93 healthcare workers ng PGH na na-quarantine, balik-trabaho na – NTF

ni Lolet Abania | January 16, 2022

Halos isang daang fully vaccinated nang healthcare workers ng Philippine General Hospital (PGH), ang nakabalik na sa kanilang trabaho limang araw matapos na tamaan o ma-expose sa COVID-19.

Sa isang radio interview ngayong Linggo, sinabi ni National Task Force (NTF) Against COVID-19 medical adviser Dr. Ted Herbosa na ang bilang ng mga medical frontliners sa PGH ay nagdagdagan matapos ang halos 100 sa kanila ay ma-infect ng virus noong nakaraang linggo.

“Luckily, noong ginawa itong shorter quarantine period ay parang nakabalik ang about 90, 93 personnel agad,” sabi ni Herbosa, subalit aniya, nagpapatuloy pa rin ang impeksyon ng virus sa mga personnel ng PGH.

“’Yung dating protocol natin nakapaka-strict, ma-expose ka lang, 10 days ka nang ‘di pupunta sa ospital, ngayon ‘pag wala kang sintomas, pwedeng magtrabaho,” ani Herbosa.

Matatandaang noong Enero 7, inaprubahan ng Inter-Agency Task Force (IATF) ang pagpapaiksi ng isolation at quarantine periods para sa mga fully vaccinated health workers na na-infect o na-expose sa COVID-19.

Ginawa ng IATF ang anunsiyo ng bagong isolation protocol matapos ang mga naging isyu sa mga ospital na nagkukulang na ang kanilang mga staff habang tumataas ang COVID-19 infections.

Ayon kay PGH spokesperson Dr. Jonas del Rosario, simula pa lang ng taong 2022 ay tinatayang 1,100 healthcare workers na ng PGH ang na-infect ng COVID-19 na karamihan sa kanila ay nakararanas ng mild symptoms.

Paliwanag pa ni Herbosa, na ang mga COVID-19 vaccines ay hindi para huwag tamaan ng virus, kundi upang mabawasan ang tiyansa na mamatay o maospital dahil naturang sakit.

Payo niya sa publiko na patuloy na magsuot ng face masks at iwasan ang mga crowded areas para mapigilan na mahawahan ng virus.

“Mag-ingat tayo kasi madaming Omicron cases pa rin at puno ang mga ospital. So, ‘pag naospital ka, maghahanap ka rin ng ospital para makapasok kasi medyo napupuno na, naguumpisa nang mapuno ang ating mga ospital,” sabi pa ni Herbosa.

250 health workers ng PGH, may COVID-19

ni Lolet Abania | January 8, 2022

Nasa tinatayang 250 healthcare workers ng Philippine General Hospital (PGH) ang tinamaan na ng COVID-19, ayon sa pamunuan ng ospital ngayong Sabado.

“Kung ang gagamitin natin na base ay 1,600 o ipagpalagay mo nang 1,000, mga 250 frontliners,” ani PGH spokesperson Jonas Del Rosario sa Laging Handa public briefing.

Bilang tugon sa pagtaas ng bilang ng COVID-19 admissions, sinabi ni Del Rosario na bahagya nilang binago ang kanilang polisiya hinggil sa updated isolation at quarantine protocols na ipinatutupad ng Inter-Agency Task Force (IATF) para sa mga healthcare workers.

“Basta wala po silang symptoms, tuloy lang po ang trabaho. Kasi po hindi namin kayang i-quarantine ang napakaraming empleyado, doktor, nurses at mga support staff kasi wala na pong matitira rito sa ospital,” ani Del Rosario.

“So ngayon ang policy namin, unless maging symptomatic ka, for example ikaw ay na-expose sa isa na may COVID pero wala ka pa namang symptoms, tuloy lang ang trabaho, hindi ka magku-quarantine. ‘Yan po ang crisis response ng PGH ngayon,” paliwanag ng opisyal.

Ayon kay Del Rosario, para maprotektahan ang kanilang mga healthcare workers laban sa impeksiyon, “leveled up” na ang kanilang personal protective equipment (PPE) na may N95 masks, at nagsasagawa ang pamunuan ng daily monitoring sa kanilang kondisyon.

Nitong Biyernes, inanunsiyo ng Malacañang na inaprubahan ng IATF ang pinaigsing isolation at quarantine period para sa mga fully vaccinated na health workers na na-infect o na-expose sa COVID-19.

“Hospital infection prevention and control committees are authorized to implement shortened quarantine protocols of five days for their fully vaccinated healthcare workers consistent with health care capacity needs and individualized risk assessment,” bahagi ng nakasaad sa IATF Resolution 156.

Gayundin, batay sa IATF Resolution, ang hospital infection prevention at control committees ay maaari ring magpatupad ng shortened isolation protocols laban sa COVID-19 para sa fully vaccinated na healthcare workers kung saan nakasaad, “in extreme circumstances and upon weighing risks and benefits.”

COVID patients sa PGH, bumaba na; mas maraming non-COVID patients puwede nang tanggapin

ni Jasmin Joy Evangelista | December 3, 2021

Naitala ng Philippine General Hospital sa nakalipas na dalawang araw na walang naisugod na COVID-19 patient.

Ayon sa tagapagsalita ng PGH na si Dr. Jonas Del Rosario, mayroon silang 54 COVID patients sa ngayon, na pinakamababa sa mahigit isang taon mula nang isailalim sa public health crisis ang bansa.

Matatandaang nasa 350 beds ang inilaan ng PGH para sa mga COVID-19 patients sa mga surge na naranasan sa mga nakalipas na buwan.

Patuloy ding umaasa ang pamunuan ng PGH na magtutuluy-tuloy na ang pagbaba ng kaso ng COVID-19 hindi lang sa kanilang ospital kundi maging sa buong bansa.

Samantala, dahil sa pagbaba ng bilang ng COVID-19 patients sa PGH, sinabi ni Del Rosario na mas marami pang non-COVID-19 patients ang puwede na nilang tanggapin.