Bag, tanda na magkakaroon ng maraming anak

ni Maestra Estrellia de Luna @Panaginip Gabay ng Buhay | August 12, 2024

Analisahin natin ang panaginip na ipinadala ni Jerico ng Pasig City.

Dear Maestra,

Napanaginipan ko na minalas ako sa buhay, at sobrang kamalasan ang sinapit ko. 

Nakaraang gabi naman, napanaginipan ko na nakapulot ako ng bag, at may laman itong P50,000.

Ano ang ibig sabihin ng mga panaginip ko?

Naghihintay,

Jerico

---

Sa iyo, Jerico,

Kabaligtaran ang ibig sabihin ng panaginip mo na minalas ka, ito ay nangangahulugan na susuwertehin ka sa buhay.

Samantala, ang nakapulot ka ng pera ay nagpapahiwatig na lalago ang iyong negosyo. Uunlad ito, at kikita ka na rin ng malaki. Ito rin ay senyales na magiging maayos at masaya na ang iyong pamilya.

Ang bag ay tanda na magkakaanak kayo ng marami. Sila ang magbibigay ng karangalan sa pamilya n’yo.

Ang P50,000 naman ay sumisimbolo na makakapag-abroad ka, hindi lang sa isang bansa, kundi sa iba’t ibang bansa. 

Matapat na sumasaiyo,

Maestra Estrellia de Luna.

Kahulugan ng medicine, microscope at mirror

ni Maestra Estrellia de Luna @Panaginip Gabay ng Buhay | August 11, 2024

Analisahin natin ang panaginip na ipinadala ni Jess ng Tagaytay.

Dear Maestra,

Madalas kong mapanaginipan ang medicine, microscope at mirror. Ano ang ibig sabihin nito?

Naghihintay,

Jess

---

Sa iyo, Jess,

Maganda ang ipinahihiwatig kung napanaginipan mo ang medicine, pero kung ang medicine sa panaginip mo ay mapait ang lasa, ito ay nangangahulugan na makakaranas ka ng kaunting pagkainis sa iyong kapaligiran.

Ang microscope ay nagpapahiwatig na matutuklasan mo na ang itinuturing mong matalik na kaibigan ay siya pa lang sumisira sa iyo. 

Kung sumilip ka sa microscope, ito ay babala na maghihiwalay kayo ng dyowa mo, pero ‘wag kang malungkot dahil pansamantala lamang ito. Dahil muli rin siyang babalik sa iyo.

Samantala, ang mirror lalo na kung ikaw ang nananalamin, ito ay babala na malulugi ka sa negosyo lalo na kung hindi mo babaguhin ang diskarte mo. Iwasan mo ring magkuwento sa iba ng mga balak at plano mo sa iyong negosyo, dahil ang panaginip na ito ang babala na isa sa malapit sa puso mo ang magtatangkang sulutin ang negosyo mo.

Matapat na sumasaiyo,

Maestra Estrellia de Luna

Kahulugan ng bitay at susi

ni Maestra Estrellia de Luna @Panaginip Gabay ng Buhay | August 8, 2024

Analisahin natin ang panaginip na ipinadala ni Gerry ng Caloocan.

Dear Maestra,

Napanaginipan ko na nasentensiyahan ako ng bitay. Noong nakaraan naman, napanaginipan ko na ang dami ko raw hawak na susi, at binigay ko raw ‘yung isa sa karelasyon ko. 

Ano ang ibig sabihin ng mga panaginip ko?

Naghihintay,

Gerry

---

Sa iyo, Gerry,

Kabaligtaran ang ibig sabihin ng panaginip mo na nasentensiyahan ka ng bitay, ito ay nangangahulugan na makakatanggap ka ng malaking halaga, at magkakapera ka sa susunod na mga araw. 

Samantala, ang ibig sabihin na ang dami mong hawak na susi ay magtatagumpay ka sa iyong negosyo. Uunlad ito hanggang sa tuluyan kang yumaman. 

Ang binigay mo ‘yung isang susi sa karelasyon mo ay senyales na magpapakasal na kayo. 

Ang bilang na isa ay sumisimbolo sa pagiging matulungin mo sa iyong kapwa. Kaya lang, kapag ikaw na ang nangangailangan, walang sinuman ang dumadamay sa iyo. 

Matapat na sumasaiyo,

Maestra Estrellia de Luna