Japan: Visa exemption sa PH Gov't officials

ni Mylene Alfonso | February 11, 2023

Inanunsyo ni Prime Minister Fumio Kishida na magkakaroon na ng visa exemptions ang mga opisyal ng gobyerno ng Pilipinas pagpasok sa Japan.

Ayon sa joint statement ng Japan at ng Pilipinas na inilabas ng Embassy of Japan, ginawa ni Kishida ang anunsyo sa isang Summit-level Working Dinner kasama si Pangulong Ferdinand "Bongbong" Marcos, Jr. noong Huwebes ng gabi.

"Prime Minister Kishida announced visa exemption mainly for Philippine government officials," ayon sa binasang joint statement.

Malugod naman na tinanggap ni Pangulong Marcos ang anunsyo ng Japan at ipinahayag ang kanyang pag-asa na mabuo ang momentum na ito upang higit pang mapadali ang pagpapalitan ng mga tao sa pagitan ng dalawang bansa.

Hindi pa binanggit kung kailan epektibo ang nasabing visa exemptions.

Nabatid na si Marcos ay nasa Tokyo para sa kanyang official working visit.

U.S. at ‘Pinas, joint forces uli sa pagbabantay sa WPS

ni BRT | February 5, 2023

Napagkasunduan ng Estados Unidos at Pilipinas na muling ipagpatuloy ang pagsasagawa ng joint maritime patrols sa West Philippine Sea (WPS).

Ito ay matapos na una nang suspendihin ni dating Pangulong Rodrigo Duterte ang pagsasagawa ng anumang maritime patrol sa nasabing pinag-aagawang isla.

Kasunod ng naging pagbisita ni United States Defense Secretary Lloyd Austin III sa Pilipinas ay inihayag nito na kanilang napagkasunduan ni National Defense Secretary Carlito Galvez, Jr. na muling simulan ang pagsasagawa ng joint maritime patrols sa WPS bilang bahagi ng pagtugon sa mga nararanasang regional security challenges sa lugar tulad na lamang ng mga namamataang ilegal na presensya ng mga barko ng China doon.

Ito ay alinsunod pa rin sa naging kasunduan ng dalawang bansa na mas paigtingin ang Mutual Defense sa pagitan ng Pilipinas at Amerika.

Samantala, nilinaw naman ng mga kinauukulan na patuloy pang pinaplantsa ang mga guidelines kung paano nila isasagawa ang naturang joint maritime patrol sa WPS.

‘Di rehistradong yosi at vape, ipagbawal sa Shopee at Lazada

ni Chit Luna @Brand Zone | January 26, 2023

ISANG grupo ng mga konsyumer sa Pilipinas ang nanawagan sa Shopee at Lazada na tanggalin ang mga hindi rehistrado o aprubadong sigarilyo, vapes at heated tobacco products na hayagang ibinebenta sa kanilang online platforms.

Sa magkaibang liham na ipinadala sa Shopee Philippines at Lazada Philippines, nanawagan ang National Consumers Union of the Philippines Inc. (NCUP) na aksyunan ng dalawang online platforms ang hinaing sa malawakang pagbebenta ng mga ‘di awtorisadong e-cigarettes at heated tobacco.

Ayon sa NCUP, mahalagang aksyunan ng Shopee at Lazada ang kanilang hinaing upang protektahan ang mga konsyumer laban sa mga substandard na produkto at upang makalikom ang gobyerno ng tamang buwis mula sa tabako at mga alternatibong produkto.

Sinabi ni NCUP President Antonio P. Israel na dumami ang pagbebenta ng illicit nicotine products sa mga online platforms simula ng pandemya, at ito ay nakapagdulot ng hindi maganda sa mga consumers na naghahanap ng mas mainam na alternatibo sa sigarilyo.

“Ang mga nagtitinda, nag-i-import at nagdi-distribute ng heated tobacco at vapor products ay dapat sumunod sa batas at mga alituntunin ng gobyerno upang maiwasan ang hindi magandang dulot ng illicit products at upang makalikom ng tamang buwis para sa gobyerno,” ani Israel.

Ang mga illicit at ‘di rehistradong produkto ay hindi dumaan sa pagsusuri ng awtoridad, kaya maaaring makasama sa mga consumers dahil sa pagiging substandard.

Sinabi pa niya na ang Shopee at Lazada ay may mahalagang papel upang mapigilan ang

paglaganap ng mga hindi aprubadong produkto.

Ipinadala din ng NCUP ang kopya ng liham kina Rep. Joey Salceda, chairman ng House Committee on Ways and Means; Finance Secretary Benjamin Diokno; Trade Secretary Alfredo Pascual; Department of Interior and Local Government Secretary Benjamin Abalos, Jr.; Bureau of Internal Revenue Commissioner Romeo Lumagui, Jr.; at Bureau of Customs Commissioner Yogi Filemon Ruiz.

Ang NCUP ay isang nonprofit national advocacy organization na naniniwala sa karapatan ng mga konsyumer ng tobacco at mga alternatibong produkto na maproteksyunan laban sa mga substandard at hindi rehistradong produkto.

Ito ay nagsusulong sa konsepto ng tobacco harm reduction bilang mabisang public health policy, na suportado rin ng Republic Act No. 11900 o Vape Law.

Ang Vape Law ay naglalatag ng tamang regulasyon at sumusunod sa international standards upang protektahan ang mga mamamayan at maiwasan ang paglaganap ng mga substandard vapor products at heated tobacco products.

Naglabas kamakailan ang BIR ng Revenue Memorandum Circular No. 79-2022 na may listahan ng rehistradong importers at manufacturers, kasama ng kanilang mga awtorisadong produkto sa Pilipinas.

Ayon sa RMC No. 79-2022, anumang produkto na hindi kasama sa listahan at walang BIR tax stamp ay hindi maaaring ibenta sa merkado.

Sinabi rin ni Israel na may malinaw na probisyon ang batas sa tamang pagbebenta o distribution ng vaporized nicotine and non-nicotine products sa Internet websites o e-commerce platforms.

Ang lahat ng online merchants ay dapat ding rehistrado sa DTI o sa Securities and Exchange Commission.

Ang mga awtorisadong produkto ay naglalaman din ng health warnings, BIR tax stamp, at floor price, ayon kay Israel.

Nauna rito, nanawagan si Rep. Salceda sa DTI na habulin ang mga nagbebenta ng mga ‘di rehistradong imported vaping products na umano’y idineklarang toys o electronics upang makapasok sa Pilipinas.

Hindi rin payag si Israel sa panukalang itaas ang buwis sa vape products, na aniya’y lalong magpapalala sa black market at makakapigil sa mga smokers na maghanap ng mas mainam na alternatibo sa sigarilyo.