10 M doses ng Pfizer vaccine, ido-donate ng US sa ‘Pinas

ni Lolet Abania | September 16, 2021

Aabot sa 10 milyon doses ng Pfizer COVID-19 vaccine ang matatanggap ng Pilipinas na donasyon ng United States, ayon kay vaccine czar Carlito Galvez Jr.

Sa isang report ng kalihim kay Pangulong Rodrigo Duterte na ipinalabas ngayong Huwebes, sinabi ni Galvez na inisyal na may alokasyon ang US na 6 milyon doses, subalit dinagdagan ito na naging 10 milyon.

Ayon pa kay Galvez na sina Department of National Defense Secretary Delfin Lorenzana at Department of Foreign Affairs Secretary Teodoro Locsin Jr. ay nagtungo kamakailan sa US para personal na pasalamatan ang Washington sa kanilang ginagawang assistance hinggil sa vaccination program ng Pilipinas.

Inianunsiyo naman nitong Martes ng World Health Organization (WHO) ang nakatakdang i-deliver sa bansa na karagdagang 10 milyong doses ng COVID-19 vaccine mula sa COVAX facility sa mga susunod na linggo.

“We expect much larger consignments to come within this third and fourth quarter to the Philippines and to many other countries who are recipients of COVAX vaccines,” pahayag ng WHO representative ng bansa na si Rabindra Abeyasinghe.

Pfizer COVID vaccine, for sale na next year — FDA

ni Lolet Abania | August 26, 2021

Inianunsiyo ng Food and Drug Administration (FDA) ngayong Huwebes na posibleng ang mga COVID-19 vaccines ay maging commercially available na sa Pilipinas sa susunod na taon matapos ang full approval sa Pfizer jabs ng United States.

“Possibly early 2022,” ang naging tugon ni FDA Chief Eric Domingo nang tanungin sa isang interview kung kailan magiging commercially available sa publiko ang mga COVID-19 vaccines.

Nitong linggo lang ipinagkaloob ng US FDA ang full approval para sa Pfizer vaccine, kung saan ito ang kauna-unahang COVID-19 shot na nakatanggap ng ganoong approval.

Gayunman, sa Pilipinas, ang full approval ng Pfizer vaccine ay nakadepende sa isusumite ng American drugmaker na aplikasyon para sa certificate of product registration o market authorization.

“Wala pa,” ani Domingo nang tanungin naman kung ang FDA ay nakatanggap na ng anuman mula sa Pfizer na interesado sila na makakuha rin ng full approval mula sa gobyerno.

“But we already sent them the requirements and process for COVID-19 vaccine registration,” sabi ni Domingo.

Matatandaang noong Mayo, sinabi ni Domingo na ang application para sa full approval nito ay pinakamaaga na maaari nilang mai-file nang mga huling buwan ng 2021.

“Maaari na po siyang ibenta hindi lamang sa gobyerno katulad ngayon, kundi [pati] sa mga ospital, sa mga clinic, sa mga pharmacy, maaari na rin pong i-distribute ‘yan,” saad ni Domingo noon sa isa ring interview.

Ayon pa sa FDA chief, posibleng simulan na ng Pfizer na humingi ng full approval ng kanilang COVID-19 vaccine sa iba pang mga bansa.

“So ‘yun pong mga EUA natin, after one year ‘yan, mag-e-expire na po lahat ‘yan at ang maaari na lamang gamitin ay mga fully approved product,” paliwanag pa ni Domingo.

Higit 362K doses ng Pfizer, dumating na

ni Ronalyn Seminiano Reonico | August 26, 2021

Dumating na sa bansa ang 362,700 doses ng Pfizer COVID-19 vaccine noong Miyerkules.

Lumapag sa Ninoy Aquino International Airport (NAIA) Terminal 3 ang Air Hongkong flight LD456 lulan ang mga naturang bakuna.

Ayon sa National Task Force Against COVID-19, ang 50,310 doses ng Pfizer ay dumating sa Cebu City bandang alas-5 nang hapon at 50,310 doses din ang nakatakdang dalhin sa Davao City ngayong Huwebes.

Ang iba pang Pfizer vaccines ay dinala naman sa PharmaServ Express cold-chain storage facility sa Marikina City, ayon sa NTF.

Ayon naman kay Assistant Secretary Wilben Mayor, head ng National Task Force Against Covid-19 (NTF) sub-task force, ang mga bakuna ay dadalhin sa mga lugar na nakakapagtala ng pagtaas ng kaso ng Coronavirus.

Aniya pa, "Though meron na tayo ngayong tinatawag na from the spot, nagkakaroon agad ng inoculation. Dinadala na agad doon sa area and pagdating doon, ini-inject na kaagad.

"But, again, we leave it to the Vaccine Cluster to decide on whether to which particular area that they will distribute or allocate this Pfizer vaccine."