302 pagyanig sa isang araw, naitala sa Bulkang Taal

ni Ronalyn Seminiano Reonico | March 27, 2021

Nakapagtala ang Philippine Institute of Volcanology and Seismology (PHIVOLCS) ngayong Sabado ng 302 volcanic earthquakes sa nakalipas na 24 oras sa Bulkang Taal at nananatiling nakataas ang Alert Level 2 dito.

Sa naturang bilang, 184 ang volcanic tremors na tumagal nang hanggang 12 minuto at 118 low-frequency volcanic earthquakes.

Naitala rin ang emission ng steam-laden plumes mula sa fumarolic vents na tumaas nang hanggang 30 metro mula sa main crater ng Taal.

Nai-record din ng PHIVOLCS ang average na 925 tonnes/day ng sulfur dioxide emission at patuloy pa rin ang obserbasyon sa abnormalidad ng bulkan.

Saad pa ng PHIVOLCS, “DOST-PHIVOLCS reminds the public that at Alert Level 2, sudden steam-driven or phreatic explosions, volcanic earthquakes, minor ashfall, and lethal accumulations or expulsions of volcanic gas can occur and threaten areas within and around TVI (Taal Volcano Island).”

Naka-alert level 2 pa rin 175 volcanic earthquakes sa 1 araw, naitala sa Taal

ni Ronalyn Seminiano Reonico | March 20, 2021

Nakapagtala ng 175 volcanic earthquakes sa Taal Volcano ang Philippine Institute of Volcanology and Seismology (Phivolcs) sa loob lamang ng nakalipas na 24 oras.

Ayon sa Phivolcs, umabot din sa 80 hanggang 100 meter ang taas ng bawat steam-laden plumes galing sa crater ng bulkan at 131 tremors ang naitala na tumagal ng isa hanggang 15 minuto.

Nananatili namang nakataas ang Alert Level 2 at bukod sa volcanic earthquakes, nagbabala rin ang Phivolcs sa minor ash fall.

Nagpaalala rin ang Phivolcs sa lokal na pamahalaan at sa publiko na manatiling handa at huwag lalapit sa permanent danger zone.

Inabisuhan din ng Phivolcs ang mga piloto na huwag lumipad malapit sa bulkan dahil sa abo at mga fragments na inilalabas ng Taal Volcano.

98 pagyanig naitala, mga taga-Taal, pinalikas na

ni Lolet Abania | February 16, 2021

Nagpatupad na ng forced evacuation ang Municipal Disaster Risk Reduction and Management Office (MDRRMO) ng Agoncillo, Batangas sa isla ng Taal Volcano matapos maiulat ang pagdami ng seismic activities sa paligid ng nasabing lugar.

“Puwersahan pong pinalilikas ang mga taong nasa pulo at mahigpit pa rin pong ipinagbabawal sa ating mga kababayan ang paglapit at manatili sa mismong isla dahil sa nakaambang panganib,” pahayag ng Agoncillo MDRRMO sa Facebook post.

“Pinapayuhan pa rin po ang publiko na ibayong pag-iingat at maging alerto, handa sa lahat ng oras. Ipagdasal po natin na sana ay huwag nang lumala pa ang sitwasyon at kalagayan ng ating mahal na Bulkang Taal,” dagdag pa ng ahensiya.

Ayon kay Easha Mariano, media liaison officer ng National Disaster Risk Reduction and Management Council, nakatanggap sila ng impormasyon na ang mga residente mula sa dalawang sitio sa bayan ng Talisay ay pinalilikas na.

“We received initial info na ongoing ang evacuation sa mga residenteng nasa Taal Volcano mismo na dapat no man's land kaya kailangan silang palikasin. Ang mga pinapalikas ay mula sa dalawang sitio ng Municipality of Talisay,” ani Mariano sa mga reporter.

“This order is for precautionary measure done in line with the recent activities of the volcano pero hindi 'nag-aalburoto' po ang Taal,” sabi pa ni Mariano.

Nananatili naman na nasa Alert Level 1 ang Taal Volcano.

Ayon naman sa Philippine Coast Guard spokesperson na si Commander Armand Balilo, ang mga kawani ng Coast Guard Batangas, Talisay Police at MDRRMO ay nasa lugar na upang siguruhin ang kaligtasan ng mga residente.

“Upon signal from the Municipal Administrator of Talisay, Batangas, joint elements of PNP Talisay, MDRRMO and personnel of Coast Guard Batangas onboard five PCG water assets,” saad ni Balilo.

Dagdag niya, ang mga awtoridad ay nagbigay na rin ng advisory habang patuloy ang inspeksiyon sa lugar at pagsundo sa mga residente mula sa Taal Volcano Island para ilikas.

Samantala, nakapagtala ang Philippine Institute of Volcanology and Seismology (PHIVOLCS) ngayong Martes ng 98 tremor activities sa nakalipas na 24 oras sa Taal Volcano.

Gayundin, ang volcanic earthquakes ay tumagal nang 5 hanggang 12 minuto habang ang main crater ay nakapagbuga naman ng steam-laden plumes na umabot sa 5 metro ang taas.