PGH, tatanggap na ulit ng may COVID-19

ni Ronalyn Seminiano Reonico | May 17, 2021

Tatanggap na muli ang Philippine General Hospital (PGH) ng mga COVID-19 patients sa Martes matapos ang pinsalang idinulot ng sunog na nagmula sa ikatlong palapag ng ospital noong Linggo.

Pahayag ni Hospital Chief Gerardo Legaspi, “Tuluy-tuloy ang pagtanggap sa COVID patients pero humingi ako ng isang araw lang na itigil muna ang pag-transfer hangga’t ma-stabilize ang paglipat ng pasyente at ‘yung amoy ng usok [matanggal] kasi kahit papaano, may amoy pa rin ang wards, eh.

“Kini-clear up namin ‘yung amoy ng usok bago punuin ng pasyente. Itong araw na ito, baka hindi pa kami makakalipat ng pasyente, but tomorrow, we will resume accepting COVID-19 patients in PGH.”

Ayon kay Legaspi, aabot sa 30 pasyente na positibo sa COVID-19 ang naapektuhan ng insidente at kinailangang ilipat sa ibang area ng ospital.

Samantala, aabutin umano ng 3 hanggang 4 na buwan bago makabalik sa normal operations ang bahagi ng ospital na naapektuhan sa insidente, particular na ang limang sterilization units.

“Ang tantiya po namin, mababalik ang normal operation ng ORSA, siguro mga tatlo o apat na buwan po, with the construction considered,” ani Legaspi.

ER ng PGH, isinara dahil sa sunog

ni Ronalyn Seminiano Reonico | May 16, 2021

Pansamantalang isinara ang emergency room (ER) ng Philippine General Hospital (PGH) at hindi muna tatanggap ng mga pasyenteng ia-admit dahil sa naganap na sunog ngayong Linggo nang madaling-araw, ayon sa spokesperson ng ospital.

Pahayag ni Spokesperson Dr. Jonas del Rosario, "Pakiusap po muna, sarado ang PGH ng pag-admit ng kahit ano... Sarado ang ER ng PGH starting today.” Nagsimula ang sunog sa linen area ng operating room sterilization area (ORSA) ng ikatlong palapag ng ospital.

Ayon kay Del Rosario, sinubukang apulahin ang apoy ng staff ng ospital ngunit nabigo ito. Mabilis namang inilikas ang mga pasyente. Saad ni Del Rosario, "'Yung iba, nasa chapel, sa driveway, sa quadrangle, sa corridor.

'Yung mga sanggol, bagong panganak, kailangan nasa nursery, inilipat namin ‘yung 12 na babies sa Sta. Ana Hospital. "May ilan ding pediatric patients na inilipat sa ibang private hospitals.”

Dahil inilikas din ang mga pasyenteng positibo sa COVID-19, siniguro rin ng pamunuan ng ospital na hindi sila masama sa iba pang pasyente.

Saad pa ni Del Rosario, "Na-secure sila at we made sure na hindi mahalo sa non-COVID patients.” Idineklarang fire out kaninang alas-5:41 nang umaga.

Wala namang nasawi sa insidente at ang ibang pasyente ay nakabalik na sa kanilang kuwarto. Samantala, inaalam pa rin ng awtoridad ang sanhi ng sunog.

1 positibo sa South African variant ng COVID-19... Mga pasyente sa PGH, pinalilipat sa ibang ospital

ni Lolet Abania | March 7, 2021

Umapela ang Philippine General Hospital (PGH) sa publiko na lumipat na ang ilang pasyenteng tinamaan ng coronavirus sa ibang COVID-19 referral facilities dahil sa tumataas na bilang ng mga kaso nito, kabilang ang isang patient na nagpositibo sa South African variant.

Sa ngayon, ang PGH ay mayroong 105 pasyenteng naka-confine sa kanilang charity habang sa pay ward ay mayroong 200-bed capacity. Ang intensive care unit (ICU) din ng ospital ay limitado lamang ang kapasidad.

"Nakikiusap din kami, tulungan, kami naman ay isang buong sistema, na 'yung ibang pasyente, baka puwedeng ilipat sa ibang COVID referral centers kung may bakante naman sila, lalo na kung minsan sa ICU," ani PGH spokesperson Dr. Jonas Del Rosario sa isang interview ngayong Linggo.

"Ang kawawa rin diyan ay 'yung mga pasyente na non-COVID patients namin dahil 'pag lumalaki 'yung COVID operations, lumiliit naman 'yung non-COVID operations," dagdag ni Del Rosario.

Ang panawagan ni Del Rosario ay kasunod ng naiulat na may isang nagpositibo sa South Africa variant ng COVID-19 sa ospital, kung saan patuloy na ginagamot habang nasa isolation.

"Wala pong severely ill, all are mildly symptomatic and some are asymptomatic. We have to recalibrate our measures, maaaring may mga areas na naging lax ang mga tao, so lahat 'yan, pinag-aaralan," sabi ni Del Rosario.

"It's a red flag and as you know, 'yung South Africa variant is something na napapabalita na easily transmissible right, very contagious, so we want to make sure na ma-contain talaga namin," ani pa ng doktor.