3 patay, 1 nawawala, 2 nasaktan dahil sa Bagyong Agaton — NDRRMC

ni Lolet Abania | April 11, 2022

Tatlo ang iniulat na nasawi, isa ang nawawala, habang dalawa ang kumpirmadong nasugatan dahil sa Tropical Depression Agaton, ayon sa report ng National Disaster Risk Reduction and Management Council (NDRRMC) ngayong Lunes.

Batay sa 3PM report ng NDRRMC, ang dalawang namatay at isang nawawalang indibidwal ay mula sa Monkayo, Davao de Oro, habang ang isa pang nasawi ay mula sa Cateel, Davao Oriental.

Sa isang mensahe sa mga reporters, sinabi ng NDRRMC na ang nai-report na nawawala at dalawang kumpirmadong nasaktan na mula sa Davao Region ay nananatili pa rin sa validation.

Ayon sa NDRRMC, nasa 136,390 indibidwal o 86,515 pamilya ang naapektuhan dahil sa Bagyong Agaton mula sa 201 barangay sa Western Visayas, Central Visayas, Eastern Visayas, Northern Mindanao, Davao, Soccsksargen, Caraga, at Bangsamoro.

Nasa kabuuang 52 kabahayan ang napinsala, kung saan 49 partially habang tatlo totally nawasak sa Central Visayas, Northern Mindanao, at Caraga. Ini-report pa ng NDRRMC na nasa kabuuang P874,000 halaga ang napinsala sa agrikultura mula rin sa Soccsksargen at Bangsamoro.

Nakapagtala naman ng 195 insidente ng pagbaha, 13 landslides, 6 na flash floods, at umapaw na ilog dahil kay ‘Agaton.’ Nasa tinatayang 16 na mga lansangan at apat na tulay ang hindi na madaanan.

Sinabi rin ng NDRRMC na nasa kabuuang 15 lungsod at munisipalidad ang nakaranas ng power interruption, kung saan apat dito ang nai-restored na. Dalawang lugar naman ang nakaranas ng interruption sa suplay ng tubig. May kabuuang 38 pantalan ang sinuspinde ang mga biyahe at operasyon.

Habang nasa kabuuang 2,362 pasahero, 1,180 rolling cargoes, anim na barko, at isang motor banca ang stranded sa ilang mga apektadong rehiyon. Binanggit din ng NDRRMC na nasa kabuuang 78 klase at 56 work schedules ang isinuspinde dahil sa bagyo.

Ayon naman sa PAGASA, bandang ala-1:00 ng hapon ang sentro ng Bagyong Agaton ay tinatayang nasa layong 11.1°N, 125.2°E sa buong coastal waters ng Marabut, Samar.

May maximum sustained winds itong 45 km/h malapit sa sentro, gustiness na aabot sa 60 km/h, at central pressure na 1002 hPa.

Sinabi pa ng PAGASA na kumikilos ang Bagyong Agaton na halos stationary sa buong San Pablo Bay. Gayunman, ang Tropical Cyclone Wind Signal No. 1 ay nananatili pa rin sa mahigit 11 lugar sa bansa.

Pinoy na mangingisda sa Bajo de Masinloc, Zambales, dumarami – PCG

ni Lolet Abania | March 25, 2022

Dumarami na ang mga Pilipinong mangingisda na nagpapalaot sa Bajo de Masinloc, Zambales, ayon sa Philippine Coast Guard (PCG) ngayong Biyernes.

Sa isang pahayag, sinabi ng PCG na naka-monitor sila ng tinatayang 45 na mga bangkang Pinoy, kung saan nangingisda ang mga ito sa bisinidad ng coastal waters ng Bajo de Masinloc, sa kanilang isinagawang maritime operations mula Pebrero 28 hanggang Marso 5.

Ayon kay PCG commandant Admiral Artemio Abu, ang dami ng mga mangingisda ay sadyang nakapagtala ng kagandahan para maitaguyod ang maritime security at maritime safety sa lugar na matatagpuan sa 124 nautical miles west ng Zambales.

“Seeing more Filipino fishing boats in Bajo de Masinloc is a proof of our intensified efforts to safeguard Filipino fishermen who consider fishing as their primary source of livelihood,” sabi ni Abu.

Tiniyak naman ni Abu sa mga mangingisda na patuloy ang PCG sa kanilang ginagawang aktibidad at presensiya sa lugar para maprotektahan ang mga ito at masiguro ang kanilang kaligtasan.

Ayon sa PCG, ang mga tauhan ng BRP Capones (MRRV-4404) ay nagbigay din ng mga relief supplies at COVID-19 kits sa mga mangingisda sa pamamagitan ng “Bayanihan sa Karagatan” program.

Matatandaang ipinahayag ng PCG na noong 2021, mayroong mga kahina-hinalang foreign vessels at sinasabing “nakadaong” na China Coast Guard (CCG) ships sa bisinidad ng karagatan ng Bajo de Masinloc, kung saan ang PCG at ang Bureau of Fisheries and Aquatic Resources (BFAR) ay tinutugunan ang isyu sa pamamagitan ng nababatay na kautusan at mapayapang usapan.

Iginiit naman ni NTF-WPS chairman at National Security Adviser Secretary Hermogenes Esperon na ang mga Pinoy na mangingisda ay dapat na hikayatin na mangisda sa kanilang traditional fishing ground, sa Bajo de Masinloc.

Una nang nagbigay ng direktiba si Department of Transportation (DOTr) Secretary Arthur Tugade sa PCG na ipagpatuloy ang kanilang isinasagawang intensified deployment ng mga assets at personnel sa lugar para maprotektahan ang mga Pinoy na mangingisda.

“The Area Task Force – North of the NTF-WPS provides operational direction for Bajo de Masinloc and Philippine Rise. Our units will continue to augment and support the Area Task Force – North of the NTF-WPS to safeguard Filipino fishermen in the said vicinity waters,” saad ni Abu.

“The PCG is here to be of service to the Filipino people by remaining steadfast in its duty to protect the country’s waters and safeguard every Filipino at sea. This is our commitment to the nation,” dagdag ng opisyal.

133 personnel ng Phil. Coast Guard, may COVID-19

ni Lolet Abania | January 13, 2022

Mahigit sa 100 tauhan ng Philippine Coast Guard ang nagpositibo sa COVID-19, ayon sa PCG ngayong Huwebes.

Batay sa ahensiya, nasa kabuuang 133 officers at personnel ng PCG mula sa national headquarters ang tinamaan ng virus. Sa ngayon, naka-quarantine na ang mga infected personnel.

Gayundin, ang tatlong opisina ng national headquarters ng PCG ay isinailalim sa temporary lockdown dahil na rin sa pagtaas ng COVID-19 cases habang isinara ito mula Enero 10 hanggang 14.

Kabilang sa ini-lockdown ay ang Office of the Deputy Chief of Coast Guard Staff for Comptrollership (CG-6), Coast Guard Public Affairs, at ang Coast Guard Finance Service.

Sinabi ng PCG na ilan sa kanilang mga tauhan na na-deploy sa “one-stop shops” na itinakda ng gobyerno ang mga tinamaan ng COVID-19.

Tiniyak naman ng ahensiya na lahat ng infected employees ay nabibigyan nila ng medical assistance habang agad nilang pinalitan ng mga bagong grupo ng personnel para hindi maantala ang kanilang operasyon.