Pila sa checkpoint, umaabot ng 2 oras... Random check na lang — PNP Chief Eleazar

ni Lolet Abania | August 8, 2021

Dalawang oras umano ang inabot ng ilang motorista bago sila pinadaan sa mga checkpoint habang nasa ilalim ng enhanced community quarantine ang National Capital Region (NCR).

Ayon sa isang motorista, pumila siya sa checkpoint sa boundary ng Caloocan at San Jose del Monte, Bulacan, kung saan lumagpas pa umano ng dalawang oras bago siya tuluyang pinadaan ng mga pulis nitong Sabado nang gabi.

Salaysay naman ng isa pa, “Hassle kasi may pasyente nga kaming dinala sa ospital. Nauna ‘yung ambulansiya, naipit kami... Galing po ako ng Cavite,” kung saan aniya, wala nang bakante sa mga ospital sa Metro Manila, kaya napilitan silang dalhin ang pasyente sa nasabing lugar.

Sa España Blvd. sa Maynila, binubusisi sa checkpoint ang mga dokumento ng bawat daraan para tiyakin umano ng mga awtoridad kung sila ay authorized person outside residence (APOR).

“Kapag po sila working APOR, hinahanapan ng Certificate of Employment. ‘Yung kanilang mga ID, kailangang ipakita para mapatunayan na working APOR. Kapag consumer APOR, kailangan, may quarantine pass,” paliwanag ni Police Lt. Ronald Calixto, team leader sa checkpoint. Iniutos naman ni Philippine National Police chief Gen. Guillermo Eleazar na sakaling ang pila sa mga checkpoint ay humaba, maaaring magpatupad na lang ng random check.

Gayundin, iisa-isahin na lamang ng mga pulis ang mga sasakyan kapag maigsi na umano ang pila nito sa checkpoint.

Ayon kay Eleazar, karaniwan na aniyang paglabag sa ECQ ang hindi at maling pagsusuot ng face mask, face shield at physical distancing. Kasama na rin dito ang hindi pagsunod sa curfew hours. “Itong tatlo, ito ang minimum public health standards natin ang nakikita natin (violation) pero most of them wina-warning-an lang naman,” sabi ni Eleazar. Babala naman ng PNP chief na kanilang papanagutin ang sinumang non-APOR driver na mang-aabuso. Aalamin nila sa mga employer nito kung tunay ang ipinakita nilang mga dokumento.

Nagbigay na rin ng direktiba si Eleazar sa Criminal Investigation and Detection Group (DILG) habang patuloy ang pakikipag-ugnayan ng ahensiya sa mga lokal na pamahalaan dahil sa posibleng pagdagsa naman ng mga nagpapabakuna kontra-COVID-19 sa mga vaccination sites.

Sa unang araw ng ECQ… 1,848, lumabag sa curfew — Eleazar

ni Ronalyn Seminiano Reonico | August 7, 2021

Umabot sa 1,848 ang nahuli sa paglabag sa ipinatutupad na curfew hours sa Metro Manila sa pagsasailalim sa rehiyon sa enhanced community quarantine (ECQ) dahil sa banta ng COVID-19 Delta variant, ayon kay Philippine National Police (PNP) Chief General Guillermo Eleazar noong Sabado.

Ani Eleazar sa isang panayam, "Base sa ulat na na-receive natin, there was a total of 1,848 accosted na violator.

"Six hundred five ang binigyan ng warning. At para magmulta, mayroong 1,235. At merong walo pa na for community service.”

Hanggang sa Agosto 20 epektibo ang ECQ sa Metro Manila at ang curfew hours ay tuwing 8 PM hanggang 4 AM.

Saad pa ni Eleazar, "Malaking bagay ang curfew para malimitahan ang paglabas ng mga tao."

Pinaalalahanan din ni Eleazar ang mga authorized persons outside residence (APOR) na bibili ng essential goods na lumabas ng bahay sa oras na hindi aabot sa curfew.

Aniya pa, "Consumer APOR, dapat i-avail lang during the period na walang curfew."

Ang mga driver naman ng pampublikong transportasyon na nahuling lumalabag sa ipinatutupad na mga health protocols kabilang na ang “one seat apart” rule ay binigyan din ng mga ticket habang ang mga hindi APOR ay pinauwi.

Ang mga hindi naman nakasuot ng face shields sa mga pampublikong transportasyon ay pinababa ng sasakyan.

Saad pa ni Eleazar, "Hindi muna prayoridad ang pagkuha ng temperatura ng mga dumadaan sa mga checkpoint dahil ina-assume na natin na kapag APOR ka at ikaw ay lumabas, dapat maayos ang iyong pakiramdam.

"Posibleng makabagal lamang sa daloy ng trapiko ang paglalagay ng thermal scanner sa mga quarantine control points.”

Libu-libong pulis, ikinalat na para sa ECQ sa NCR

ni Ronalyn Seminiano Reonico | August 6, 2021

Nag-deploy na ng libu-libong kapulisan ang Philippine National Police (PNP) para masiguro na nasusunod ang ipinatutupad na health and safety protocols sa ilalim ng enhanced community quarantine (ECQ) sa Metro Manila at bantay-sarado na ang 89 Quarantine Control Points (QCPs) sa rehiyon, sa tulong ng Inter-Agency Task Force for the Management of Emerging Infectious Diseases (IATF-MEID) ngayong Agosto 6.

Hanggang sa Agosto 20 isasailalim ang NCR sa ECQ.

Nasa 4,346 iba pang PNP personnel naman ang inatasan para sa Mobile Control Points sa iba’t ibang lugar sa Metro Manila para sa uniformed curfew hours.

Nanawagan naman si PNP Chief Guillermo Eleazar sa publiko lalo na sa mga residente ng NCR Plus na makiisa sa ipinatutupad na paghihigpit sa mga borders dahil sa banta ng COVID-19 Delta variant.

Aniya pa, “Nauunawaan namin ang sinasabing quarantine burnout na nararamdaman ng ating mga kababayan subalit maling-mali ang pananaw na walang epekto ang mga paghihigpit na ito dahil ang mga public experts na mismo ang nagrekomenda nito at kami mismo sa PNP ay napatunayan namin kung gaano kaepektibo ito upang maiwasan ang pagkalat ng virus.

“This security personnel are under strict instructions to ensure that public health protocols are observed and mass gatherings are disallowed.”

Nasa 7,337 pulis naman ang ipinadala sa 2,745 vaccination centers habang 4,877 naman ang nasa 2,535 quarantine areas.

Sa labas naman ng NCR Plus bubble, nagpadala na umano ng 9,180 police personnel ang PNP para sa 1,103 Quarantine Control Points.

Saad pa ni Eleazar, “Despite the uphill battle against COVID-19 and surmounting challenges we are facing, the PNP remains resilient in assisting the government to quell the community transmission of the Delta variant. At bilang dating commander ng Joint Task Force COVID shield, hindi na bago sa inyong Pambansang Pulisya ang anumang uri ng quarantine restrictions kaya makakaasa ang lahat ng aming kahandaan sa anumang plano at ipag-uutos ng ating IATF at mga lokal na pamahalaan.

“Ngunit tayong lahat ay dapat kumilos para mapigilan ang pagkalat ng mas nakahahawang Delta variant. Bukod sa bakuna at pagsunod sa minimum public health safety standards, disiplina po ang kailangan ng bawat isa sa atin.”