Handa nang bumaba sa pagka-pangulo… “Nag-iimpake na po ako” — P-Duterte

ni Jasmin Joy Evangelista | February 8, 2022

Nag-iimpake na umano si Pangulong Rodrigo Duterte ng kanyang mga gamit upang agad na makaalis sa Malacañang sa sandaling matapos ang kanyang termino.

"Nag-iimpake na nga ako eh. 'Yung iba ipinadala ko na, 'yung madala sa barko, binarko ko. You know the small things, 'yung mga tokens, 'yung mga bronze, 'yun ang inuna ko, 'yung mga mabigat," ani Duterte sa kanyang taped public briefing na inere nitong Lunes.

Handa na umano ang pangulo na lisanin ang Malacañang at i-welcome ang bagong pangulo.

"I await the day of turnover. Matikman ko rin 'yung feeling ng outgoing president. I will be the one to meet the new president, then I will invite him here for a tete-a-tete," sabi ni Duterte.

"Nag-iimpake na po ako. I have a little over 3 months, so I should be out by March, hindi ko na paabutin ng Abril. Hindi na rin ako matutulog dito. Kung saan dalhin ng Panginoong Diyos, magpraktis na ako ng tulog doon," dagdag pa niya.

Sa sandali umanong makaalis na siya sa Palasyo, pupunta na lamang siya rito araw-araw upang gawin ang kanyang mga trabaho sa nalalabi pang araw sa kanyang termino.

“Magpunta na lang ako dito for day-to-day trabaho, what's left of the things we have to work on," pahayag pa ni Duterte.

Nagsimula ang termino ni Duterte noong June 30, 2016, kung saan siya ang pumalit kay dating Pangulong Benigno Aquino III. Matatapos ang kanyang termino matapos ang anim na taon.

Malusog si Pangulong Duterte – Malacañang

ni Lolet Abania | February 4, 2022

Malusog para sa kanyang edad si Pangulong Rodrigo Duterte, ito ang paniniyak ng Malacañang ngayong Biyernes.

Ginawa ni acting presidential spokesperson Karlo Nograles ang pahayag isang araw matapos niyang ianunsiyo na sumailalim sa quarantine si Pangulong Duterte makaraang ma-expose sa nagka-COVID-19 nitong kasambahay at nagtungo sa ospital para naman sa kanyang regular checkup, base na rin sa order ng doktor nito.

“Okay naman si Pangulo,” sabi ni Nograles sa isang news conference ngayong Biyernes.

“He is as healthy as any healthy individual at his age could be,” giit pa ni Nograles.

Si Pangulong Duterte ay 76-taong gulang na.

Ayon kay Nograles, batay sa naging assessment ng doktor ng Pangulo, lumabas na ang COVID-19 case exposure nito ay noong Enero 28.

“Upon the assessment of the physician, even if another household staff tested positive [for COVID-19] last Sunday, the President was not in close contact as per the circumstances,” ani Nograles.

“That is why his quarantine was cut short and ended yesterday, February 3,” sabi pa ng opisyal.

Kinumpirma naman ni Nograles na nagtungo ang Punong Ehekutibo para sa kanyang checkup sa Cardinal Santos Medical Center sa San Juan City, subalit hindi nito binanggit kung kailan ito naganap.

Nitong Huwebes, naglabas ng larawan si Senador Christopher “Bong” Go na ipinakitang si Pangulong Duterte ay naka-personal protective equipment (PPE) habang nakasuot din ng face mask at face shield sa loob ng isang kotse.

Sinasabing ang larawan ay kinuha nitong Huwebes ng hapon sa isang lugar sa Metro Manila.

Matatandaan na paulit-ulit na dini-dismiss ng mga aide ni Pangulong Duterte ang panawagan ng publiko para mag-isyu ang Palasyo ng medical bulletin hinggil sa kalusugan ng Pangulo, anila, “the Constitution only demands disclosure in the event of a serious sickness.”

Naganap ang huling public appearance ng Pangulo sa kanyang Talk to the People address noong Enero 24.

Ani Nograles, “presumably on Monday”, ang susunod na public appearance ni Pangulong Duterte.

Matapos ma-exposed sa may COVID-19... P-Du30, naka-mandatory quarantine – Palasyo

ni Lolet Abania | February 3, 2022

Sumailalim si Pangulong Rodrigo Duterte sa mandatory quarantine matapos na ma-exposed sa isang household staff member na nagpositibo sa test sa COVID-19, ayon sa Malacañang ngayong Huwebes.

“The Palace confirms that President Rodrigo Roa Duterte was recently exposed to household staff who tested positive for COVID-19,” ani acting presidential spokesperson Karlo Nograles sa isang statement.

“The President has since been tested for COVID-19, and while the results of the test came back negative, he is currently observing mandatory quarantine protocols,” dagdag ng opisyal.

Ayon kay Nograles, na-expose o nalantad ang Pangulo sa isang COVID-19 positive noong Enero 30 at ang kanyang RT-PCR test result, kung saan negatibo siya sa sakit, ay lumabas nitong Lunes, Enero 31.

Sinabi ng kalihim na si Pangulo Duterte ay sumailalim ulit sa isa pang RT-PCR test at muling nagnegatibo sa test nitong Pebrero 1.

Binanggit din ni Nograles na ang Pangulo ay nagtungo sa Cardinal Santos Medical Center sa San Juan para aniya, “for his routine medical check-up only.”

Gayunman, wala pang sagot si Nograles sa mga tanong kung kailan naganap ang checkup ng Punong Ehekutibo o kung ito ay ginawa matapos ang January 30 exposure ng Pangulo sa isang COVID-19 case.

Tiniyak naman ni Nograles sa publiko na si Pangulong Duterte ay nananatiling may kakayahang isagawa ang kanyang mga tungkulin.

“The Chief Executive continues to work while in quarantine, and is in constant communication with the members of the Cabinet in order to ensure that urgent matters are addressed, and to monitor the implementation of his directives, particularly with regard to the government’s COVID-19 response,” giit ni Nograles.

Sa ilalim ng protocol na inisyu ng Department of Health (DOH), ang quarantine period para sa mga na-exposed sa isang COVID-19 case habang fully vaccinated na laban sa COVID-19 ay pitong araw o depende sa advice ng kanyang doktor.

Si Pangulong Duterte ay fully vaccinated na kontra-COVID-19 at nakatanggap na rin ng booster shot.