780K doses ng Pfizer vaccines para sa edad 5-11, dumating na sa bansa

ni Jasmin Joy Evangelista | February 5, 2022

Lumapag na sa bansa ang 780,000 doses ng Pfizer COVID-19 vaccine para sa mga batang edad 5 hanggang 11, nitong Biyernes ng gabi.

Ang mga bakunang ito na binili ng gobyerno ay dunating sa Ninoy Aquino International Airport Terminal 3 bandang 9 p.m.

Ayon kay Vaccine czar Secretary Carlito Galvez Jr., sisimulan ang vaccination roll out sa naturang age group sa Lunes, February 7, 2022.

“Masaya kaming binabalita na matutuloy na ang ating rollout sa pagbabakuna para sa batang edad 5 hanggang 11 sa Lunes. Gusto ko pong siguraduhin ang ating mga magulang na ang mga bakunang ito ay ligtas at masusing pinag-aralan ng mga pinakamahusay sa buong mundo,” ani Galvez.

Hinikayat din ni Galvez ang mga magulang na pabakunahan ang kanilang anak kontra-COVID-19.

Nang tanungin naman hinggil sa petisyon sa temporary restraining order laban sa vaccination rollout, sinabi ni Galvez na “May kumpiyansa kami na makikita ng ating mga judges yung magiging merit ng TRO at we are very confident that many people, many parents, and also overwhelmingly ang ating mga mamamayan susuportahan po tayo dahil nakikita po natin na malaki ang pakinabang ng bakuna dito sa pandemya.”

“We cannot go out to the new normal without the vaccine so nakikita namin na we will proceed,” dagdag niya.

Matatandaang iniurong ng gobyerno ang pagbabakuna sa mga batang edad 5 hanggang 11 sa Lunes, February 7, dahil sa logistical challenges.

780K Pfizer vaccines para sa edad 5-11, darating sa Pebrero 3 – DOH

ni Lolet Abania | February 2, 2022

Nasa tinatayang 780,000 doses ng Pfizer vaccines laban sa COVID-19 na nakalaan sa mga kabataang edad 5 hanggang 11 ang nakaiskedyul na dumating sa bansa sa Huwebes, Pebrero 3, ayon sa Department of Health (DOH).

“Itong pagdating ng mga bakuna bukas, 780,000 doses as an initial supply or delivery para sa ating bansa nitong reformulated Pfizer vaccines para sa ating kabataan 5 to 11,” sabi ni DOH Usec. Maria Rosario Vergeire sa briefing ngayong Miyerkules.

Una nang inanunsiyo ng Malacañang na ang pagbabakuna kontra-COVID-19 sa mga edad 5 hanggang 11 ay isasagawa sa mga piling vaccination sites sa Metro Manila sa Biyernes. Ang mga vax sites ay sa Philippine Heart Center, Philippine Children’s Medical Center, National Children’s Hospital, Manila Zoo, SM North Edsa (Skydome), Fil Oil Gym sa San Juan City. Samantala, sinabi ni Vergeire, na may vaccination roll out din na gagawin sa SM Mega Mall sa Sabado, Pebrero 5.

Subalit ayon kay Vergeire, ang vaccination roll out ay gagawin sa SM Mega Mall sa Sabado, Pebrero 5.

Sinabi rin ni Vergeire na may kabuuang 38 pilot vaccination sites para sa pagbabakuna kontra-COVID-19 ng naturang age group ang ide-deploy sa Metro Manila sa Sabado, 5 sa Region III, at 2 naman sa Calabarzon.

“Habang ang schedule sa iba pang mga lugar ay pinag-uusapan and they will be confirming in the coming days,” ani Vergeire.

Pinayuhan naman ng kalihim ang mga magulang na irehistro na ang kanilang mga anak sa pagbabakuna sa pamamagitan ng local government units (LGuUs) o vaccination centers para maiwasan ang pagsisiksikan.

Samantala, naobserbahan aniya ng DOH na nagkaroon ng slight increase sa bilang ng mga COVID-19 cases sa mga batang edad 5 at pataas, habang ang bilang naman ng mga kaso sa edad 12 hanggang 17 ay nabawasan.

“Mula sa average na 35%, tumaas ito ng bahagya sa 37% nitong Enero,” saad ng kalihim.

Gayunman, tiniyak ni Vergeire sa publiko na wala namang dapat na ipangamba hinggil dito.

“Patuloy po ang Kagawaran ng Kalusugan sa paggawa at pagpapatupad ng mga measures at protocols upang mapigilan pa natin ang paglaganap pa ng virus,” sabi pa ni Vergeire.

2.7 M doses ng Pfizer vaccines na donasyon ng US, dumating na

ni Lolet Abania | January 9, 2022

Natanggap na ng bansa ang isa pang 2.7 milyon doses ng bakuna na donasyon ng United States sa pamamagitan ng COVID-19 Vaccines Global Access (COVAX) Facility.

Nasa kabuuang 2,703,870 doses ng Pfizer-BioNTech vaccine ang dumating sa Manila pasado alas-2:00 ng hapon ngayong Linggo. Dahil dito, ang kabuuang bilang ng mga COVID-19 vaccines na nai-deliver sa Pilipinas ay 213,487,520.

Sa pinakabagong datos na available mula sa Department of Health (DOH), sa ngayon ang bansa ay nakapag-administer ng kabuuang110.089 milyon doses hanggang nitong Enero 4, 2022. Kabilang dito ang 57.254 milyon para sa first doses, 50.627 milyon para sa full vaccinations, at 2.207 milyon para sa booster doses.

Matatandaang inaprubahan ng Inter-Agency Task Force for the Management of Emerging Infectious Diseases (IATF-EID) ang partisipasyon ng bansa sa nasabing facility noong Hulyo 2020.

Layon ng COVAX facility na makapag-deliver ng ligtas at epektibong vaccines sa lahat ng mga nakiisang mga bansa ng mga doses na available na base sa pangangailangan ng bansa, vulnerability, at panganib na dulot ng COVID-19.