Pagbabakuna sa edad 5-11... Pfizer EUA, hinihintay na ng FDA — DOH

ni Lolet Abania | November 12, 2021

Inaasahan ng Food and Drug Administration (FDA) na magsusumite na ang Pfizer ng kanilang aplikasyon para sa emergency use authorization (EUA) sa pagbabakuna kontra-COVID-19 sa edad 5 hanggang 11, ayon sa Department of Health.

Sinabi ni DOH Undersecretary Maria Rosario Vergeire na wala pang manufacturer na nag-a-apply ng isang EUA para sa COVID-19 vaccination ng naturang age group sa bansa.

“Ang sabi ng Food and Drug Administration, they are expecting submission already from Pfizer kasi sa US FDA naaprubahan na siya,” ani Vergeire sa isang media briefing.

“Usually daw, apparently, according to FDA, pagka nakakakuha na ng emergency use authority sa US, ang manufacturers ay agad-agad nagsu-sumite sa ibang bansa ng kanilang application,” paliwanag ni Vergeire.

Nitong Oktubre, inawtorisa na ng US FDA ang Pfizer Inc. at BioNTech SE coronavirus vaccine para sa pagbabakuna ng mga menor-de-edad na 5 hanggang 11-anyos, kung saan ito ang kauna-unahang COVID-19 shot para sa mga mas bata sa United States.

Gayunman, ayon kay Vergeire, hihintayin nila ang ebalwasyon at ang issuance ng EUA mula sa FDA.

“Lagi naman, ano, kapag tayo ay nagbabago ng age group o may idinadagdag na age group doon sa mga puwedeng bakunahan with a specific brand of vaccine, kailangan natin antayin ‘yung emergency use authority,” sabi ng opisyal.

Higit 800K doses ng Pfizer dumating na sa bansa

ni Jasmin Joy Evangelista | November 6, 2021

Tuluy-tuloy ang dating ng bakuna sa bansa.

Dumating na ang 866,970 doses ng Pfizer COVID-19 vaccine na binili ng gobyerno, nitong Biyernes nang gabi.

Ayon sa National Task Force Against COVID-19, ngayong araw ay may darating pang karagdagang doses ng Pfizer vaccine.

Lubos ang pasasalamat ni Assistant Secretary Wilben Mayor, head ng sub-task group on current operations ng NTF, sa United States government para sa tulong at suportang ibinigay nito para makabili ang Pilipinas ng naturang mga bakuna.

Ang mga bakunang ito ay nakatakdang gamitin para sa mga batang edad 12 hanggang 17 sa iba’t ibang rehiyon ng bansa.

Inaasahang patuloy na tataas ang bilang ng mga menor de edad na mababakunahan kontra-COVID-19 sa mga susunod pang araw.

Higit 2M doses ng Pfizer vaccines, lumapag na sa bansa

ni Jasmin Joy Evangelista | November 1, 2021

Dumating na sa bansa ang 2,098,980 doses ng Pfizer COVID-19 vaccines nitong Linggo ng gabi.

Ito ay mula sa donasyon ng United States sa pamamagitan ng COVAX Facility.

Pinangunahan ni vaccine czar Carlito Galvez ang pagsalubong sa nasabing mga bakuna.

Aniya, mayroon pang ilang milyong doses ng bakuna ang parating sa bansa.