P12-M na marijuana, nakumpiska sa tumakbong konsehal

ni Lolet Abania | March 2, 2021

Umabot sa 99 marijuana bricks at isang bote ng marijuana oil na tinatayang nagkakahalaga ng P12 milyon ang nakumpiska ng mga awtoridad mula sa umano'y natalong pulitiko sa Tadian, Mountain Province.

Kinilala ng mga tauhan ng Philippine Drug Enforcement Agency (PDEA) ang suspek na si Rexton Bangang. Ayon sa PDEA, posibleng ginamit ng suspek ang drug money para masiguro ang kanyang posisyon sa gobyerno.

Tumakbong councilor si Bangang noong 2019 local elections subalit natalo ito.

Nagsagawa ang PDEA ng 3-buwang surveillance kay Bangang, na sinasabi rin umanong supplier ng isang sindikato.

"Ito ay dinala at ibiniyahe ng isang masasabi natin na malaking tao doon sa Tadian, Mountain Province," ani PDEA-Cordillera Director Gil Castro. Gayunman, tumangging magbigay ng pahayag si Bangang tungkol dito.

Mapatunayan lang na binentahan ng agent ang mga pulis…"Magre-resign ako!" — PDEA Chief Villanueva

ni Ronalyn Seminiano Reonico | March 2, 2021

Handang magbitiw sa puwesto si Philippine Drug Enforcement Agency (PDEA) Chief Wilkins Villanueva kung mapapatunayan diumano na isa sa kanilang tauhan ang nagbenta ng droga sa kapulisan sa madugong buy-bust operation malapit sa isang mall sa Quezon City noong nakaraang linggo.

Hinamon din ni Villanueva na maglabas ng CCTV footage ang sinumang nagsasabing nagbenta ng droga ang PDEA agents sa mga tauhan ng Philippine National Police (PNP).

Aniya, “Magsasalita ka kung may makikita kang ebidensiya na nandiyan. CCTV ang patunay. Magpalabas sila ng CCTV na nagbentahan ang PDEA at pulis. Magre-resign ako right now.

“Magpalabas kayo ng ebidensiya na CCTV na nagbenta ang PDEA at kayo ang bumili. Doon, kaso na ‘yun. I will resign immediately.”

Samantala, kasalukuyan pa ring nagsasagawa ng imbestigasyon ang National Bureau of Investigation (NBI) sa insidente.

Noong Lunes, ayon sa Philippine National Police (PNP), nai-turn over na nila ang ilang ebidensiya katulad ng cellphones, mga baril at umano'y boodle money.

Saad pa ni PNP Crime Laboratory Director Brigadier Steve Ludan, “That is all we have now and na-turn over na po ‘yung iba, and the rest we are waiting for the complete turnover of these evidence to the NBI.”

Pahayag naman ni PNP Chief Police General Debold Sinas, “As to the impact of those evidence, pabayaan na lang muna ang NBI ang magsalita.”

Hearing ng Kongreso sa barilan ng PNP at PDEA, suspendido

ni Mary Gutierrez Almirañez | February 27, 2021

Suspendido ang nakatakdang imbestigasyon sa Lunes (Marso 1) sa naganap na ‘misencounter’ sa pagitan ng PDEA at PNP, ayon kay House Committee on Dangerous Drugs Chairman at Surigao del Norte Rep. Robert Ace Barbers, alinsunod na rin sa kahilingan ni Pangulong Rodrigo Duterte.

Aniya, "Please be advised that in light of Pres. DU30's instruction to the NBI to conduct an impartial investigation on the PNP and PDEA incident, our scheduled Committee hearing/investigation in aid of legislation on Monday, March 1, 2021, is temporarily suspended as a courtesy to and in order not to hinder the ongoing investigation. We'll keep you all posted on the developments."

Sa unang pahayag ng Presidente kahapon, iginiit niyang tanging NBI lamang ang inatasan niyang magsagawa ng imbestigasyon sa barilan ng PNP at PDEA sa naganap na buy-bust operation noong Miyerkules nang gabi sa parking lot ng isang fast food establishment sa Commonwealth Avenue, Quezon City, kung saan apat ang naitalang namatay.

"Gusto ng Presidente na magkaroon ng impartial investigation para maiwasan ang mga malilikot na pag-iisip at para rin sa peace of mind ng mga biktima na patas ang imbestigasyon," paliwanag ni Spokesperson Harry Roque sa Palace briefing kanina.