13 barangay sa Batangas apektado, 1,499 residente inilakas sa pagsabog ng Bulkang Taal

ni Lolet Abania | July 2, 2021

Umabot sa 1,499 indibidwal o 344 pamilya ang inilikas at dinala sa mga evacuation centers ngayong Biyernes matapos na sumabog ang Bulkang Taal kahapon.

Sa alas-11:00 ng umagang update ng Batangas Provincial Police Office (PPO), nasa 1,126 residente ng Laurel ang inilikas at dinala sa tinatayang pitong eskuwelahan, 118 naman mula sa Talisay ang pansamantalang nanuluyan sa Calamba Regional Government Center, habang 255 residente ng Balete ang nasa Malabanan Elementary School.

Ayon sa Batangas PPO, nasa 64 search-and-rescue personnel ang itinalaga at 12 kawani naman ang nakabantay sa mga evacuation centers.

Sa ulat ng Police Regional Office 4A, 58 katao ang bumalik na sa kanilang mga tirahan sa Agoncillo at Sto. Tomas. Subalit, tinatayang 5 barangay sa Laurel at Agoncillo, Batangas ay nagpatupad ng forced evacuation sa gitna ng nagaganap na aktibidad ng Taal Volcano.

Batay sa National Disaster Risk Reduction and Management Council (NDRRMC), nasa 13 barangays sa Batangas ang labis na naapektuhan ng pagsabog gaya ng Poblacion at Sinturisan sa San Nicolas; Gulod, Buso Buso, Bugaan West, at Bugaan East sa Laurel; Subic Ilaya, Banyaga, at Bilibinwang sa Agoncillo; Apacay sa Taal; Luyos at Boot sa Tanauan City; San Sebastian sa Balete.

Iniulat kahapon ng Philippine Institute of Volcanology and Seismology (PHIVOLCS), ang pagkakaroon ng bahagyang phreatomagmatic eruption sa main crater ng Bulkang Taal at nagbuga ito ng dark grayish plume na umabot sa taas na 1,000 metro.

Sinundan ito ng apat na maiiksing phreatomagmatic na pagsabog ng alas-6:26 ng gabi, alas-7:21 ng gabi, alas- 7:41 ng gabi at alas-8:20 ng gabi na tumagal lamang ng 2 minuto, kung saan naglabas ng plumes na umabot nang hanggang 200 metrong taas sa main crater lake.

Umaga ngayong Biyernes, nananatili pa ring nasa Alert Level 3 sa paligid ng Taal Volcano.

Sumabog, nasa Alert Level 3 na... Mga residente ng Taal, pinalilikas na

ni Lolet Abania | July 1, 2021

Isinailalim ng Philippine Institute of Volcanology and Seismology ang Taal Volcano sa Alert Level 3 matapos ang eruption o pagsabog nito na umabot ng isang kilometrong taas ng phreatomagmatic plume ngayong Huwebes nang hapon.

Ayon sa PHIVOLCS, ang main crater ay bahagyang sumabog na nagbuga ng 1 kilometer-high phreatomagmatic plume ng alas-3:16 ng hapon subalit wala namang kasamang pagyanig.

Sinabi ng PHIVOLCS na ang naganap na phreatomagmatic eruption ay tumagal lamang ng hanggang alas-3:21 ng hapon o limang minuto. Ayon kay PHIVOLCS Director Renato Solidum, inilagay sa Alert Level 3 ang Taal na ang ibig sabihin ay nakapagtala ang bulkan ng "magmatic unrest".

“’Yung pagsabog po kanina, short-lived lang naman siya, mga limang minuto pero maitim po ‘yung pinaka-eruption column,” ani Solidum. “Ibig sabihin, may laman bago ‘yan pero hindi ganu’n kataas, isang kilometro lang ang inabot,” dagdag niya.

Inirekomenda na rin ng PHIVOLCS sa mga residente ng Taal Volcano Island at iba pang high-risk barangay gaya ng Agoncillo at Laurel na magsilikas dahil posibleng magkaroon ng pyroclastic density currents at volcanic tsunami.

“The public is reminded that the entire Volcano Island is a Permanent Danger Zone, and entry into the island as well as high-risk barangays of Agoncillo and Laurel is prohibited,” pahayag ng PHIVOLCS.

Pinapayuhan din ng ahensiya ang mga nasa komunidad sa paligid ng Taal na maging maingat at magbantay sa posibleng aktibidad naman ng lakewater.

Subalit ayon kay Solidum, stable pa ang bulkan. “Sa aming pagbabantay, tinitingnan namin kung titindi pa ang pamamaga niya. Hindi ganu’n ang ano, ang nakikita natin. Steady lang. So, may kaunting pressure na naipon at ‘yun ang pagbuga,” sabi ni Solidum.

Binanggit din ni Solidum na ang bulkan ay nakapaglabas ng tinatayang 13,000 tons ng sulfur dioxide o SO2 mula Huwebes nang umaga hanggang hapon, mas kaunti kumpara sa 14,326 tons na ibinuga nito noong Lunes.

“Nonetheless, kailangan nating pag-ingatan ang Taal. Kasi nagkakaroon na ng explosion. Puwede naman na talagang mangyari ito na after one year, may sumunod na activity,” ayon sa opisyal. Gayundin, noong Martes, ang Taal Volcano ay naglabas ng sulfur dioxide na umabot sa National Capital Region at karatig-lalawigan ng Miyerkules.

Vog na galing sa Taal, delikado sa mata, lalamunan at paghinga

ni Lolet Abania | June 29, 2021

Inianunsiyo ng Philippine Institute of Volcanology and Seismology (PHIVOLCS) na muling naglabas kahapon ang Taal Volcano ng mas maraming sulfur dioxide o SO2 habang nananatili ito sa Alert Level 2.

“Sulfur dioxide (SO2) emission averaged 14,326 tonnes/day on 28 June 2021,” pahayag ng PHIVOLCS.

Mas mataas ito kumpara sa SO2 emission noong Hunyo 27 na nasa average na 4,771 tonnes/day.

Sa ulat ng PHIVOLCS kahapon, nag-umpisang magkaroon ng volcanic smog o vog na makikita sa bunganga ng Taal Volcano.

Ang vog ay isang uri ng polusyon sa hangin na sanhi ng pagputok ng mga bulkan at binubuo ito ng mga pinong patak na naglalaman ng volcanic gas tulad ng sulfur dioxide na acidic.

Maaari itong magdulot ng iritasyon sa mga mata, lalamunan, at respiratory tract na maaaring maging malubha, depende sa konsentrasyon o tagal ng pagkakalanghap dito.

Paliwanag ng ahensiya, dahil ito sa patuloy na paglalabas ng volcanic sulfur dioxide (SO2) mula sa main crater.

Ayon kay PHIVOLCS-Taal Volcano Observatory resident volcanologist Paolo Reniva, nananatili pa ring may volcanic smog sa isla ng Taal Volcano.

“Sa ngayon, may nao-observe pa rin tayong vog pero limited sa Volcano Island,” ani Reniva sa isang interview ngayong araw.

Sa report ng PHIVOLCS ngayong Martes ng umaga, nagkaroon na ng 10 volcanic earthquakes at mabababang antas ng mga pagyanig sa loob ng 24 oras sa paligid ng bulkan.

Naglabas din ito ng steam-rich plumes na tumaas ng halos 2,500 talampakan sa ibabaw ng main crater.

Nakitaan din ng deflation o pagguho ng lupa sa Taal Volcano Island.

“Based on ground deformation parameters from electronic tilt, continuous GPS and InSAR monitoring, Taal Volcano Island (TVI) has begun deflating in April 2021 while the Taal region continues to undergo very slow extension since 2020,” sabi ng PHIVOLCS.

“These parameters indicate overall that magmatic unrest continues to occur at shallow depths beneath the edifice,” dagdag pa ng ahensiya.

Sa ngayon, nananatili pa rin sa Alert Level 2 (Increased Unrest) ang paligid ng bulkan.

Paalala ng PHIVOLCS sa publiko, “sudden steam- or gas-driven explosions, volcanic earthquakes, minor ashfall, and lethal accumulations or expulsions of volcanic gas can occur and threaten areas within and around TVI.”

Ayon pa sa PHIVOLCS, mahigpit pa ring ipinagbabawal na magtungo sa TVI, gayundin ang pamamangka sa Taal Lake. Pinapayuhan din ang mga piloto na iwasan ang mapadpad malapit sa Taal Volcano.