Ayaw magpabakuna, 'wag lumabas – P-Du30

ni Lolet Abania | May 18, 2021

Nagbigay ng pahayag si Pangulong Rodrigo Duterte sa mga mamamayan na sakaling tumanggi na magpabakuna kontra-COVID-19, ayon sa kanya, dapat ay mag-“stay home” o manatili sa kanilang tahanan sa dahilang nahihirapan ang mga awtoridad na kumbinsihin ang publiko na magtiwala sa pagpapabakuna.

Sa kanyang taped speech ngayong Martes, sinabi ni Pangulong Duterte na ang nabubuong pangamba ng marami sa epekto ng vaccines ay ‘walang basehan’ dahil wala pa aniyang namatay sa COVID-19 vaccines.

"Maniwala kayo sa gobyerno, maniwala kayo sa mga tao na inilagay n'yo d'yan sa opisina nila... Maniwala kayo, Diyos ko po kasi kung hindi, hindi kayo makatulong," ani P-Duterte.

"We cannot force you. But then, sana, kung ayaw n'yong magpabakuna, huwag na kayong lumabas ng bahay para hindi kayo manghawa ng ibang tao," dagdag ng Pangulo.

Iginiit din ng Pangulo na kapag hindi pa nabakunahan, madali itong mahahawahan ng COVID-19.

"Maghawahan talaga 'yan,” ani P-Duterte.

Ayon kay P-Duterte, dapat na sundin ng publiko ang payo ng mga doktor na magpabakuna na laban sa coronavirus, lalo na ngayong dumarami ang mga new variants ng COVID-19, kaysa umabot pa sa puntong infected na ng nasabing virus at hindi na talaga makahinga.

"'Pag hindi ka na makahinga, dalhin ka sa ospital, walang makalapit sa pasyente, doktor lang, nakabalot pa to avoid being infected,” ayon sa Pangulo.

"'Pag namatay kayo, diretso kayo sa morgue. 'Di mo mahalikan, ma-realize mo ang sakit. You will not be able to kiss your loved ones goodbye)," dagdag pa niya.

Samantala, ayon sa ginawang survey ng OCTA Research Group, isa lamang sa apat na residente ng Manila ang pumapayag na magpaturok ng COVID-19 vaccines, habang sa hiwalay na survey naman ng Pulse Asia, 6 sa 10 Pilipino ay hesitant o alanganin na magpabakuna ng COVID-19 vaccines.

Subalit para magkaroon ng herd immunity, kailangan na 70 porsiyento ng populasyon ng bansa ang mabakunahan. Ito rin ang tinatawag na indirect protection mula sa nakahahawang sakit, dahil kapag ang populasyon ay na-immune sa pamamagitan ng vaccination, madali nang malalabanan ang naturang impeksiyon, ayon sa World Health Organization.

Mas mahigpit na lockdown, next — P-Du30

ni Mary Gutierrez Almirañez | May 18, 2021

Nagbabala sa mas mahigpit na lockdown si Pangulong Rodrigo Duterte kapag tumaas muli ang kaso ng COVID-19 sa bansa, batay sa kanyang public briefing ngayong umaga, May 18.

Aniya, "Under other circumstances, sabihin ko, ayaw ko. But these things are for your own good and if you, hindi n'yo (kayo) sumusunod and may resurgence naman, tapos the new variants, mapipilitan talaga akong mag-impose ng lockdown, maybe stricter this time because hindi natin alam anong variant 'yan.”

Dagdag pa niya, "Ang pag-asa natin is really the obedience, parang boy scout. You want to end the danger of COVID-19 engulfing this country. Kapag hindi, mapipilitan talaga ako na to impose lockdowns and everything."

Sa ngayon ay bumababa na ang kaso ng COVID-19, partikular na sa NCR Plus na kinabibilangan ng Metro Manila, Cavite, Laguna at Rizal na noo’y naging sentro ng pandemya sa bansa.

Ayon pa kay Department of Health (DOH) Secretary Francisco Duque III, “2-week COVID-19 growth rate in NCR went down from negative 39 percent to negative 46 percent from May 2 to 15. Ibig sabihin nito, bumabagal na 'yung pagdagdag o paglaki ng kaso.”

Batay din sa huling datos ng DOH, tinatayang 54,235 na lamang ang aktibong kaso ng COVID-19 sa bansa, kung saan 1,076,428 ang mga gumaling, at 19,262 ang mga pumanaw, mula sa 1,149,925 na kabuuang bilang na naitala.

'Wag na raw choosy sa brand... Mahihirap, unahin nang turukan — P-Du30

ni Mary Gutierrez Almirañez | May 18, 2021

Pinaboran ni Pangulong Rodrigo Duterte ang rekomendasyon na gawing prayoridad sa COVID-19 vaccination rollout ang mga mahihirap na mamamayan, batay sa kanyang public briefing ngayong umaga, May 18.

Aniya, "This is really for the poor, because if they get sick, they do not have the money. Let us be real about it… Wala silang pambili. They are at the mercy of their poverty. It is the sacred duty of the government to look after them.”

Matatandaang pang-5 pa sa prayoridad mabakunahan kontra COVID-19 ang mga low income families, kung saan mauuna muna ang mga health workers, senior citizens, persons with comorbidities at economic frontliners.

Tugon naman ni Vaccine Czar Secretary Carlito Galvez, Jr., “Ito po ang gusto naming i-suggest sa inyo dahil marami sa business sector at saka po sa COVAX na dapat buksan na natin ang A4 at A5. Dapat, ang bakuna, unahin ang mahihirap.”

Dagdag nito, “Kung makita natin ang recommendation ng business sector, karamihan ng Gabinete at sa Senate, eh, ibukas na po natin as soon as possible time. Puwede na tayo mag-start sa mahihirap para ang mga bakuna sa COVAX ay mabigyan ang mahihirap.”

Tiniyak din ni Galvez na magiging mas mabilis na ang vaccination rollout sa bansa, kung saan 500,000 katao ang tina-target mabakunahan kada araw, upang tuluyang maabot ang herd immunity sa pagsapit ng Nobyembre.

Iginiit pa nitong sasapat na ang suplay ng COVID-19 vaccines sa pagdating ng milyun-milyong doses ng bakuna sa kalagitnaan ng Mayo.

Kabilang dito ang inaasahang 2.2 million doses ng Pfizer, 1.3 million doses ng Sputnik V at karagdagang 500,000 doses ng Sinovac. Darating din sa Hunyo ang 3.3 million doses ng AstraZeneca (kabilang ang 1.3 million na binili ng private sector), ang 250,000 doses ng Moderna (kabilang ang 50,000 na binili ng private sector), at ang 2 million doses ng Sputnik V.

Sa kasalukuyan nama’y tinatayang 7,779,050 doses ng mga bakuna na ang dumating sa ‘Pinas, kung saan 3,001,875 ang mga nabakunahan.

Nilinaw din ni Pangulong Duterte na hindi dapat mamili ng brand ng COVID-19 vaccines ang mga nais magpabakuna upang mapabilis ang rollout.

“‘Wag n'yo na silipin kung Moderna, Pfizer, or AstraZeneca because I won’t allow it. Mahirap ka man o mayaman, kung gusto mo, pumunta ka sa vaccination sites. If you are there in the community, go there and have yourself vaccinated with any of the vaccines available. They are all potent, they are all effective. So there is no reason to be choosy about it,” aniya.