Biyahe ng RoRo sa Caticlan, balik-normal na

ni Jasmin Joy Evangelista | December 19, 2021

Balik-normal na ang vessel trip papunta at paalis sa Caticlan jetty port simula alas-5:00, umaga ng Sabado, Disyembre 18.

Ito ay matapos tanggalin ang tropical cyclone wind signal sa Aklan bunsod ng pananalasa ng bagyong Odette.

Ayon kay Chief Master Jackielou Ang ng Philippine Coast Guard (PCG) Aklan, simula kahapon ng umaga ay nakabalik na ang mga biyahe ng Ro-Ro vessel mula sa Caticlan papuntang Batangas, Mindoro at Romblon.

Balik-biyahe na rin ang mga unit ng Caticlan-Boracay Transport Multi-purpose Cooperative (CBTMPC) mula sa isla ng Boracay patawid sa mainland Malay at vice versa.

Samantala, inabisuhan ng PCG-Aklan ang lahat ng mga pasahero na patuloy na sundin ang health, safety, at travel protocols upang maiwasan ang pagkalat ng COVID-19 lalo pa at nakapasok na ang Omicron variant sa bansa.

P-Du30, bibisitahin mga lalawigang hinagupit ng Bagyong Odette

ni Lolet Abania | December 17, 2021

Inanunsiyo ni Pangulong Rodrigo Duterte ngayong Biyernes ng gabi na bibisitahin niya ang mga probinsiya na tinamaan ng Bagyong Odette upang alamin ang kondisyon ng mga tao at buong sitwasyon sa mga lugar doon.

“I’m flying tomorrow to the area, also maybe I would hit Leyte, Surigao and if there is time [in] Bohol and the day after I will try to visit Cebu then dito sa eastern side of the islands,” ani Pangulong Duterte sa isang press briefing.

Ayon kay P-Duterte, nakikipag-usap na siya sa Department of Budget and Management (DBM) para sa paglalaan ng pondo na gagamitin sa tinatawag na calamity-stricken areas, habang giit ng Pangulo na ang funds ay naubos na dahil ito sa COVID-19 pandemic.

Oil spill, posible — PCG... Barko sumadsad dahil sa Bagyong Maring

ni Lolet Abania | October 12, 2021

Nagsagawa ng inspeksiyon ang mga tauhan ng Philippine Coast Guard (PCG) ngayong Martes sa posibleng oil spill matapos na isang barko ang sumadsad sa pantalan sa may baybayin ng Nasugbu, Batangas sa gitna ng matinding alon dulot ng Severe Tropical Storm Maring.

Sa kanilang incident report, ayon sa PCG, lulan ng distressed vessel na LCT Metal Hawk ang 17 crew members nang maka-encounter ng engine trouble ngayong Martes ng umaga.

Gayunman, wala naman sa mga crew member ang nasaktan matapos ang insidente.

Ayon sa PCG, ang naturang barko ay pag-aari at operated ng Marine Vest Company na nakabase sa Surigao del Sur.

Sinabi pa ng PCG, sa salaysay ng kapitan ng barko, ang LCT Metal Hawk ay umalis mula sa Subic Port sa Zambales nitong Oktubre 9 na may kargang 1,000 metric tons ng buhangin na patungo sa Nasugbu Port sa Batangas.

Agad namang rumesponde at nagbigay ng assistance ang PCG Substation Nasugbu at Marine Environmental Protection Group-Batangas at nag-inspeksyon sa lugar dahil sa posibleng oil spill.

Samantala, umabot na sa 11 ang kumpirmadong nasawi dahil sa hagupit ng Bagyong Maring sa Luzon habang pito naman ang naiulat na nawawala. Nabatid mula kay National Disaster Risk Reduction and Management Council (NDRRMC) Executive Director at Undersecretary Ricardo Jalad, Jr., na kabilang sa mga namatay sa bagyo ay mula sa Narra, Palawan na inagos ng flashflood, natabunan nang buhay sa landslide sa La Trinidad, Benguet at pagguho naman sa Itogon, Benguet, nalunod sa Claveria, Cagayan.

Kabilang naman sa mga nawawalang indibidwal ay mula rin sa Narra, Palawan, sa Dominican Minador, sa La Trinidad, at Itogon, Benguet at sa Badoc, Ilocos Norte.