Barilan ng PNP-PDEA, NBI lang ang mag-iimbestiga — P-Duterte

ni Ronalyn Seminiano Reonico | February 26, 2021

Tanging ang National Bureau of Investigation (NBI) lamang ang inatasan ni Pangulong Rodrigo Duterte na magsagawa ng imbestigasyon sa naganap na barilan sa pagitan ng kapulisan at Philippine Drug Enforcement Agency (PDEA), ayon kay Presidential Spokesperson Harry Roque ngayong Biyernes.

Aniya, "Magandang hapon po. Isang importanteng anunsiyo galing po sa ating Presidente. Nagdesisyon po ang ating Presidente na tanging NBI lang po ang mag-iimbestiga ru’n sa putukang nangyari sa panig ng mga kapulisan at ng PDEA riyan po sa Quezon City."

Apat ang naitalang namatay — 2 pulis, isang PDEA agent at informant sa naturang insidente na naganap noong Miyerkules nang gabi sa parking lot ng isang fastfood establishment sa Commonwealth, Quezon City.

Dahil din sa utos ni P-Duterte, mapapawalang-bisa ang joint panel na binuo diumano ng Philippine National Police at PDEA, ayon kay Roque.

Saad ni Roque, “Iyong mga binuo pong joint panel para imbestigahan ‘yan na binuo po ng PNP at PDEA ay hindi na po magtutuloy sa kanilang imbestigasyon. Tanging NBI lang po, sang-ayon sa ating Presidente, ang magtutuloy ng imbestigasyon.”

Ayon sa ulat, parehong nagsasagawa diumano ng buy-bust operation ang kapulisan at PDEA nang maganap ang engkuwentro kung kaya una nang sinabi ng awtoridad na "misencounter" ang insidente.

Lupa para sa mga rebelde, pinamamadali ni P-Duterte

ni Lolet Abania | February 23, 2021

Inatasan ni Pangulong Rodrigo Duterte ang kanyang mga Cabinet na pabilisin ang distribusyon ng mga lupa para sa mga rebeldeng nagbalik-loob sa gobyerno, ayon kay Cabinet Secretary Karlo Nograles.

Sa isang virtual press briefing, sinabi ni Nograles na nakatakdang magpamahagi ang pamahalaan ng 6,406.6 hectares ng lupa sa mga dating rebelde.

“Gusto nating mapabilis ang pag-distribute nito. Alam nating napakalaki ng role nito para sa ating peace efforts,” pahayag ni Nograles ngayong Martes.

Naganap ang Cabinet meeting kay Pangulong Duterte nu'ng Lunes ng gabi.

Matatandaang noong nakaraang linggo, nagkaloob si P-Duterte ng amnesty para sa mga dating communist rebels na nakagawa ng krimen na may kaukulang kaparusahan sa ilalim ng Revised Penal Code at Special Penal Laws dahil sa pakikipaglaban ng mga ito sa pulitikal na pinaniniwalaan.

Ang mga krimen na bibigyan ng amnestiya ay ang mga sumusunod: • rebellion/insurrection • conspiracy and proposal to commit rebellion or insurrection • disloyalty to public officers or employees • inciting to rebellion or insurrection • sedition • conspiracy to commit sedition • inciting to sedition • illegal assembly • illegal association • direct assault • indirect assault, at iba pa

Sa ipinagkaloob na amnestiya na nakasaad sa Presidential Proclamations 1090, 1091, 1092 at 1093 ay mabebenepisyuhan din ang ilan sa mga dating miyembro ng Rebolusyonaryong Partido ng Manggagawa ng Pilipinas/Revolutionary Proletarian Army/Alex Boncayao Brigade, Moro National Liberation Front (MNLF) at Moro Islamic Liberation Front (MILF).

Walang bakuna, walang face-to-face classes – P-Du30

ni Ronalyn Seminiano Reonico | February 22, 2021

Hindi inaprubahan ni Pangulong Rodrigo Duterte ang pagsasagawa ng face-to-face classes sa bansa hangggang wala pang bakuna, ayon kay Presidential Spokesperson Harry Roque.

Saad ni Roque, “Nagdesisyon na po ang Presidente, wala pa rin po tayong face-to-face classes sa bansa.

“Tumawag po ang Presidente kagabi sa akin at sabi niya, ayaw po niyang malagay sa panganib ang buhay ng ating mga mag-aaral at mga guro habang wala pa pong nababakunahan sa bansa.”

Gayunpaman, umaasa rin umano ang pangulo na makapagsasagawa na ng face-to-face classes sa mga low-risk na lugar sa Agosto.

Aniya, “Sabi niya, may awa naman po ang Panginoon, baka naman po pagkatapos natin malunsad ang ating vaccination program, eh, pupuwede na tayong mag-face-to-face sa Agosto lalung-lalo na sa lugar na mababa ang COVID cases.”