“'Yan po ang desisyon ng Presidente, binalanse po niya dahil nga sa pinagdaraanan na krisis na COVID-19,” sabi ni Roque sa Palace briefing ngayong Huwebes.

Nauna nang inanunsiyo ng Department of Transportation (DOTr) ang pagpapaliban ng Child Car Seat law, kung saan ipinatigil muna ng ahensiya ang polisiya para sa pagkakaroon ng car seat sa mga batang edad 12 at pababa na nakasakay sa mga pribadong sasakyan dahil sa naantalang mga guidelines kung paano ipatutupad ito sa gitna ng COVID-19 pandemic.

Ayon sa mga industriya ng automotive, tinatayang nagkakahalaga ang child car seat ng P3,000 hanggang sa P30,000.

Nanawagan din ang mga senador para sa pagbasura sa na-roll out na 138 private motor vehicle inspection centers (PMVIC) sa buong bansa na mayroong ipinatutupad na inspection fee na P1,800 mula sa mga sasakyan na may bigat na 4,500 kgs o mas mababa pa rito.

Sakaling ang isang behikulo ay hindi makapasa sa test, kinakailangang sumailalim sa mga angkop na repairs ang sasakyan saka muling babalik sa private inspection centers, kung saan ang isang motorista ay magbabayad ng dagdag na P900 reinspection fee para makakuha ng clearance. Kinuwestiyon naman nina Senadora Grace Poe at Senador Ralph Recto ang integridad ng naturang sistema. Anila, dagdag na pahirap ito sa marami dahil sa hindi malinaw na proseso, labis na bayad na kaduda-duda at ang pagpapatupad ng polisiya na walang tamang konsultasyon sa publiko.

Suspensiyon sa PMVIC, isinusulong ni Poe

ni Mary Gutierrez Almirañez | February 10, 2021

Patuloy pa ring nananawagan sa suspensiyon ng Private Motor Vehicle Inspection Centers (PMVIC) si Senator Grace Poe, kasama ang iba pang senador, kung saan halos triple ang itinaas ng babayaran para makapagparehistro ng sasakyan dahil sa ipinapatupad ngayong Motor Vehicle Inspection System (MVIS).

Lumabas pa sa pagdinig na 138 lang ang gagawing Motor Vehicle Inspection Centers, gayung labingdalawang milyong sasakyan mayroon ang buong bansa. Sa 138 na ito ay 23 pa lang ang bukas na sa ngayon.

Ayon sa panayam kay Poe, magandang programa ang motor vehicle inspection service dahil sa road worthiness at seguridad ng mga motorista. Ang problema, hindi sila dumaan sa tamang bidding process na kailangan sa public – private partnership. May mga kuwestiyonableng pagdinig sa pagitan ng DOTr at LTO kung saan hindi nakadalo ang mga lider ng iba’t ibang adbokasiya. Kaya, wala diumano sa tamang oras ang pagpapatupad ng taas-presyong singil sa mga pribadong motorista mula P400.00 - P500.00 hanggang P1,500.00 – P1, 800.00 lalo na’t nasa pandemya pa rin ang bansa.

Tanong naman ni Sen. Ralph Recto, mayroon bang batas na pinapayagan ang LTO na isapribado ito nang biglaan? Kailangan ding dumaan sa National Economic Development Authority (NEDA) kung magtataas sila ng singil.

Ngunit ang pahayag ng LTO, hindi nila iyon ipinaalam sa NEDA at nagbase lang sila sa konsultasyon na ginawa ng LTO sa iba’t ibang sektor.

“'Yung mga taong nanonood ngayon, iisiping ito’y isang malaking raket,” giit naman ni Senator Joel Villanueva. “Kaya marapat na ito ay immediately i-suspend muna at pag-aralang mabuti.”

Sa susunod na linggo, isusumite ni Poe ang report hinggil sa pagsususpinde sa Private Motor Vehicle Inspection Centers (PMVIC).