Tanod, bawal magdala ng baril — Eleazar

ni Ronalyn Seminiano Reonico | August 12, 2021

Pinagbawalan ni Philippine National Police Chief General Guillermo Eleazar ang mga barangay security officers na magdala ng baril habang naka-duty.

Inatasan din ni Eleazar ang mga opisyal ng PNP na siguraduhing "That no barangay tanods would be allowed to carry guns especially in the enforcement of the quarantine rules.”

Ito'y matapos ang insidente noong Sabado kung saan naiulat na binaril ng isang barangay tanod ang 59-anyos na curfew violator sa Manila na hinihinalang may problema sa pag-iisip. Dead on the spot ang biktima.

Saad pa ni Eleazar, “In the enforcement of minimum public health safety standards and ECQ rules in Metro Manila, we always remind our law enforcers to observe maximum tolerance on quarantine violators. Hindi dapat humantong sa paggamit ng dahas ang paninita sa mga violators."

Nangako rin si Eleazar sa pamilya ng biktima na tututukan nila ang naturang insidente at maingat na iimbestigahan ang suspek na kinilalang si Cesar Panlaqui.

Ayon din kay Eleazar, kasalukuyang nasa kustodiya na ng Manila Police District ang suspek at inihahanda na rin umano ang mga kaso na maaaring isampa rito.

Eleazar, binakunahan na ng Sinovac

ni Ronalyn Seminiano Reonico | June 15, 2021

Binakunahan na ng Sinovac COVID-19 vaccine si Philippine National Police Chief Police General Guillermo Lorenzo Eleazar ngayong Martes sa isinagawang ceremonial vaccination para sa mga pulis na sakop ng A4 priority group sa Camp Crame, Quezon City.

Ayon kay Eleazar, 500 doses ng Sinovac ang natanggap ng PNP. Ito raw ay ipamamahagi sa mga miyembro ng Command Group at senior police officers, pati na rin sa mga miyembro ng National Capital Region Police Office, Special Action Force, at Aviation Security Group.

Si Health Assistant Secretary Dr. Maria Francia Laxamana ang nagturok ng bakuna kay Eleazar.

Bago pa simulan ng pamahalaan ang pagbabakuna sa A4 category, nakatanggap na ng bakuna ang 18,320 police officers na mga health workers, senior citizens at persons with comorbidities, ayon kay Eleazar.

Aniya, "That is 8% of our strength but out of the 18,320, 63% diyan po is first and second dose na."

Nanawagan din si Eleazar sa publiko na ‘wag nang mag-alinlangang magpabakuna.

Aniya, "Hindi lang natin ito obligasyon sa ating bayan kung hindi obligasyon din sa ating mga sarili at sa ating mga pamilya."

30 K body cams pa, hirit ng PNP

ni Ronalyn Seminiano Reonico | June 6, 2021

Malinaw ang kuha ng mga body-worn cameras (BWCs) na gagamitin ng mga pulis sa pagsasagawa ng mga operasyon kahit sa gabi dahil sa auto-night mode nito na kayang mag-detect ng mga bagay hanggang 10 meters na layo, ayon kay Philippine National Police Chief General Guillermo Lorenzo Eleazar.

Saad pa ni Eleazar, “May mga operation na isinasagawa sa gabi and this was anticipated during the review of what type of body cameras would be procured by the PNP. Kaya nga ‘yung bilin ng mga nakaraang liderato ng PNP ay kung bibili ay ‘yung the best na at magagamit araw man o gabi o kahit masama pa ang pahanon.

“‘Yung mga police operations naman kasi ay walang pinipiling oras ‘yan at lugar. Basta natunugan ng ating mga operatiba ay sugod kaagad. But this time, para ru’n sa mga mabibigyan, they must ensure na nakakabit ang body cameras at naka-on.” Water-proof din umano ang mga BWCs at naire-record din ang audio at video sa loob ng 8 oras.

Ang lahat ng datos na maire-record pagkatapos ng operasyon ay direktang dadalhin sa PNP Command Center para sa management at monitoring.

Ayon din kay Eleazar, papatayin lamang ang BWCs kapag tapos na ang operasyon o kapag nai-turn-over na ang suspek sa detention facility.

Samantala, 2,696 ang kabuuang bilang ng mga BWCs na binili ng PNP na naipamahagi na sa 170 police stations. Saad pa ni Eleazar, “So ang binili natin dito ay hindi lang ‘yung 2,696 units ng body cameras but the entire system ng recording and real-time transmittal of the audio-video recording.”

Aniya, 30,000 BWCs pa ang kailangan para mabigyan ang lahat ng mga police stations sa bansa.

Dagdag pa ni Eleazar, “Napakalaki pang budget ang kailangan dito pero tayo ay umaasa na makakakuha tayo ng suporta sa Kongreso sa mga darating na taon upang mawala na talaga ang pagdududa sa lahat ng operasyon na gagawin ng ating kapulisan.”