Health worker sa Alaska, nagka-allergy sa COVID-19 vaccine

ni Lolet Abania | December 17, 2020

Isang Alaskan health worker ang nakaranas ng matinding allergic reaction matapos maturukan ng COVID-19 vaccine ng Pfizer Inc. at BioNTech, ayon sa public health authorities ng lugar.

Malubha ang naging epekto sa nasabing health worker ilang minuto matapos na mabakunahan ng Pfizer vaccine noong Martes. Katulad ito ng dalawang kaso na nai-report noong nakaraang linggo sa Britain, subalit nasa maayos na kondisyon na ang naturang pasyente.

Ayon sa medical regulator ng Britain, ang mga taong may history ng anaphylaxis, o severe allergic reactions sa mga gamot o pagkain ay hindi dapat magpabakuna ng Pfizer-BioNTech COVID-19 vaccine.

Subalit, ayon sa US Food and Drug Administration, ligtas umano na tanggapin ang bakuna kahit pa marami sa mga Americans ang may mga allergies. Ang mga taong kamakailan lamang na nakaranas ng severe allergic reactions sa mga vaccines o anumang substance na mayroon ang isang bakuna ang hindi dapat magpaturok ng COVID-19 vaccine.

Ayon kay Lindy Jones, director ng emergency department sa kapitolyo ng Juneau, walang history ng allergic reaction ang nasabing Alaskan patient. Gayunman, agad na binigyan ng allergy treatment na epinephrine ang nasa edad nang pasyente, ayon kay Jones.

Nananatili pa rin ang nasabing pasyente sa Bartlett Regional Hospital ng Juneau para patuloy na i-monitor ang kanyang kondisyon.

Matatandang sinabi ng Pfizer na ang naturang vaccine ay may malinaw na babala na kinakailangan ng medical treatment at tamang pangangasiwa rito, at sakaling magkaroon ng kaso ng anaphylaxis na nagdudulot ng allergic reaction, dapat na nakahanda anumang oras upang maiwasan ang matinding epekto nito sa matuturukan.

Samantala, ayon sa dating FDA Chief Scientist Jesse Goodman, dapat na magsagawa ng mas malalim na pag-aaral patungkol sa maaaring panganib ng vaccine.

Aniya, dapat ding magbigay ng malawak na impormasyon sa pagkakaroon ng allergic reaction sa publiko.

"What we need to know is what the denominator is -- how many doses have been given? Is this going to be something that's going to be seen at a higher incidence with this vaccine than with others?" sabi ni Goodman.

"We're going to have to find out those things to inform whether that changes recommendations or how this is used."

COVID-19 vaccine na gawang Pfizer Inc-BioNTech, aprubado na sa US

ni Thea Janica Teh | December 12, 2020

Pinayagan na ng United States Food and Drug Administration ang paggamit ng COVID-19 vaccine na gawa ng Pfizer Inc. nitong Biyernes at ito na umano ang pinakamalaking turning point ng US kung saan 292,000 katao ang namatay dahil sa virus.

Napatunayang epektibo ng 95% ang COVID-19 vaccine na gawa ng Pfizer Inc at BioNTech sa late-stage trial nito.

Ayon sa US FDA, ibibigay ang vaccine sa mga taong may edad 16 pataas.

Uunahing mabigyan ng halos 2.9 milyong doses ng vaccine ang mga health care workers at matatandang nasa long-term care facilities.

Sinundan ng US ang United Kingdom at Canada sa approval ng paggamit ng COVID-19 vaccine na gawang Pfizer-BioNTech.

Allergy na dulot ng COVID-19 vaccine, normal lang - DOH

ni Lolet Abania | December 11, 2020

Naglabas ng pahayag ang Department of Health (DOH) ngayong Biyernes tungkol sa maaaring maranasang allergic reactions na karaniwang side effect lamang kapag nagpapabakuna o nagbibigay ng gamot sa isang tao.

Ito ang naging paliwanag ng DOH matapos mag-isyu ang United Kingdom ng allergy warning para sa Pfizer-BioNTech COVID-19 vaccine na sinimulang gamitin para sa mass vaccinations ngayong linggo sa nasabing bansa.

Sa lumabas na reports, dalawa katao na naturukan ng unang aprubado nang vaccine para sa COVID-19 ang nakaranas ng allergic reactions at kinailangang agad gamutin.

Gayunman, napag-alamang pawang may history ang dalawang pasyente ng allergic reactions.

“Ang lahat ng technology like medicines or vaccines, common 'yung side effect na allergies sa mga tao,” sabi ni DOH Usec. Maria Rosario Vergeire sa isang virtual briefing ngayong Biyernes.

Ayon kay Vergeire, ito ang dahilan kaya itinatanong muna ng mga doktor kung ang isang pasyente ay allergic sa pagkain o drugs bago magbigay ng gamot o treatment.

“Ang mga gamot at bakuna na ibinibigay sa atin ng doctor, ito ay foreign material. 'Pag pinasok sa ating katawan, it may react differently across different individuals,” paliwanag ni Vergeire.

Sinabi pa ni Vergeire, magkakaiba ang nagiging epekto ng gamot o vaccine sa bawat taong tumatanggap nito. Aniya, kaya napakahalaga na magkaroon ng tinatawag niyang “inclusion and exclusion criteria” para sa gagawing vaccinations.

Dagdag pa ng kalihim, sa pag-aaral ng Pfizer, nabanggit nilang, “It would be prudent for them to exclude people who have had allergies in the past to prevent these kinds of allergy.”

Kasalukuyan nang nagsasagawa ang gobyerno ng pag-aaral para sa isang confidential data agreement sa Pfizer sa posibleng negosasyon para sa isang clinical trial o supply deal sa bansa.