2 barko, nagbanggaan sa Manila South Harbor

ni Ronalyn Seminiano Reonico | July 8, 2021

Nagbanggaan ang cargo vessel at foreign utility vessel sa South Harbor Anchorage sa Manila ngayong Huwebes nang umaga, ayon sa Philippine Coast Guard (PCG).

Sa inisyal na imbestigasyon ayon sa PCG, bandang alas-2:10 ng umaga nang nagkabanggaan ang MV Palawan Pearl at BKM 104.

Saad ng PCG, “Napag-alaman na ang BKM 104 ay isang foreign utility vessel na kinontrata para magsagawa ng dredging at iba pang land development activity na kinakailangan sa pagpapatayo ng New Manila Airport.”

Lumubog ang kalahating bahagi ng MV Palawan Pearl at kumalat umano ang “oil sheen” sa paligid nito, ayon sa PCG.

Ayon sa ulat, humigit-kumulang 3,000 litro ng diesel oil ang laman ng oil storage tank ng MV Palawan Pearl at may lulan din itong isang drum ng diesel oil, 60 litro ng engine oil at limang litro ng bilge oil.

Samantala, maglalatag umano ng apat na segment ng oil spill boom ang PCG Marine Environmental Protection Command sa paligid ng barko upang makontrol ang pagkalat ng langis.

Wala namang naiulat na nasaktan sa insidente at patuloy na nagsasagawa ng imbestigasyon ang BRP Panglao (FPB-2402) at PCG Station Manila.

P250M taklobo nasabat sa Palawan — PCG

ni Ronalyn Seminiano Reonico | July 1, 2021

Nasabat ng Philippine Coast Guard (PCG) ang tinatayang aabot sa 150 tons ng fossilized giant clam shells o mas kilala sa tawag na taklobo na nagkakahalagang P250 million sa Sofronio Espaniola, Palawan.

Ayon sa PCG, nakumpiska nila ang mga naturang taklobo sa King’s Paradise Island Resort, Barangay Panitian noong June 28.

Naaresto ng awtoridad ang suspek na si Eulogio Josos Togonon sa isinagawang operasyon ng ahensiya sa tulong ng Intelligence Group – Palawan, PCG Station Brooke’s Point, DF-332, Naval Intelligence and Security Group - West, PCSD, and PNP - Maritime Group.

Kinilala naman ng PCG ang iba pang suspek na sina Totong Josos, Nonoy Guliman, at Vilmor Pajardo na mga residente ng Barangay Iraray.

Samantala, nasa kustodiya na ng Barangay Panitian ang mga nakumpiskang taklobo at dinala naman sa Palawan Council for Sustainable Development ang suspek para sa inquest proceedings at upang harapin ang kasong paglabag sa Section 27 ng Republic Act 9147 o ang "Wildlife Resources Conservation and Protection Act".

Fishing ban ng China sa WPS, tablado sa M'cañang

ni Ronalyn Seminiano Reonico | May 21, 2021

Tiniyak ng Malacañang sa mga mangingisdang Pinoy na walang magiging problema at maaari silang magpatuloy sa pangingisda sa West Philippine Sea (WPS) sa kabila ng ipinatupad na fishing ban ng China sa ilang bahagi ng karagatan.

Siniguro rin ng Palasyo na poprotektahan ang mga Pilipino ng Philippine Coast Guard (PCG).

Pahayag ni Presidential Spokesperson Harry Roque, “D’yan lang po kayo sa ating mga traditional fishing grounds.

"Nandiyan naman po ang ating Coast Guard para pangalagaan din po ang interes ng ating mga mangingisda.”

Diin pa ni Roque, “Wala pong extraterritorial application ang batas ng mga dayuhang bansa.”

Samantala, una nang naghain ng diplomatic protest ang Department of Foreign Affairs laban sa ipinatupad na fishing ban ng China sa South China Sea simula noong Mayo 1 hanggang Agosto 16.