P2.5 B, dagdag sa P82.5 B budget sa COVID vaccine, aprub!

ni Mary Gutierrez Almirañez | June 5, 2021

Nilinaw ni Department of Budget and Management (DBM) Secretary Wendel Avisado na kulang ang P82.5 billion na inilaang pondo sa pambili ng COVID-19 vaccines, kaya kailangan nilang gamitin ang P2.5 billion pondo ng 2021 contingency fund, na inaprubahaninaprubahan ni Pangulong Rodrigo Duterte ngayong araw, June 5.

Aniya, “Kaa-approve lang ng ating Pangulo ng P2.5 billion, equivalent to $56 million chargeable against the 2021 contingency fund.”

Dagdag niya, “Sa taong ito, nag-allocate tayo ng P82.5 billion for COVID-19 vaccination program. Of this amount, P70 billion ginamit sa pambili ng COVID-19 vaccines at 12.5 ay sa ancillary at logistical (purposes). Subalit hindi tayo natatapos dito kasi kailangan natin ng mas maraming vaccine at nakikipag-unahan tayo sa ibang bansa.

“Ang madaling sabi: hindi lang po talaga P82.5 billion ang gagastusin sa pagbili ng vaccine. Kaya kahit contingency fund, kailangang gamitin,” paglilinaw pa niya.

Ilalaan umano nila ang contingency fund para sa 4 million doses ng COVID-19 vaccines na nakatakdang i-deliver sa bansa ngayong buwan.

Sa ngayon ay 8,329,050 doses ng bakuna na ang dumating sa ‘Pinas, kabilang ang Sinovac, AstraZeneca, Sputnik V at Pfizer.

Inaasahan namang darating bukas ang karagdagang 1 million doses ng Sinovac galing China.

Kaugnay nito, puwede nang iturok ang Sinovac sa mga edad 3 hanggang 17-anyos na populasyon ng China, matapos maaprubahan ang emergency use authorization nito, ayon kay Chairman Yin Weidong ng Sinovac Biotech.

Staff ng PGH, pinarangalan ni P-Du30 dahil sa sunog

ni Mary Gutierrez Almirañez | June 3, 2021

Ginawaran ni Pangulong Rodrigo Duterte ng Order of Lapu-Lapu ang ilang magigiting na staff ng Philippine General Hospital (PGH) kaugnay ng naganap na sunog kamakailan sa pagamutan.

Kabilang dito ang mga staff na mas inunang i-evacuate ang mga bagong panganak na sanggol at pasyente bago ang sarili.

Kinilala ni Pangulong Duterte sina:

• Surgeon Dr. Rodney Dofitas

• Residents Dr. Alexandra P. Lee and Dr. Earle Ceo Abrenica

• Nurses Esmeralda Ninto, Jomar Mallari, Kathrina Bianca Macababbad, Phoebe Rose Malabanan, Nurses Quintin Bagay, Jr.

• Safety officers Joel Santiago at Ramil Ranoa.

Ang Order of Lapu-Lapu ay iginagawad sa mga tauhan ng gobyerno at private sector na nagpamalas ng kakaibang serbisyo at kontribusyon sa ilalim ng adbokasiya at administrasyon ni Pangulong Duterte.

Matatandaang naganap ang sunog sa ikatlong palapag ng PGH nitong May 16, kung saan mahigit P50 million ang naging pinsala sa ospital. Wala namang iniulat na nasugatan at maayos ang naging evacuation process dahil sa pagtutulungan.

Biyahero sa 7 bansa, bawal pa rin sa ‘Pinas – Roque

ni Lolet Abania | June 1, 2021

Inaprubahan ni Pangulong Rodrigo Duterte ang pagpapalawig ng restriksiyon na kasalukuyang ipinatutupad sa inbound travelers na mula sa India, Pakistan, Sri Lanka, Bangladesh, Nepal, Oman at United Arab Emirates.

Ayon kay Presidential Spokesman Harry Roque, extended ang travel ban mula June 1 hanggang June 15, 2021.

Matatandaang noong huling mga linggo ng Abril ipinatupad ang travel ban sa lahat ng mga travelers na mula sa India kasabay ng pagtaas ng mga kaso ng COVID-19 sa mga bansa sa South Asia.

Ang COVID-19 variant na unang na-detect sa India ay isa sa mga variants of concern na mino-monitor ng ating bansa. Nitong unang linggo ng Mayo, pinalawig ng Pilipinas ang pagba-banned sa mga travelers kasabay ng pagtaas ng bilang ng COVID-19 cases, kung saan ipinagbawal na rin ang mga manggagaling sa Pakistan, Bangladesh, Nepal at Sri Lanka.

Noong May 16, kabilang na rin ang mga travelers mula Oman at United Arab Emirates na ipinagbabawal dahil sa panganib ng Indian variant ng COVID-19.