Volcanic quakes at tremors umabot nang 5-7 minuto... Bulkang Taal, muling nagparamdam – PHIVOLCS

ni Zel Fernandez | April 30, 2022

Muli na namang nakapagtala ang Philippine Institute of Volcanology and Seismology (PHIVOLCS) ng aktibidad mula sa Bulkang Taal sa nakalipas na magdamag.

Batay sa datos ng PHIVOLCS, mayroong 6 volcanic quakes at 5 volcanic tremors na naitala ang bulkan na umabot nang 5 hanggang 7 minuto.

Tinatayang aabot naman sa 12,943 toneladang asupre o sulfur dioxide flux ang ibinuga umano ng bulkan mula kahapon, Abril 29.

Gayundin, namataan din sa Bulkang Taal ang may katamtamang pagsingaw o plume na may 900 metro ang taas at napadpad sa Kanluran-Hilagang Kanluran, maging sa Kanluran-Timog Kanluran.

Samantala, bagaman nananatili pa ring nasa Alert Level 2 ang Bulkang Taal, patuloy ang paalala ng mga awtoridad na bawal pa rin ang pagpasok sa Volcano Island at pinaghahanda pa rin ang mga nakapaligid dito anumang oras na maging aktibo muli ang bulkan.

Davao Oriental, niyanig ng magnitude 6.2 lindol

ni Lolet Abania | April 21, 2022

Niyanig ng magnitude 6.2 na lindol ang Manay, Davao Oriental ngayong Huwebes ng umaga, ayon sa Philippine Institute of Volcanology and Seismology (PHIVOLCS).

Sa report ng PHIVOLCS, alas-5:57 ng madaling-araw naitala ang pagyanig na tectonic ang pinagmulan habang may lalim ito na 58 kilometro.

Ayon sa PHIVOLCS, walang naitalang pinsala sa mga imprastraktura dahil sa lindol at aftershocks. Gayundin, ini-report ng Reuters na base sa US Tsunami Warning System, walang naganap na tsunami warning matapos ang pagyanig.

Samantala, ayon sa Municipal Disaster and Risk Reduction Management Office (MRRMO), isang paaralan sa Manay, Davao Oriental ang nagkaroon ng mga cracks matapos ang naganap na magnitude 5.3 na lindol nitong Miyerkules ng hapon.

“Meron kaming nakita na mga cracks din sa walls ng aming paaralan sa Barangay San Ignacio (We saw some cracks on the walls of our school in Barangay San Ignacio),” sabi ni MDRRMO head Cesar Camingue sa isang interview ngayong Huwebes.

Ayon kay Camingue, ininspeksyon na ng Provincial Disaster and Risk Reduction Management Office (PDRRMO) ang napinsalang eskuwelahan, kung saan aniya, isang klasrum lamang ang idineklarang off limits sa ngayon.

Sinabi naman ni Camingue na wala silang na-monitor na anumang senyales ng posibleng tsunami nang kanilang itsek ang mga coastal areas ng Manay matapos ang lindol. Binanggit din ng opisyal na ang naturang bayan ay nakaranas ng maraming pagyanig nitong nakalipas na tatlong araw.

Davao Oriental, niyanig ng magnitude 5.3 na lindol

ni Lolet Abania | April 20, 2022

Niyanig ng magnitude 5.3 na lindol ang Manay, Davao Oriental ngayong Miyerkules nang hapon, ayon sa Philippine Institute of Volcanology and Seismology (PHIVOLCS).

Sa ulat ng PHIVOLCS, alas-5:07 ng hapon, naitala ang lindol kung saan tectonic ang pinagmulan.

Ang epicenter ng pagyanig ay matatagpuan sa layong 06.30°N, 127.18°E - 123 km S 35° E ng Manay, Davao Oriental. Habang may lalim ang lindol ng 70 kilometro.

Ayon sa PHIVOLCS, wala namang nai-record na napinsala at aftershocks matapos ang lindol.