P1 B halaga ng shabu, nakumpiska, ‘drug kingpin’, 1 pa arestado

ni Lolet Abania | March 9, 2022

Arestado ang umano’y drug kingpin at kasamahan nito, matapos makakumpiska ang mga awtoridad ng P1 bilyong halaga ng hinihinalang shabu sa isang operasyon sa Valenzuela City nitong Martes.

Sa isang statement ngayong Miyerkules ng Philippine National Police (PNP), ipinahayag nitong nagsagawa ang kanilang mga tauhan at mga ahente ng Philippine Drug Enforcement Agency (PDEA) ng isang joint buy-bust operation sa Barangay Karuhatan.

Kinilala ang mga naarestong suspek na sina Tianzhu Lyu, 32-anyos, ng Fujian, China, at Meliza Villanueva, 37-anyos, ng Concepcion, Tarlac.

Nasamsam ng mga awtoridad ang humigit-kumulang sa 160 kilos ng hinihinalang shabu na nagkakahalaga ng P1.088 bilyon.

Nakuha rin mula sa mga suspek ang apat na smartphones, isang basic analog phone, isang weighing scale, iba’t ibang identification cards, at isang bundle ng mga dokumento.

Ayon sa pulisya, ang dalawang nadakip na suspek ay kilalang drug dealers sa mga lugar sa Metro Manila, Central Luzon, at Calabarzon.

Nahaharap ang mga suspek sa kasong paglabag sa Republic Act 9165 o ang Comprehensive Dangerous Drugs Act of 2002 na isasampa laban sa kanila.

“The PNP vows to sustain with vigor anti-illegal drug police operations with a greater focus on high-value targets engaged in trafficking and distribution of illegal drugs, of course, in coordination with PDEA, to help boost the government’s campaign for criminal justice,” sabi ni PNP chief Police General Dionardo Carlos.

Mag-ina tiklo sa hinihinalang shabu sa Caloocan

ni Jasmin Joy Evangelista | October 19, 2021

Tiklo ang mag-ina sa Camarin, Caloocan matapos arestuhin sa buy-bust operation ng Philippine Drug Enforcement Agency NCR Lunes ng umaga.

Ayon sa ahensiya, sila ang nasa likod ng talamak na bentahan ng ilegal na droga sa lugar.

Nahuli ang 39-anyos na ginang at 18-anyos na anak nito matapos magbenta sa poseur buyer ng hinihinalang shabu na abot sa 50 gramo at nagkakahalaga ng P340,000.

Nangyari ang transaksiyon sa kanilang tahanan mismo.

Nakatakda nang sampahan ng kaso ang mag-ina.

Nigerian tiklo matapos mahulihan ng P27 M halaga ng droga

ni Jasmin Joy Evangelista | October 14, 2021

Arestado ang isang Nigerian citizen sa ikinasang entrapment operation ng Philippine Drug Enforcement Agency (PDEA) at pulisya sa Bacoor, Cavite Martes ng gabi.

Sangkot umano sa pagbebenta ng ilegal na droga ang 30-anyos na suspek.

Ayon sa PDEA, nakipagkita ang mga operatiba sa suspek sa Cerritos Heights Road, Barangay Molino IV pasado alas-9 ng gabi.

Natunton umano ito dahil sa pasahan ng impormasyon ng Bureau of Customs sa Port of Clark, PDEA Central Luzon at PDEA.

Nakuha sa banyaga ang 2 paper bag na may 4 na tig-isang kilong balot ng shabu na tinatayang may halagang P27.2 milyon.

Nahaharap ang suspek sa kasong paglabag sa Dangerous Drugs Act at kasalukuyan pang inaalam ang pinagmulan ng nasabat na shabu.