Edad 12 to 15, oks nang turukan ng Pfizer vaccine

ni Lolet Abania | June 8, 2021

Pinalawak na ang ibinigay na emergency use authorization (EUA) sa Pfizer na sasakop sa indibidwal na puwedeng mabakunahan ng COVID-19 vaccine.

Ayon kay DOH Undersecretary Maria Rosario Vergeire, binigyan ng EUA ang Pfizer para magamit ang bakuna sa mga edad 12 at pataas.

“While we welcome more vaccines that are approved for children and adolescents, due to limited vaccine supply, our vaccination strategy remains the same -- prioritize the vulnerable and adhere to our prioritization framework,” ani Vergeire.

“The general consensus of our vaccine experts is to revisit pediatric and adolescent vaccination once our vaccine supply has stabilized,” dagdag niya.

Sa isang report, inamyendahan ng Food and Drug Administration ang EUA na kanilang inaprubahan para sa Pfizer-BioNTech's vaccine upang maabot nito ang mga nasa edad 12 hanggang 15.

Nakasaad sa kopya ng Pfizer EUA sa FDA website na, “Amendment to include minors was issued on May 28.”

Una rito, inaprubahan ang Pfizer jab para gamitin sa mga indibidwal na nasa 16-anyos at pataas.

Matatandaang sinabi ni FDA Director General Eric Domingo na ang mga eksperto ay nagbigay ng “very favorable” o napakakanais-nais na rekomendasyon para sa paggamit ng Pfrizer vaccine sa mga menor-de-edad.

Noong March, ayon sa American pharmaceutical giant, nagpakita ang vaccine ng 100% efficacy laban sa COVID-19 sa mga adolescents na may edad 12 hanggang 15. Inihayag din ng Malacañang na ang mga Filipino teen-agers ay mababakunahan ng Pfizer vaccine kapag dumating na ang mga supplies nito.

Inaasahan namang mabibigyan ng 40 milyong doses mula sa nasabing kumpanya ang bansa ngayong taon.

‘Pinas, pasok sa bibigyan ng US ng donasyong 80 M doses na Covid vaccine

ni Mary Gutierrez Almirañez | June 4, 2021

Magbibigay ang America ng 80 million doses ng COVID-19 vaccines na hahatiin sa iba’t ibang bansa bago mag-Hulyo, at ang 75% nito ay ipamamahagi sa ilalim ng COVAX program, ayon kay United States President Joe Biden.

Aniya, magdo-donate ang America sa mga prayoridad na bansang sakop ng Latin America, Caribbean, South Asia, Southeast Asia at Africa, kung saan laganap ang virus. Paraan aniya iyon upang masugpo ang pandemya.

"We are sharing these doses not to secure favors or extract concessions. We are sharing these vaccines to save lives and to lead the world in bringing an end to the pandemic, with the power of our example and with our values," sabi pa ni US President Biden.

Naglabas din ng pahayag ang White House sa kanilang website, kung saan mababasa na kabilang ang ‘Pinas sa makatatanggap ng donasyon.

Batay dito, “Approximately 7 million (doses) for Asia to the following countries and entities: India, Nepal, Bangladesh, Pakistan, Sri Lanka, Afghanistan, Maldives, Malaysia, Philippines, Vietnam, Indonesia, Thailand, Laos, Papua New Guinea, Taiwan, and the Pacific Islands.”

Dagdag nito, “The Administration announced its framework for sharing at least 80 million U.S. vaccine doses globally by the end of June and the plan for the first 25 million doses.

“This will take time, but the President has directed the Administration to use all the levers of the U.S. government to protect individuals from this virus as quickly as possible. The specific vaccines and amounts will be determined and shared as the Administration works through the logistical, regulatory and other parameters particular to each region and country,” pagtatapos pa ng kanilang statement.

Sa ngayon ay Pfizer pa lamang ang American brand COVID-19 vaccines na nakarating sa ‘Pinas. Inaasahan namang darating ang 300,000 doses ng Moderna sa ika-21 ng Hunyo.

Matatandaang mas dinumog ng mga Pinoy ang rollout ng Pfizer kumpara sa ibang brand na inaaloka sa bansa, kaya nagpasya si Pangulong Rodrigo Duterte na Pfizer ang gagamitin sa indigent population.

2.2 M doses ng Pfizer, sa June 11 pa ang dating

ni Lolet Abania | June 1, 2021

Darating na ang karagdagang 2.2 milyong doses ng Pfizer-BioNTech COVID-19 vaccine sa bansa sa Hunyo 11, ayon kay Vaccine Czar Secretary Carlito Galvez, Jr..

“At ngayon, June 11 ay ia-announce ko na po na ‘yung 2.2 million ay darating po dito ngayon sa ating bansa,” ani Galvez sa Palace briefing ngayong Martes.

“At ito po ay… diretso na po sa mga bayan natin sa Cebu, sa Davao, at saka dito sa Metro Manila,” dagdag niya.

Matatandaang sinabi ni Galvez na ang mga doses ay nakatakdang dumating bago matapos ang Mayo.

Sa ngayon, ayon kay Galvez, ang Pilipinas ay may matatag nang supply ng bakuna mula sa COVAX Facility, kung saan mahigit sa dalawang milyong doses kada buwan ang kanilang ibibigay.

“‘Yung vaccine supply natin will be stabilized on the month of July, lalo na ‘yung AstraZeneca, Moderna, Sinovac, at saka Sputnik,” sabi ng vaccine czar.

Kahapon, nabanggit ng Malacañang, tinatayang 3.4 milyong doses ng COVID-19 vaccines ang inaasahang i-deliver sa Pilipinas ngayong Hunyo.

Samantala, nitong Mayo 30, umabot na sa 1.2 milyong indibidwal ang fully vaccinated kontra-COVID-19.