95 pagyanig dahil sa Bulkang Taal, naitala

ni Ronalyn Seminiano Reonico | July 23, 2021

Naitala ng Philippine Institute of Volcanology and Seismology (PHIVOLCS) ang 95 volcanic earthquakes sa Bulkang Taal kabilang ang 68 volcanic tremors na may habang 1 hanggang 17 minuto sa nakalipas na 24 oras na pagmamanman simula alas-5 nang umaga kahapon hanggang alas-5 AM ngayong araw.

Patuloy pa ring naglalabas ng volcaninc sulfur dioxide at steam-rich plumes ang Bulkang Taal na umaabot sa taas na 900 metro mula sa main crater nito bago mapadpad patungo sa hilagang silangan at silangan.

Patuloy namang nakataas sa Alert Level 3 ang bulkan at ayon sa PHIVOLCS, “Sa kalagayang ito, ang magma na nanunuot sa main crater ay maaaring magdulot ng malakas na pagsabog.

“Pinaaalalahanan ng DOST-PHIVOLCS ang madla na ang Taal Volcano Island o TVI ay isang PERMANENT DANGER ZONE (PDZ) at pagpasok sa TVI at high-risk barangays ng Agoncillo at Laurel ay dapat na maigting na ipagbawal dahil sa panganib ng pyroclastic density currents at volcanic tsunami kung sakaling magkaroon ng malakas na pagputok.”

Pansamantala ring ipinagbabawal ng ahensiya ang lahat ng aktibidad sa Taal Lake at nagbabala rin ang PHIVOLCS sa mga residente sa paligid nito na mag-ingat sa posibleng ashfall at vog at maging handa sa posibleng evacuation kapag lumala ang aktibidad ng bulkan.

35 pagyanig dahil sa Bulkang Taal

ni Ronalyn Seminiano Reonico | July 22, 2021

Nakapagtala ang Philippine Institute of Volcanology and Seismology (PHIVOLCS) ng 35 volcanic earthquakes sa Bulkang Taal sa nakalipas na 24 oras na pagmamanman simula alas-5:00 nang umaga kahapon hanggang alas-5 AM ngayong Huwebes at nananatiling nakataas ang Alert Level 3.

Kabilang sa naitalang 35 volcanic earthquakes ang 17 tremors na may habang 1 hanggang 49 minuto.

Patuloy pa ring naglalabas ng volcanic sulfur dioxide (SO2) ang Bulkang Taal at nakapagtala ang PHIVOLCS ng 5,286 tonelada noong Sabado.

Umaabot naman sa 900 metro ang taas ng steam-rich plumes mula sa main crater ng bulkan bago mapadpad sa silangan dulot ng upwelling ng mainit na volcanic gas.

Samantala, patuloy na ipinagbabawal ng PHIVOLCS ang “Pagpasok sa Taal Volcano Island o TVI at high-risk barangays ng Agoncillo at Laurel, pamamalagi at paglaot sa lawa ng Taal, at paglipad ng anumang aircraft malapit sa tuktok ng bulkan.”

Saad pa ng PHIVOLCS, “Ang Alert Level 3 (Mataas na aktibidad) ay kasalukuyang nakataas sa Taal Volcano. Sa kalagayang ito, ang magma na nanunuot sa main crater ay maaaring magdulot ng malakas na pagsabog.”

Davao Oriental, niyanig ng magnitude 5.4 na lindol

ni Ronalyn Seminiano Reonico | July 18, 2021

Niyanig ng magnitude 5.4 na lindol ang Governor Generoso, Davao Oriental ngayong Linggo nang umaga, ayon sa PHIVOLCS.

Unang naitala ang lindol kaninang alas-8:09 bilang magnitude 4.7 ngunit itinaas ito sa magnitude 5.4 na may lalim na 42 kilometers at ayon sa PHIVOLCS, inaasahang may magaganap na mga aftershocks.

Samantala, naramdaman din ang Intensity V sa Governor Generoso, Davao Oriental; Intensity IV sa Mati City, Davao Oriental; Intensity III sa Tampakan at Tupi, South Cotabato; Intensity II sa Davao City; General Santos City; Kidapawan City; Kiamba, Sarangani; at Intensity I sa Arakan, Cotabato.

Naitala rin ng PHIVOLCS ang Instrumental Intensity II sa General Santos City; Kidapawan City; Kiamba, Sarangani. Bukod sa posibleng aftershocks, nagbabala rin ang PHIVOLCS sa posibleng maitalang pinsala dahil sa lindol.