30% na dagdag sa benepisyong PhilHealth, magagamit sa libu-libong accredited facilities sa bansa!

by Info @Brand Zone | August 9, 2024

Photo: PhilHealth / FB

Pinatupad ng PhilHealth ang pagtataas sa Case Rates noong Pebrero 14, 2024, kasabay ng ika-29 anibersaryo nito. Bilang suporta sa mga mamamayang apektado ng pagtaas ng mga presyo dahil sa inflation, minarapat ng ahensyang i-adjust ang halaga ng mga benefit packages nito matapos ang isang dekada. Ang mga ito ay magagamit sa lahat ng PhilHealth-accredited facilities sa bansa – mula sa Levels 1-3 hospitals hanggang sa mga infirmaries at animal bite package providers.

Magkano na ngayon ang halaga ng Case Rates?

Halimbawa, ang pakete sa emphysema ay dating P11,400. Kapag dinagdagan ng 30% nito o P3,420 ay P14,820 na. Ganoon din sa iba pang inpatient at outpatient cases.

Pero dapat tandaan na hindi na i-a-adjust ang mga benepisyong na-adjust na sa nakalipas na limang taon tulad ng hemodialysis na kamakailan lang ay itinaas sa P4,000 ang coverage kada session mula sa dating P2,600. Pati narin iyong mga pinag-aaralang palakihin at mga bagong benefit package tulad Outpatient Mental Health Benefits Package.

Paalala pa ng PhilHealth, na hindi dapat singilin ng dagdag-bayad ang pasyente kapag siya ay na-confine o ginamot sa public/ward accommodation ng pampubliko o pribadong pasilidad. Ibig sabihin, sagot na ng Case Rates ang kabuuang hospital bill.

Magkakaroon lang ng dagdag bayarin kapag pinili ng pasyenteng ma-confine sa private room at gumamit ng mga serbisyong hindi kailangan para gamutin ang kaniyang karamdaman.

Makaaasa ang lahat ng Filipino na patuloy ang ginagawang pagpapabuti ng inyong PhilHealth sa National Health Insurance Program para masiguro ang kapanatagan ng loob ng lahat kapag humaharap sa gastusing medikal. Para sa kumpletong listahan ng mga medical at procedure Case Rates na saklaw ng 30% adjustment, mag-login sa

www.philhealth.gov.ph

PhilHealth Member Portal, nasa eGovPH app na

by Info @Brand Zone | July 15, 2024

Inanunsyo kamakailan ng Department of Information and Communications Technology (DICT) at Philippine Health Insurance Corporation (PhilHealth) na kasama na ang PhilHealth Member Portal sa eGovPH mobile app. Dahil dito, mas mabilis at ligtas na ang pagkakaroon ng access ng publiko sa iba’t-ibang serbisyo ng PhilHealth kailan man at saan man sa mundo. 

Sa eGovPH mobile app, maaari nang makita ng miyembro ng PhilHealth ang kanyang membership record, benepisyaryo, bilang ng kontribusyon, at benefit availment history. Maaari ring makita ang listahan at magparehistro sa napiling Konsulta Package Provider. 

Ayon kay DICT Secretary Ivan John E. Uy, ito ay alinsunod sa Ease of Doing Business Act at sa direktiba ni Pangulong Ferdinand R. Marcos Jr. noong nakaraang State of the Nation Address na pabilisin ang digitalization efforts ng gobyerno para sa mas pinagbuting serbisyo publiko. 

Pinasalamatan naman ni PhilHealth President and CEO Emmanuel R. Ledesma, Jr. ang DICT at sinabing ang “transformative endeavor” na ito ay isang malaking hakbang tungo sa pagpapalaganap ng digitalization. “Ang direktibang ito ay gabay upang mas pagbutihin ang serbisyo ng PhilHealth sa mga miyembro nito. Ngayon, sa ilang click lang ay may kapasidad na ang mga miyembro na makagamit ng serbisyo nang walang kahirap-hirap,” ayon kay Ledesma. 

Upang magamit ang PhilHealth Member Portal, kinakailangang mag-download ng eGovPH app, mag-sign up hanggang sa ma-verify ang account. Kung verified na ang account, maaari nang mag log-in sa eGovPH app anomang oras gamit ang kanilang mobile number.

PhilHealth, planong gamitin ang Artificial Intelligence para lalong bumilis ang pagbabayad sa mga ospital

by Info @Brand Zone | June 26, 2024

Lumagda kamakailan ang PhilHealth at Pulse 63 HV Philippines (SwiftClaims) sa isang Proof of Value Agreement para sa paggamit ng isang software na gumagamit ng Artificial Intelligence o AI na idinisenyo ng huli upang lalo pang mapahusay at mapabilis ang pagproseso ng health insurance claims sa ahensiya.

Ang nasabing kasunduan ay naglalayong bawasan ang oras ng pagproseso ng mga claim, gayundin ang mabawasan ang claims na ibinabalik sa mga health facilities dahil sa iba't-ibang dahilan gaya ng kakulangan ng mga dokumento, at iba pa.

Inaasahang ipoproseso ng AI-powered system ang mga claim in real-time, ilalapat ang mga tuntunin alinsunod sa mga patakaran at alituntunin ng ahensya, at iba pa. Kasama sa mga inaasahang resulta ay ang pag-aalis sa manual intervention at mabilisang pag-apruba at pagbabayad ng mga itinuturing na “clean claims” sa mga partner health facilities.

Pumirma sa kasunduan sina (mula kaliwa) PhilHealth Chief Information Officer Jovita Aragona, President and CEO Emmanuel R. Ledesma, Jr. at Pulse 63 HV Philippines (SwiftClaims) Chief Executive Officer Louis Kweyamba Maguru at Deputy Managing Director Arvind Appavu.