Matapos humingi ng pera sa nahuling curfew violator… 6 kotong cops sa Maynila, sisibakin

ni Jasmin Joy Evangelista | October 20, 2021

Tiniyak ni PNP chief General Guillermo Eleazar na matatanggal sa serbisyo ang anim na pulis na umano’y sangkot sa extortion activities sa Maynila.

Ang anim na pulis ay inireklamo ng pangongotong sa kanilang dalawang naarestong curfew violators sa Luzon Street sa Maynila.

Humingi umano sila ng pera sa dalawang naarestong violators kapalit ng kanilang kalayaan, kaya naman isinanla ng dalawa ang kanilang motorsiklo at alahas at nakalikom ng P47,000 na siyang ibinigay sa mga pulis.

Nang makalaya ang mga violators ay agad nilang sinampahan ng reklamo ang mga pulis.

Ang mga nasabing pulis ay nahaharap sa kasong kriminal at administratibo at dinisarmahan na.

Nagbebenta ng Tocilizumab, nangotong — PNP.. 2 pulis arestado

ni Lolet Abania | October 13, 2021

Dalawang pulis mula sa Rizal Province at Quezon City ang napipintong masibak sa serbisyo matapos na maaresto sa magkahiwalay na operasyon ng mga awtoridad dahil sa pagkakasangkot ng mga ito sa ilegal na aktibidad, ayon sa Philippine National Police (PNP) ngayong Miyerkules.

Sa isang statement ng PNP, naaresto ng National Bureau of Investigation (NBI) si Police Staff Sergeant Ariel Yalung sa Quezon City hinggil sa ilegal na pagbebenta at overprizing ng Tocilizumab, isang gamot na ginagamit laban sa COVID-19.

Isinagawa ng NBI ang operasyon dahil sa mga reklamo na mayroong dalawang indibidwal na nagbebenta umano ng Tocilizumab online sa halagang P95,000, na mas mataas ang presyo kumpara sa suggested price na P25,000.

Naaresto naman ng Integrity Monitoring and Enforcement Group si Police Staff Sergeant June Angeles sa isang entrapment matapos na akusahan na nagde-demand ng pera mula sa asawa ng isa mga deatinee sa San Mateo, Rizal.

Ayon kay PNP chief Police General Guillermo Eleazar nakakulong na ang mga suspek at nahaharap ang mga ito sa kasong kriminal at administratibo.

“Tinitiyak ko na matatanggal sa serbisyo ang dalawa sa aming kasamahan dahil sa kalokohang kinasangkutan nila,” ani Eleazar.

Hinimok naman ni Eleazar ang publiko na agad na ipaalam sa mga awtoridad anumang impormasyon hinggil sa mga pulis na nasasangkot sa kahina-hinala at ilegal na aktibidades.

P5.7 M halaga ng shabu, nakumpiska, 7 arestado

ni Lolet Abania | October 6, 2021

Nasa tinatayang P5.7 milyon halaga ng hinihinalang shabu ang nakumpiska ng mga awtoridad sa dalawang magkahiwalay na operasyon sa Maynila, ayon sa Philippine National Police ngayong Miyerkules.

Sa isang statement ng PNP, nai-report ng Manila Police District (MPD) na tinatayang 835 gramo ng ilegal na droga ang nasabat sa buy-bust operations sa San Miguel noong Lunes at sa Tondo nitong Martes.

Nagsagawa ang mga awtoridad ng buy-bust operation sa Barangay 648, San Miguel, kung saan naaresto ang suspek na si Nasfira Nassir Abdulla, 67-anyos.

Nakuha kay Abdulla ang tinatayang 16 plastic sachets na nasa 735 gramo ng hinihinalang shabu na nagkakahalaga ng P4.99 milyon.

Sa Tondo, anim na drug suspects ang nadakip matapos masabat sa kanila ang 100 gramo ng hinihinalang shabu na P680,000 ang halaga sa ikinasang operasyon ng pulisya.

Kinilala ang mga suspek na sina Jonathan Balingit, 24; Esmelita Tumbagahan, 61; Renalyn Silverio, 40; Aldwin Castillo, 43; Anna Punzal, 40; at Mark Echalar, 42.

Pinuri naman ni PNP chief Police General Guillermo Eleazar ang mga MPD personnel sa matagumpay nilang operasyon. “I am directing the MPD to further conduct investigation into this to identify the suspects’ other possible cohorts and to find out if they are part of a bigger drug syndicate,” ani Eleazar.