Unli PhilHealth coverage para sa cancer, isinusulong

ni Eli San Miguel - Trainee @News | February 6, 2024

Kailangang sagutin ng Philippine Health Insurance Corp. (PhilHealth) ang lahat ng mahalagang proseso para sa cancer at heart surgery nang walang limitasyon, ayon kay AGRI Party-list Rep. Wilbert T. Lee, na nagsulong ng 30% na pagtaas sa mga benepisyo ng ahensya.

“Tinututukan ko po ito, hindi tayo hihinto sa 30 percent increase sa benefits na ipinaglaban natin,” pangako ni Lee.

Binanggit niya na maaaring magkahalaga ang paggamot sa mga karamdamang ito ng milyon-milyon, ngunit nag-aalok lamang ang PhilHealth ng 150,000 hanggang 600,000 piso para sa buong proseso ng gamutan.

“In the case of cancer, alam naman natin na ang gamutan diyan, hindi pwedeng installment. Gusto natin gawin itong unlimited. Dapat full coverage; kung ano ang kailangang gamutan sa cancer, kailangan sagot lahat ng PhilHealth ‘yan,” sabi ng mambabatas.

“Because there are so many cases, na kahit doble ang itaas ng coverage, kakapusin pa rin sa pambayad ang mga miyembro,” dagdag niya.

30% increase sa PhilHealth benefits, aprub na

ni Eli San Miguel - Trainee @News | January 19, 2024

Inaprubahan na ng Board of Directors (BOD) ng Philippine Health Insurance Corporation (PhilHealth) ang 30% na pagtaas sa mga benepisyo nito, na inirekomenda ni AGRI Partylist Rep. Wilbert T. Lee.

"Sa wakas, 'yung ipinaglalaban natin na 30% increase sa PhilHealth benefits, aprubado na," pahayag ni Lee.

"Malaking tulong ang dagdag na suportang ito ng PhilHealth sa pagpapagamot o pagpapaospital ng milyun-milyong Pilipino,” dagdag niya.

Sa kanyang liham na isinulat para kay PhilHealth President and Chief Executive Officer Emmanuel Ledesma, Jr. at sa kanyang inihain na House Resolution No. 1407, iginiit ni Lee sa pamunuan ng PhilHealth na ipatupad ang 30% na pagtaas sa lahat ng benepisyo at saklaw nito.

“Dahil sa inflation, nagtaasan na lahat ng presyo—pagkain, tubig, petrolyo, gamot, pati mga bayad sa serbisyo, kasama ang pagpapaospital. Kaya dapat lang na mag-adjust na ang PhilHealth sa sinasagot nitong mga bayarin para mas makatulong sa mga miyembro,” aniya.

Binigyang-diin pa niya na, “kapag nagkasakit, marami ang hindi nakakapagtrabaho, walang kita, nagagalaw ang budget para sa ibang pangangailangan, nauubos ang ipon at nalulubog sa utang. Kaya bukod sa sakit, lalo pang sumasama ang pakiramdam ng marami sa atin dahil sa mga dagdag na gastusin.”

Matatandaan na noong pagsusuri ng budget ng Department of Health noong Setyembre 2023, nagtagumpay si Lee na ibunyag ang P466 bilyong investible funds at P68.4 bilyong net income ng PhilHealth.

Bukod dito, ipinanawagan din niya ang epektibong implementasyon ng No Balance Billing policy upang bawasan ang "out-of-pocket expenses" para sa mga pasyente at kanilang mga pamilya.

PhilHealth, ginawaran ng ISO 9001:2015 certification

by Info @Brand Zone | December 14, 2023

Muling nakamit ng Philippine Health Insurance Corporation (PhilHealth) ang ISO 9001:2015 certification para sa Quality Management System (QMS) matapos ang masusing third party audit na isinagawa sa mga tanggapan nito sa buong bansa ngayong taon.

Ang nasabing sertipikasyon ay isang pandaigdigang pamantayan para sa quality management ng isang organisasyon, ahensiya o kumpanya. Sumasalamin ito sa mabuti at maayos na mga sistema na siyang daan para makapagbigay ng de-kalidad na serbisyo sa kanilang mga kliyente at stakeholders.

Bunsod nito ay pinuri ni PhilHealth President and CEO Emmanuel R. Ledesma, Jr. ang mga opisyal at kawani ng PhilHealth sa masikap na pagpapatupad ng quality management system sa operasyon ng ahensiya. Aniya, “Ang sertipikasyong ito ay hindi lang isang karangalan (bagkus) patunay ng aming commitment sa mahusay na pamamalakad, pagpapabuti ng serbisyo at dedikasyon sa paggawa ”. Ipinangako niya na tuloy-tuloy ang pagsasagawa nito para sa kapakanan ng lahat ng miyembro sa buong mundo.

Makikita sa larawan sina Ledesma, Jr. (gitna) habang tinatanggap ang ISO 9001:2015 Certification mula sa SOCOTEC Philippines Inc. Operations Director Gilmore Rivera sa isang simpleng seremonya nitong Disyembre 2023 sa Pasig City. Kasama rin niya sina (mula kaliwa) Acting Vice President for PRO III and Concurrent Senior Manager for Organization and Systems Development Office Henry V. Almanon, Senior Vice President for Legal Atty. Jose Mari F. Tolentino, at Vice President for Arbitration Atty. Jay R. Villegas.