PhilHealth members hinikayat na gamitin ang PhilHealth member portal

by Info @Brand Zone | October 17, 2023

Bunsod ng data breach na nagdulot ng pansamantalang manual operations, hinikayat ng Philippine Health Insurance Corporation (PhilHealth) na gamitin ang PhilHealth Member Portal para ma-check nang ligtas ang kanilang membership at contribution record.

Maliban sa pag-access ng membership at contribution record, maaari ring magbayad ng kontribusyon ang mga self-paying members sa Member Portal at magparehistro sa accredited Konsulta providers para makagamit ng Konsulta Package. Kung sakaling kailanganin ng mga miyembro ang kopya ng kanilang Member Data Record (MDR), madali din nila itong ma-download sa Portal at ma-print sa pamamagitan ng Portal link na https://memberinquiry.philhealth.gov.ph/member/.

Pinaalalahanan din ng PhilHealth ang mga miyembro na maging maingat at siguraduhing opisyal na website lamang ang ia-access at ito ay ang https://www.philhealth.gov.ph. Idinagdag pa ng ahensya na ang website ay may domain na gov.ph at hindi .com o .net. Ang website connection ay dapat nagsisimula sa tag na https (hypertext transfer protocol secure) at may naka-display na padlock connection secure icon sa gawing kaliwa sa itaas na bahagi.

Para sa mga bagong gagamit ng Member Portal, kailangang gumawa ng sariling account gamit ang kanilang PhilHealth Identification Number (PIN) at mag-assign ng malakas na password. Makatatanggap sila ng confirmation sa kanilang email address at kapag natanggap na ng PhilHealth ang confirmation, maaari na nilang magamit ang serbisyo ng Portal.

Samantala, pinaalalahanan din ang partner health facilities nito na maaari na nilang ma-access ang Health Care Institution Portal. Dahil dito, hindi na kailangang magdala ng printed MDR ang mga miyembro upang makagamit ng mga benepisyo.

Siniguro rin ng ahensya na lahat ng Filipino, rehistrado man o hindi, ay may karapatang makinabang sa mga benepisyo alinsunod sa Universal Health Care Act. Habang patuloy na ibinabalik ang frontline systems, ang mga hindi pa rehistradong miyembro o walang PIN ay dapat magsumite ng accomplished PhilHealth Member Registration Form (PMRF) kasama ang mga supporting document sa health facility upang makagamit ng mga benepisyo.

Muling umapela si PhilHealth Chief Emmanuel R. Ledesma, Jr. sa publiko na manatiling kalmado at mapagmatyag laban sa posibleng phishing attacks. Hinikayat din niya ang mga miyembro na magpalit ng bago at matibay na password, at huwag itong ipagsabi sa ibang tao.

“Mag ingat din po tayo sa mga nag-aalok online na sila na ang mag-aasikaso o kukuha ng inyong PhilHealth ID o MDR kapalit ng bayad. Una, wala pong bayad ang ID at MDR. Ikalawa, wala tayong ino-authorize na mag-ahente sa PhilHealth. Delikado po ito dahil makokompromiso ang inyong personal details" babala ni Ledesma sa mga miyembrong pumapatol sa ganitong alok sa social media.

Muli niyang inihayag ang abiso ng mga eksperto na huwag pansinin at i-click ang mga kaduda-dudang link. “Pinakamabuting iwasan ang mga kahina-hinalang tawag at burahin ang mga text o email mula sa hindi kilala at kahina-hinalang senders upang maiwasang mabiktima ng mga scammer,” wika pa niya.

---

Benepisyong handog ng PhilHealth!

Protektahan natin ang kalusugan ng bawat Filipino.

Para sa detalye: Maaaring bisitahin ang official website ng PhilHealth sa www.philhealth.gov.ph. CALLBACK CHANNEL: 0917-8987442 (I-text ang "PHIC callback <space> mobile number o Metro Manila landline ninyo <space> tanong o concern" at kami ang tatawag sa inyo.)

PhilHealth, nanawagan laban sa data breach

by Info @Brand Zone | October 9, 2023

Muling umapela ang Philippine Health Insurance Corporation (PhilHealth) sa publiko na maging mapagmatyag at gumawa ng mga hakbang bilang pag-iingat laban sa iba't ibang uri ng mapanlinlang na aktibidad dulot ng ransomware attack noong Setyembre 22, 2023.

Ayon sa state-insurer, nagsimula na umano ang mga hacker sa pagpapakalat ng datos na nakuha mula sa mga workstation ng mga empleyado ng PhilHealth. Upang matulungang maprotektahan ang mga miyembro mula sa pagiging biktima ng mga oportunista, mariing inirekomenda ng PhilHealth ang pagpapalit ng password sa mga online account, pagkakaroon ng multi factor authentication, pagsubaybay sa mga kahina-hinalang aktibidad sa kanilang online accounts, hindi pagbubukas at pag-click sa mga kahina-hinalang email at link, at hindi pagsagot sa mga kaduda-dudang tawag at text messages.

"Gamit ang ninakaw na data, malamang na target ng mga hacker ang mga miyembro sa pamamagitan ng mga tawag, email o text message. Sundin po natin ang payo ng mga awtoridad na huwag mag click sa mga kaduda-dudang link o magbigay ng mga password o OTP. Mas mainam na huwag pansinin ang mga kahina-hinalang tawag, at sa halip ay burahin na lang ang text o email mula sa hindi kilala at kahina-hinalang nagpadala," paalala ng PhilHealth Chief na si Emmanuel R. Ledesma, Jr.

Umapela rin ang state health insurer na iwasang ikalat ang leaked data dahil mayroon itong parusa sa ilalim ng batas. Kamakailan lamang ay sinabi ng mga awtoridad na posibleng umabot sa 20 taong pagkabilanggo ang mga hackers, habang ang sinumang indibidwal o organisasyon na mapatutunayang nag-download, nag-proseso o nag-bahagi ng naturang nakaw na data ay mananagot din dahilan sa hindi awtorisadong pagproseso ng personal na impormasyon at maaaring humarap sa kasong kriminal.

Iginiit pa ng PhilHealth na malugod at handa itong harapin ang anumang pagdinig na ipapatawag ukol sa nasabing insidente. Lubos na nakikipagtulungan din ang PhilHealth sa mga ahensyang nagsasagawa ng imbestigasyon tulad ng National Privacy Commission, National Bureau of Investigation at Philippine National Police.

“Bilang responsable sa mga impormasyon ng ating mga miyembro, nakahanda po kaming makipagtulungan sa mga imbestigasyon para lalong mapagbuti ang aming cybersecurity system. Makakaasa po ang publiko na may malaking kabutihang dulot ang pangyayaring ito para maging mas mabuti ang ating serbisyo sa miyembro,” diin pa ni Ledesma.

Ipinahayag din ng PhilHealth na nito lamang Oktubre 06, 2023, 100 porsiyento ng mga aplikasyon na ginagamit ng publiko o public facing apps ay nagbalik na kabilang dito ang website, Member Portal, eClaims para sa electronic submission ng mga claim sa ospital, at EPRS para sa mga remittance ng employer. Ang mga application server naman na tumutugon sa mga serbisyo sa frontline ay inihahanda na rin upang magbalik normal ang operasyon.

PhilHealth nanawagan laban sa mga malisyosong post sa social media

by Info @Brand Zone | October 4, 2023

Para maiwasan ang pagkalat ng personal na impormasyon kasunod ng ransomware incident noong Setyembre 22, nanawagan ang Philippine Health Insurance Corporation (PhilHealth) sa publiko na maging mapagmatyag at maging mas maingat sa mga malisyosong post na kanilang makikita sa internet at social media.

Sa press briefing kamakailan ay nagbabala ang state health insurer sa posibleng paglalabas ng mga maling impormasyon, kasinungalingan at black propaganda para masamain ang gobyerno.

“Ang intensyon nila ay ipakita na sila ay mga bayani,” babala ni PhilHealth President and CEO Emmanuel R. Ledesma, Jr. na humingi rin ng tulong sa media para babalaan ang publiko laban sa panlilinlang ng mga hackers.

Inabisuhan din ni Ledesma ang publiko laban sa pagbubukas, pag-post at pag-share, sa halip ay i-report kaagad ang mga nakitang sensitibong impormasyon online at social media sa PhilHealth at sa Department of Information and Communications Technology (DICT) para maiwasan ang pagkalat nito. Maaaring mag-email sa: phic.dpo@gmail.com at phic.actioncenter2023@gmail.com.

Tiniyak ng PhilHealth na ginagawa nito ang lahat para maibalik ang iba pang systems kasama ang HCI portal at application servers pagkatapos ng security testing. Matatandaang naibalik na sa normal ang website, Member Portal at e-Claims nito noong Biyernes, Setyembre 29, 2023.

“Batid namin na nagdulot ito ng abala sa aming mga miyembro at stakeholders. Para mapagaan ang epekto nito, agad kaming naglabas ng advisories upang matiyak ang patuloy na serbisyo at mga benepisyo ng mga miyembro,” pagtitiyak ng hepe ng PhilHealth. Binigyang diin niya ang walang patid na commitment ng ahensya sa pag-iingat sa privacy at impormasyon ng mga miyembro.

Sabi pa niya, “Patuloy na nagsasagawa ng imbestigasyon ang PhilHealth katuwang ang DICT at National Privacy Commission, National Bureau of Investigation, at Philippine National Police. Kami ay nangangako na susuporta sa mga ahensyang ito para mapanagot ang mga may sala.”

Hinimok din niya ang ilang mga grupo na iwasan ang pagkakalat ng mga maling impormasyon para maiwasan ang kaguluhan at kalituhan, at kung may hawak na impormasyong may kinalaman dito ay makipag-ugnayan agad sa mga awtoridad.