P5K ayuda sa bawat pamilya na biktima ni ‘Odette’ – P-Du30

ni Lolet Abania | December 28, 2021

Ipinahayag ni Pangulong Rodrigo Duterte nitong Lunes ng gabi na mayroong sapat na pondo ang gobyerno para magbigay ng cash aid na P5,000 sa bawat pamilyang sinalanta ng Bagyong Odette.

“May pera naman. I am giving P5,000 per family. Itong pera na nakuha ko, which I have gathered, will be sufficient for the assistance of P5,000 for everybody,” ani Pangulong Duterte sa kanyang weekly Talk to the People kagabi.

Ayon kay Department of the Interior and Local Government (DILG) Secretary Eduardo Año, nakapag-isyu na sila ng isang joint circular hinggil sa nabuong guidelines para sa distribusyon ng cash assistance sa mga lugar na hinagupit ng bagyo.

Sinabi ni Año na ang DILG ay nakatakdang mag-distribute ng tinatayang P4 bilyon halaga ng cash aid sa mga apektadong residente.

“Humigit kumulang P4 billion ang pamimigay na ayuda... Ayon sa DBM (Department of Budget and Management), mare-release bukas sa mga LGUs,” sabi ni Año.

Ayon pa sa kalihim, makukumpleto nila ang pamamahagi ng P5,000 ayuda sa loob ng 15 araw.

Dagdag ni Año na ang Armed Forces of the Philippines (AFP) at ang Philippine National Police (PNP) ay tutulong para sa distribusyon ng mga cash aid.

P-Du30, nag-inspeksyon sa mga sinalanta ng Bagyong Odette

ni Lolet Abania | December 19, 2021

Nagsagawa si Pangulong Rodrigo Duterte ng aerial inspection sa ilang lugar na hinagupit ng Bagyong Odette nitong Sabado.

Kasama si Senador Christopher “Bong” Go, ininspekyon ni Pangulong Duterte ang Siargao, Surigao City, Dinagat Islands, at Maasin City sa Southern Leyte, kung nai-share ng senador ang kanilang mga larawan at videos.

Nakipagpulong din ang Pangulo sa mga local government officials ng mga naturang lugar. Sinabi ni Go na nakatakda ring bisitahin ng Pangulo ang Bohol at Cebu provinces ngayong Linggo.

P-Du30, nag-withdraw na sa pagka-senador – Comelec

ni Lolet Abania | December 14, 2021

Binawi na ni Pangulong Rodrigo Duterte ngayong Martes ang kanyang certificate of candidacy (COC) sa pagka-senador para sa 2022 elections.

Ginawa ito ni Pangulong Duterte sa parehong araw kung saan ang kanyang long-time aide na si Senador Christopher “Bong” Go ay mag-withdraw ng kanyang COC sa pagka-pangulo.

“The President has filed his withdrawal from the Senatorial elections,” sabi ni Comelec Spokesperson James Jimenez sa isang tweet.

Matatandaang ang political party ni Pangulo Duterte na PDP-Laban, na pinangungunahan ni Energy Secretary Alfonso Cusi ay una nang ininomina ang Punong Ehekutibo bilang vice presidential bet ng partido para sa May 2022 elections.

Subalit, ayon kay P-Duterte, siya ay magreretiro na sa pulitika matapos ang kanyang termino sa Hunyo 30, 2022.

Noong nakaraang buwan, naghain ang Pangulo ng isang substitute COC para naman sa pagka-senador.

Sa kanyang pag-file ng COC sa pagka-senador, ang Pangulo ay nag-substitute kay Liezl Visorde ng Pederalismo ng Dugong Dakilang Samahan (PDDS).

Dalawang araw bago ito, naghain si Go ng substitute COC para sa pagka-pangulo sa ilalim din ng PDDS.

Sa ngayon, wala pang pahayag mula sa kampo nina P-Duterte at Go kung kailan at saan ang mga naturang opisyal ay nanumpa bilang PDDS members.