Cagayan, naging Pacific Ocean dahil sa baha

ni Thea Janica Teh | November 14, 2020

Pinapunta na sa Cagayan Valley kaninang madaling-araw ang Philippine Marine rescue team upang saklolohan ang mga residenteng na-stranded sa kanilang mga bahay at bubong dahil sa Bagyong Ulysses, ayon kay Vice-President Leni Robredo.

Viral ngayon sa social media ang paghingi ng tulong ng mga residente sa Cagayan at ilan pang kalapit na lugar dahil ilang araw na silang stranded at tumataas pa ang baha. Kaya naman agad itong inaksiyunan ni VP Leni at nagpadala ng rescue team.

Ang pagpapakawala ng tubig sa Magat Dam ang isang sanhi ng patuloy na pagtaas ng tubig sa rehiyon dahil naabot na nito ang critical level. Kaya naman, nahirapan ang mga rescuers sa pagpunta sa Cagayan at Tuguegarao dahil sa lakas ng daloy ng tubig at hindi posible ang land transportation sa ibang area.

Ayon kay Cagayan Gov. Manuel Mamba, mistulang naging Pacific Ocean ang kanilang probinsiya dahil sa baha. Bukod pa rito, sinabi ni Col. Ascio Macalan ng Cagayan Provincial Risk Reduction and Management Office na lahat ng munisipyo na tabi ng Cagayan River ay binaha. Nalagpasan din umano ng baha ngayon ang baha noong 2019.

Sa ngayon ay nakarating na rin ang iba pang rescue team tulad ng Philippine Coast Guard at Philippine Army sa Brgy. Linao East upang tumulong sa pag-rescue sa mga na-stranded.

Miyembro ng PCG, patay sa pamamaril sa Maynila

ni Thea Janica Teh | November 4, 2020

Patay sa pamamaril ng hindi pa nakikilalang suspek ang isang miyembro ng Philippine Coast Guard (PCG) sa isang bahay sa Port Area, Maynila nitong Martes.

Ayon sa imbestigasyon ng Manila Police District (MPD) Homicide Section, kinilala ang biktima na si Muktar Tahajid, 29-anyos at kabilang sa Yakan Tribe sa Central Sumusip, Basilan.

Napag-alamang huli siyang tumira sa Block 105, Barangay 650 kung saan siya pinaulanan ng bala. Sinubukan pa umanong tumakas ni Tahajid at tumakbo mula Mel Lopez Boulevard hanggang sa isang bahay ngunit, inabutan ito ng suspek.

Suwerte namang wala ang mga may-ari ng bahay na pinasukan ng biktima at nasa Divisoria kaya naman walang nadamay sa pamamaril.

Sa ngayon ay inaalam pa ng MPD Homicide Section ang pagkakakilanlan ng suspek at ang motibo sa pagpatay.