PNP at AFP, full alert na bilang paghahanda sa May 9 elections

ni Lolet Abania | May 4, 2022

Nasa full alert na ang Philippine National Police (PNP) at Armed Forces of the Philippines (AFP) bilang bahagi ng kanilang paghahanda sa seguridad ng bansa para sa May 9 national at local elections.

“Effective today, as of 6 a.m., nagdeklara na po tayo ng full alert. Ibig sabihin po, lahat ng kapulisan ay magre-render ng kanilang duty in relation sa ating paghahanda sa eleksyon,” saad ni PNP spokesperson Police Colonel Jean Fajardo sa isang radio interview ngayong Miyerkules.

Ayon naman kay AFP chief of staff General Andres Centino, ang militar ay isasailalim sa red alert simula sa Biyernes.

“We are ready, we have done the planning, we have done the organization, and we have set up our monitoring command centers. We are declaring red alert by Friday so that we ensure that all AFP personnel across the country are accounted for by their commanders and ready for the election on Monday,” ani Centino sa ginanap na joint press conference sa PNP, Philippine Coast Guard, Department of Education, at Commission on Elections.

“And this is an assurance from your AFP, while at this time we are still uncertain of who will win, who will be the next leaders of our country, what we can be certain is that you have a strong armed forces ready to perform its duty,” dagdag ni Centino.

Samantala, sinabi nina PNP chief Police General Dionardo Carlos at Centino na wala pa silang natatanggap na anumang verified threats kaugnay sa eleksyon.

“Walang verified, all information lang. May word na baka so hindi pa rin sila sure. So whenever there is information, we go out and verify the information on the ground and come up with an intelligence report,” pahayag ni Carlos sa joint press conference.

Ani Centino, “these are unverified but we cannot be complacent, we are preparing for contingencies and we are ready for that.”

Mga ilegal na fish cage sa Manila Bay sa Cavite, babaklasin

ni Jasmin Joy Evangelista | October 28, 2021

Babaklasin na ang mga ilegal na fish pen at saprahan sa parte ng Manila Bay sa Cavite City simula Nobyembre 4.

Ito ay upang mabawasan ang polusyon sa dagat sa ilalim ng Manila Bay rehabilitation na isinasagawa ng gobyerno.

Nagpaskil ng abiso sa 21 ilegal na istruktura ang Philippine Coast Guard, Department of Environment and Natural Resources at lokal na pamahalaan upang hikayatin ang mga ito na kusang baklasin ang mga fish cage at saprahan hanggang Nobyembre 4.

Ayon sa task force, kung hindi pa aalisin ang mga ito hanggang sa deadline, babaklasin ito sa clearing operations na magsisimula sa araw na iyon.

Ipinagbabawal ang pagtatayo ng mga fish cage at saprahan nang walang permiso o lisensiya at paggamit ng mga ilegal na kasangkapan para makapangisda.

Binigyan na rin umano ng palugit ng PCG Cavite ang mga mangingisda bilang konsiderasyon sa kanilang kabuhayan ngunit naudlot ang nakatakdang demolisyon sa mga fish cages noong Setyembre kaya minarkahan na muna ng mga awtoridad ang mga ilegal na fish cages sa dagat ng Cavite City, Kawit, at Noveleta.

Student pilot, patay sa bumagsak na eroplano

ni Lolet Abania | May 26, 2021

Isang 25-anyos na estudyanteng piloto ang nasawi matapos bumagsak ang Tecnam P-2010 aircraft na kanyang gamit sa Bauang, La Union, ayon sa mga awtoridad.

Sa isang statement ng Civil Aviation Authority of the Philippines (CAAP) Operations and Rescue Coordination Center, ang student pilot ay mula sa First Aviation Academy ng Subic Bay International Airport na nagsasagawa ng tinatawag na solo-cross country flight.

Base sa flight plan ng eskuwelahan, ang eroplano ay may registry number RP-C8230 na nanggaling mula Iba Airport sa Zambales papuntang La Union Airport at Lingayen Airport, bago ito babalik sa Iba Airport. Ang eroplano ay bumagsak sa Barangay Urayong Bayan.

Ayon sa Philippine Coast Guard, ang student pilot ay dinala sa Caba Municipal Health Office kung saan idineklarang patay na. Ang kanyang labi ay nasa Mapanao Funeral Service sa Aringay, La Union.

Narekober ng mga awtoridad ang mga debris ng eroplano na bumagsak sa tinatayang 300 metro ang layo mula sa pampang ng Barangay Wenceslao. Ayon pa sa CAAP, nagsasagawa na ng imbestigasyon mula sa Aircraft Accident Investigation and Inquiry Board upang alamin ang naging sanhi at pinagmulan ng naganap na aksidente.