Pfizer COVID-19 vaccine, sa mahihirap iturok — P-Du30

ni Lolet Abania | May 20, 2021

Iniutos na ni Pangulong Rodrigo Duterte ang pagbabakuna ng donasyong Pfizer-BioNTech COVID-19 vaccines sa indigent population, ayon kay Presidential Spokesperson Harry Roque.

Ayon kay Roque, ibinaba ng Pangulo ang direktiba batay sa kondisyon na ibinigay ng global aid na COVAX Facility na nag-donate ng 193,050 doses ng Pfizer-BioNTech vaccines na nai-deliver na sa bansa.

“Ipinag-utos ni Presidente na ibigay ang Pfizer sa mahihirap at indigent population. Under COVAX guidelines, it is A1, A2, A3 and A5,” ani Roque sa press briefing ngayong Huwebes.

Sa ilalim ng vaccination program ng gobyerno, ang A1 ay mga health workers, A2 ay mga senior citizens, A3 ay mga taong may comorbidities habang ang A5 ay mga mahihirap at indigents.

Ang A4 naman ay mga essential workers o mga kinakailangang mag-report physically sa trabaho sa kabila ng umiiral na quarantine restrictions.

“Iyong Pfizer, hindi po ‘yan ilalagay sa mall. Ilalagay ‘yan sa barangays na mababa ang uptake ng vaccine,” diin ni Roque.

“On A4, we will use the ones (vaccines) paid for by the government,” dagdag ng kalihim.

Batay sa naging evaluation ng Food and Drug Administration (FDA) ng bansa, ang Pfizer-BioNTech ay may efficacy rate na 95% sa isinagawang study population habang may 92% naman na angkop para sa lahat ng lahi.

Pfizer-BioNTech vaccine para sa edad 12-15 sa US, aprub!

ni Ronalyn Seminiano Reonico | May 11, 2021

Inaprubahan na ng US Food and Drug Administration (FDA) noong Lunes ang paggamit ng Pfizer-BioNTech COVID-19 vaccine sa mga residente ng Amerika na edad 12 hanggang 15.

Ayon kay Acting FDA Commissioner Janet Woodcock, ito ay "significant step in the fight against the COVID-19 pandemic."

Aniya pa, "Today's action allows for a younger population to be protected from COVID-19, bringing us closer to returning to a sense of normalcy and to ending the pandemic.

"Parents and guardians can rest assured that the agency undertook a rigorous and thorough review of all available data, as we have with all of our COVID-19 vaccine emergency use authorizations.”

Ayon sa FDA, nakapagtala ang US Centers for Disease Control and Prevention ng 1.5 million kaso ng COVID-19 sa mga 11 hanggang 17-anyos simula noong March 1, 2020 hanggang April 30, 2021.

Ayon sa pag-aaral, kadalasang mild symptoms lamang ang nararamdaman ng mga kabataan ngunit naipapasa nila ang Coronavirus sa mga nakatatanda.

Samantala, pinaghahandaan na ang pagbabakuna sa mga 12 to 15 years old sa 20,000 pharmacies sa buong US, ayon kay President Joe Biden.

Janssen at Covaxin COVID-19 vaccines, aprub sa FDA

ni Mary Gutierrez Almirañez | April 20, 2021

Inaprubahan na ng Food and Drug Administration (FDA) ang emergency use authorization (EUA) ng mga bakunang Janssen at Covaxin kontra COVID-19, batay sa inanunsiyo ni Vaccine Czar Secretary Carlito Galvez, Jr. sa ginanap na public briefing kagabi.

Nauna na ring nag-tweet si Indian Ambassador Shambhu Kumaran upang pasalamatan ang ‘Pinas sa iginawad na EUA sa bakuna nilang Covaxin na mula sa Bharat Biotech manufacturer.

Ayon sa tweet ni Kumaran, “Another decisive step in the long battle together against Covid-19.”

Batay sa pag-aaral, ang Covaxin ay nagtataglay ng 92% hanggang 95% na efficacy rate.

Samantala, ang Janssen COVID-19 vaccines nama’y gawa ng Johnson and Johnson, kung saan mahigit 6 milyong doses nito ang binili ng ‘Pinas.

Matatandaang inirekomenda ng U.S Food and Drug Administration (FDA) at Centers for Disease Control and Prevention (CDC) na ihinto muna ang pagbabakuna ng Janssen dahil sa iniulat na blood clot sa 6 na nabakunahan nito.

Sa ngayon, ang may emergency use authorization (EUA) pa lang na bakuna ay ang Pfizer-BioNTech, AstraZeneca, CoronaVac ng Sinovac, ang Sputnik V ng Gamaleya Institute at kabilang ang dalawang nadagdag na bakuna.