Face shield, sa mga ospital na lang - P-Du30

ni Ronalyn Seminiano Reonico | June 17, 2021

Nanawagan si Senate President Vicente Sotto III sa Department of Health (DOH) ngayong Huwebes at pinaalalahanan ito hinggil sa paggamit ng face shield dahil aniya, sumang-ayon na si Pangulong Rodrigo Duterte na sa mga ospital na lamang magsuot nito.

Tweet ni Sotto, "Last night, the President agreed that face shields should only be used in hospitals. Allowed us to remove ours! Attn DOH!"

Matatandaang sinabi ni Health Undersecretary Leopoldo Vega na maaaring alisin na ang mga face shields kapag nasa labas dahil sa mababang panganib ng transmission ng COVID-19 sa mga open spaces.

Ngunit iginiit naman kamakailan ni Department of Health Secretary Francisco Duque III ang patuloy na paggamit ng face shield dahil mababa pa ang bilang ng mga nababakunahan kontra-COVID-19.

Iskedyul ng pagbubukas ng klase, depende kay P-Du30

ni Lolet Abania | June 15, 2021

Ipinahayag ng Department of Education (DepEd) na ang pagbubukas ng klase para sa School Year 2021-2022 ay posibleng sa Agosto o sa una o ikalawang linggo ng Setyembre.

Sa Laging Handa public briefing ngayong Martes, sinabi ni DepEd Secretary Leonor Briones na ipinrisinta na nila ang panukala sa pagbubukas ng klase kay Pangulong Rodrigo Duterte para aprubahan ito.

“Kailangan, may choice naman dahil siya ang magdi-decide, bibigyan namin siya ng tatlong choices. ‘Yung August na sang-ayon talaga sa existing law, at saka kung mag-extend siya up to September, first week or second week,” ani Briones.

Matatandaang iminungkahi ng DepEd na gawing August 23 ang pagbubukas ng School Year 2021-2022 subalit nagbigay pa rin sila ng opsiyon habang ang Pangulo pa rin ang may pinal na desisyon hinggil dito.

Binanggit naman ni Briones na nagkakaisa sina Pangulong Duterte at kanyang Cabinet na payagan na ang face-to-face classes sa mga piling eskuwelahan na naging panukala na rin ng DepEd, subalit ito ay na-recall dahil sa mga reports ng bagong COVID-19 variant sa United Kingdom.

Ayon pa kay Briones, ang Delta variant na unang na-detect sa India ang isa rin sa mga isyung pinagtutuunan ng pansin ngayon tungkol sa pagbubukas ng klase.

“Ang Department of Education, kung siya ay magbibigay ng advice sa presidente ay kailangan ding kumonsulta sa IATF, sa Department of Health, dahil ang expertise ng mga pag-aaral nila sa variant na ito ay sinabing ‘very dangerous’,” sabi ni Briones.

Aniya pa, ang Inter-Agency Task Force on Emerging Infectious Diseases (IATF), ang policy-making body ng gobyerno na siyang tumutugon sa pandemya ng COVID-19.

“Kung talagang mahirap i-control itong bagong variant, nandiyan naman ‘yung ating ibang paraan. Hindi na natin gagamitin ‘yung face to face... ang gagamitin largely will be technology,” saad pa ng kalihim.

Du30: Safety protocols, 'wag kalimutan sa community pantry

ni Ronalyn Seminiano Reonico | June 15, 2021

Saludo si Pangulong Rodrigo Duterte sa mga community pantry organizers sa bansa dahil sa kanilang magandang intensiyon, ngunit nilinaw niya na kailangang sundin ng mga ito ang ipinatutupad na COVID-19 health protocols ngayong panahon ng pandemya.

Matatandaang ilang community pantries na rin ang dinumog ng mga tao kung saan nalabag ang mga health protocols katulad ng social distancing.

Saad ni P-Duterte, "Wala namang question itong pantry scheme. As a matter of fact, I salute the people behind this and those who originated it. Nagkulang sila and maybe they are ignorant of the prohibition imposed by law not by me.

"Hindi siguro n’yo nabasa pero sa totohanan lang, if it is a matter of assessing whether or not you are doing good, you are doing super good. Saludo ako at maganda ang kunsensiya ninyo sa tao but please, read the restrictions first.”

Si Ana Patricia Non ang unang nagtayo ng Maginhawa Community Pantry na tinularan ng maraming Pinoy at ayon sa House Resolutioin, umabot na sa 6,000 ang community pantries sa iba’t ibang lugar sa bansa.

Samantala, una nang nagpaalala ang Department of the Interior and Local Government sa mga organizers ng community pantry na iwasan ang pagkakaroon ng mahabang pila ng mga tao lalo na ang mass gathering.