Umento sa PhilHealth benefits, aarangkada sa 2024

by Info @Brand Zone | November 21, 2023

Nakatakdang itaas ng Philippine Health Insurance Corporation (PhilHealth) ng hanggang 30 porsiyento ang bulto ng mga benefit packages nito na inaasahang magpapababa nang malaki sa gastos ng mga pasyente sa pagpapa-ospital.

Ayon sa ahensya, nakaambang ilabas sa susunod na taon ang pinagbuting pakete sa bawat kondisyon, sakit o operasyon, bunsod na rin ng inflation o pagtaas ng presyo ng mga bilihin, kasama na ang gastusing medikal.

Ayon kay Emmanuel R. Ledesma Jr., Pangulo at Punong Tagapagpatupad ng PhilHealth, magpapatupad ang PhilHealth ng variable inflation adjustment kung saan mas malaki ang umento habang tumataas ang antas ng isang pasilidad.

Magpapatupad din ng cost-sharing mechanism ang ahensya kung saan magkakaroon ng fixed co-payment para sa pasyente matapos maibawas ang benepisyo ng PhilHealth. "Sa mekanismong ito ay magiging episyente ang pagbibigay ng serbisyong medikal at mapaghahandaan naman ng mga miyembro ang kanilang babayaran para sa dagdag na serbisyo at amenities na nais nilang gamitin habang naka-confine," ani Ledesma.

Idinagdag pa niya na ang malawakang umento sa mga benepisyo ay iba pa sa mga naunang hakbangin sa pagpapalawak ng mga benepisyo ngayong taon. "Ito po ang tugon ng PhilHealth sa panawagan ni Pangulong Ferdinand Marcos Jr., Kongreso at mga grupo ng mga pasyente na gawing mas kapaki-pakinabang ang mga benepisyong medikal para sa mga miyembro sa buong bansa".

Matatandaan na ngayong 2023 ay ipinatupad ng PhilHealth ang dagdag na hemodialysis mula 90 patungo sa 156 sessions. Itinaas din ang bayad sa acute stroke mula P28,000 hanggang 76,000 para sa ischemic stroke at mula P38,000 hanggang P80,000 para sa hemorrhagic stroke. Bukod dito ay inilunsad din ang Outpatient Mental Health Package nito lamang Oktubre. Nakatakda ring itaas ang bayad sa high-risk pneumonia bago matapos ang taong 2023, at ang Z Benefits sa breast cancer sa susunod na taon kung saan aabot sa P1 milyon ang ilalaang benepisyo para sa kwalipikadong breast cancer patients kada taon.

---

Benepisyong handog ng PhilHealth!

Protektahan natin ang kalusugan ng bawat Filipino.

Para sa detalye: Maaaring bisitahin ang official website ng PhilHealth sa www.philhealth.gov.ph. CALLBACK CHANNEL: 0917-8987442 (I-text ang "PHIC callback <space> mobile number o Metro Manila landline ninyo <space> tanong o concern" at kami ang tatawag sa inyo.)

Senior at PWD discount, dapat ibawas sa ospital — PhilHealth

by Info @Brand Zone | November 13, 2023

Nagpaalala kamakailan ang Philippine Health Insurance Corporation (PhilHealth) sa kanilang mga accredited health facility sa buong bansa na dapat agad ibawas ang diskwento ng mga senior citizen at person with disability sa kanilang medical bills bago magbayad at lumabas ng ospital.

“Nakatanggap ang PhilHealth ng mga ulat na may mga pasilidad na hindi nagbabawas ng diskwentong ito kaya naman naglabas kami ng PhilHealth Advisory 2023-0036 para magpaalala sa aming mga partner hospital”, ani Emmanuel R. Ledesma, Pangulo at Punong-Tagapagpatupad ng PhilHealth.

Ang nasabing diskwento ay itinakda ng Republic Acts 9994 o Expanded Senior Citizens Act, at 10754 o Expanded Benefits and Privileges of Persons with Disability Act. Ang mga naturang diskuwento ay dapat ibawas sa hospital bill sang-ayon na rin sa Performance Commitment ng mga pasilidad sa PhilHealth.

“Kailangan nating ibigay anoman ang mandato ng batas at kabilang dito ang mga pribilehiyo bilang senior citizen o PWD. Ang mga ito ay dapat maibawas sa kanilang mga bayarin sa ospital”, giit ni Ledesma. Nilinaw naman ng ahensiya na sa mga pasyenteng senior citizen na at PWD pa, isang diskwento lamang ang puwedeng magamit.

Narito naman ang pagkakasunod-sunod ng pagbawas ng mga diskwento: Unang ibabawas ang 12% VAT exemption, kasunod ng 20% senior citizen o PWD discount, pagkatapos ay ang PhilHealth benefits. "Iyun pong balanse ang siya na lamang dapat na bayaran ng pasyente kung mayroon pa, at makikita ito sa kanilang billing statement. Kung ang ating senior citizen member ay na-admit naman sa mga pampublikong pasilidad ay wala na silang babayaran dahil sa No Balance Billing policy", paliwanag pa ni Ledesma.

Sakaling hindi magbawas ng mga naturang pribilehiyo ang mga health facility, maaari silang sampahan ng karampatang parusa, kabilang ang multa at pagsususpinde o pagbawi ng kanilang accreditation.

Hinikayat din ng ahensya ang mga miyembro at concerned citizens na agad i-report ang ganitong insidente sa Office of Senior Citizens Affairs sa kanilang LGU o sa National Council for Disability Affairs. Maaari ding mag-report sa PhilHealth Callback Channel 0917-898-7442, Facebook page (@PhilHealthofficial) o X (@teamphilhealth).

"Igiit natin ang ating karapatan dahil ang mga ito ay itinakda ng mga batas. Kami naman ay nakahandang umaksiyon sakaling may mga ulat kaming matatanggap mula sa ating mga miyembro tungkol dito", tugon pa niya.

---

Benepisyong handog ng PhilHealth!

Protektahan natin ang kalusugan ng bawat Filipino.

Para sa detalye: Maaaring bisitahin ang official website ng PhilHealth sa www.philhealth.gov.ph. CALLBACK CHANNEL: 0917-8987442 (I-text ang "PHIC callback <space> mobile number o Metro Manila landline ninyo <space> tanong o concern" at kami ang tatawag sa inyo.)

Outpatient mental health benefits package, inilunsad ng PhilHealth

by Info @Brand Zone | October 23, 2023

Inanunsyo ng Philippine Health Insurance Corporation (PhilHealth) ang bagong benepisyo nito para sa outpatient mental health package kasabay ng paglulunsad ng 2024-2028 Strategic Framework ng Philippine Council for Mental Health kamailan.

Kasabay nito ang pakikipagkasundo ng PhilHealth na pinangunahan ni PhilHealth Vice President for NCR Dr. Bernadette Lico at Dr. Noel Reyes ang hepe ng National Center for Mental Health upang maipatupad ang nasabing benefit.

Ayon sa Republic Act No. 11036, o ang Mental Health Act, ang batas na sumasaklaw sa paggagamot sa mga taong may sakit sa pag-iisip, tungkulin ng PhilHealth na magbigay ng mga benepisyo para sa mga Filipino na mangangailangan ng mental health services.

“Ang PhilHealth ay magpapatupad ng progresibong mental health package na magbibigay sa mga miyembro pati na sa kanilang dependents, ng mga benepisyong tutugon at makasisigurong mayroon silang financial risk protection habang sila ay nagpapagaling sa anxiety at depresyon.”, pahayag ni Emmanuel R. Ledesma, Jr, Pangulo at Punong Tagapagpatupad ng PhilHealth.

Inilathala ng state health insurer ang panuntunan ng benepisyo para sa mental health noong Oktubre 12, 2023. Sa nasabing pakete covered na ang konsultasyon, diagnostic follow-up, psychoeducation, at psychosocial support na malapit nang mapakinabangan sa mga accredited na pasilidad na may serbisyo para sa mental health outpatient.

Ang PhilHealth mental health package ay nahahati sa dalawa: general mental health services packages na nagkakahalaga ng P9,000 at specialty mental health services packages na nagkakahalaga ng P16,000 taon-taon.

Maaaring makagamit ng benepisyo ang isang indibidwal na may 10 taong gulang pataas na nangangailangan ng psychiatric services. Samantala, walang limitasyon sa edad para sa mga nangangailangan ng neurological services.

Nilalayon ng gobyerno na mapigilan ang maagang pagkamatay ng mga tao at mapabuti ang kalidad ng buhay ng mga Filipino na may sakit sa pag-iisip. Pinagbubuti ng ahensya ang paghahatid ng accessible mental health services para mapigilan ang stigmatization at diskriminasyon.

Nananawagan din ang PhilHealth sa mental health facilities sa buong bansa na magpa-accredit upang masiguro na ang mental health services ay mailapit sa mga tao. “Sama-sama nating isulong ang mental health sa ating mga Kababayan, hindi lang sa kalunsuran kundi pati na sa rural na lugar.” sabi ni Ledesma.

---

Benepisyong handog ng PhilHealth!

Protektahan natin ang kalusugan ng bawat Filipino.

Para sa detalye: Maaaring bisitahin ang official website ng PhilHealth sa www.philhealth.gov.ph. CALLBACK CHANNEL: 0917-8987442 (I-text ang "PHIC callback <space> mobile number o Metro Manila landline ninyo <space> tanong o concern" at kami ang tatawag sa inyo.)