Vice Admiral Laroya, bagong PCG chief

ni Lolet Abania | September 8, 2021

Itinalaga ni Pangulong Rodrigo Duterte si Vice Admiral Leopoldo V. Laroya bilang 28th commandant ng Philippine Coast Guard (PCG) ngayong Miyerkules.

Sa isang pahayag ng PCG, in-appoint si Laroya ni Pangulong Duterte kapalit ni dating PCG chief Admiral George Ursabia Jr. na nakatakda namang magretiro ngayon ding Miyerkules, Setyembre 8.

Nagsimula ang military career ni Laroya sa Philippine Military Academy (PMA) noong 1983 at nagtapos bilang miyembro ng “Maringal” Class of 1988. Gayundin, tinapos ni Laroya ang kanyang post-graduate studies para sa Masters in Maritime Safety and Environmental Protection sa World Maritime University sa Malmö, Sweden, noong 2000.

Bago maging deputy commandant for operations, si Laroya ay nagsilbi bilang commander ng Maritime Safety Services Command; Coast Guard Education, Training and Doctrine Command; pati na rin sa Maritime Security and Law Enforcement Command.

Naging district commander din siya ng PCG Districts sa Western Visayas, Northwestern Luzon, Southwestern Mindanao, at Bicol. Pinamunuan naman ni Laroya ang dalawang flagship ng PCG na search-and-rescue vessels, ang BRP Batangas at BRP Nueva Vizcaya, kung saan nagkaloob sa kanyang ng isang Command at Sea badge.

Ilan sa mga parangal na natanggap ni Laroya ay Coast Guard Legion of Honor, Bronze Cross Medal, Outstanding Achievement Medals, Superior Achievement Medals, Coast Guard SAR Medals, at Military Merit Medals.

Inatake, may komplikasyon din sa COVID… Ex-PCG at PNOC President Lista, pumanaw na

ni Lolet Abania | August 31, 2021

Pumanaw na si Philippine National Oil Company (PNOC) president at dating Philippine Coast Guard (PCG) Commandant Admiral Reuben Lista ngayong Martes nang umaga, Agosto 31.

Ayon kay PCG spokesperson Commodore Armand Balilo, si Lista ay namatay dahil sa COVID-19-related complications.

Aniya, naging maayos na ang kondisyon ni Lista noong una, hanggang sa ito ay ma-cardiac arrest nitong Lunes.

Wala namang iba pang ibinigay na detalye si Balilo.

“It is with profound sadness that we announce the untimely death and sudden passing of Admiral Reuben S. Lista PCG (Ret.), president and chief executive officer of the Philippine National Oil Company,” ayon sa statement ng Department of Energy (DOE).

Ang PNOC ay isang state-run firm na nasa ilalim ng DOE.

“The Department of Energy extends its heartfelt condolences to the entire Lista family - may you find strength, comfort, and peace in the love of our Lord Jesus Christ,” pahayag pa ng DOE.

“Admiral Lista was our staunch partner in realizing our energy goals to effectively implement President Rodrigo Duterte's vision of ushering in a comfortable and secure future for the Filipino people,” dagdag pa ng ahensiya.

Sa hiwalay na pahayag, nagpaabot naman ng pakikiramay ang PCG sa pamilya ng pumanaw na si Lista.

Ayon sa Phil. Coast Guard, patuloy na aalalahanin ang liderato ni Lista sa Philippine maritime industry, at anila, “particularly for his dedicated public service in the PCG where he rose through the ranks.

“He led major PCG units, including the Marine Environmental Protection Command and several Coast Guard Districts in different regions across the country.

He served as the Deputy Commandant for Administration before being appointed as the 16th Commandant of the PCG from 2001 to 2003,” sabi pa ng PCG.

Matapos sa PCG, napabilang si Lista sa Philippine National Oil Corporation (PNOC) bilang chairman at CEO.

Ayon pa sa Coast Guard, si Lista ay bahagi rin ng Philippine Merchant Marine Academy (PMMA) Class of 1969 at kinokonsiderang isa sa mga pinakamahuhusay na PMMA graduates na naglingkod sa Philippine Navy (PN) at PCG.

Barko ng China sa Palawan, pinalayas ng PCG

ni Ronalyn Seminiano Reonico | July 19, 2021

Pinalayas ng Philippine Coast Guard (PCG) ang isang Chinese Navy warship sa Marie Louise Bank sa El Nido, Palawan noong nakaraang linggo.

Saad ng PCG, “Base sa report na natanggap ng PCG Command Center noong ika-13 ng Hulyo 2021, na-monitor ng BRP Cabra (MRRV-4409) ang isang ‘navy warship’ na may watawat ng People’s Republic of China at markado ng Chinese character.”

Nagsagawa umano ng radio challenge ang PCG at nilapitan din ng BRP Cabra ang naturang Chinese Navy warship upang ma-monitor ang aktibidad nito sa katubigan.

Saad ng PCG, “Nang walang matanggap na verbal response, ginamit ng BRP Cabra (MRRV-4409), sa pangunguna ni Commander Erwin Tolentino, ang Long Range Acoustic Device (LRAD) para ipahatid ang verbal challenge sa Chinese Navy warship.”

Nang gumalaw umano ang barko palabas ng Marie Louise Bank, sinundan ito ng BRP Cabra (MRRV-4409) upang masiguro na tuluyan na nitong lilisanin ang katubigan.

Nang umabot sa 0.25 hanggang 0.30 nautical miles ang distansiya ng dalawang barko, nagpadala umano ng radio message ang Chinese Navy warship sa BRP Cabra (MRRV-4409).

Sabi umano ng Chinese Navy warship: “Philippine Coast Guard 4409, this is Chinese Navy Warship 189. Please keep two nautical miles distance from me.”

Ngunit ayon sa PCG, hindi tumigil sa pagbabantay ang BRP Cabra (MRRV-4409) sa Chinese Navy Warship hanggang sa tuluyan itong nakalabas ng Marie Louise Bank.

Paglilinaw naman ng PCG, “Ang bawat desisyon at aksiyon ng BRP Cabra (MRRV-4409) ay naka-base sa ‘PCG Manual on Rules on the Use of Force Within the Philippines’ EEZ’. Ito ay para masiguro na ‘rules-based and peaceful approach’ ang ginagamit sa pagtataguyod ng soberanya at pagpoprotekta sa karapatan ng Pilipinas at mga Pilipino sa katubigan.”